(ខេត្តកំពត) ៖ ភ្ជាប់ជាមួយនឹងការប្រកាសសមាសភាពគណៈកម្មការរៀបចំបុណ្យសមុទ្រដែលខេត្តកំពតត្រៀមរៀបចំធ្វើជាម្ចាស់ផ្ទះឆ្នាំ២០១៩ខាងមុខនេះ លោក ជាវ តាយ អភិបាល នៃគណៈអភិបាលខេត្តកំពតបានមានមតិណែនាំក្រើនរម្លឹកដល់ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងអាជ្ញាធរក្រុង ស្រុកទាំងអស់ឲ្យមានការយកចិត្តទុកដាក់ខ្ពស់ត្រូវបង្កើនការចូលរួមឲ្យបានព្រមគ្នា ពិសេសពាក់ព័ន្ធលើបញ្ហាការងាររៀបចំសោភ័ណភាពអនាម័យសម្អាតបរិស្ថានក្រុងកំពតដើម្បីត្រៀមរៀបចំអបអរពិធីបុណ្យសមុទ្រជុំទី២លើកទី៨ឆ្នាំ២០១៩ដែលខេត្តកំពតត្រូវទទួលធ្វើជាម្ចាស់ផ្ទះឲ្យទទួលបានការគាំទ្រនិងលទ្ធផលជោគជ័យ។
ការក្រើនរំលឹកណែនាំដូច្នេះខណៈ លោក ជាវ តាយ អភិបាលខេត្តមានប្រសាសន៍ ក្នុងឱកាសដឹកនាំកិច្ចប្រជុំគណៈអភិបាលខេត្តប្រចាំខែសីហាឆ្នាំ២០១៩ កាលពីរសៀលថ្ងៃទី០២ខែកញ្ញាឆ្នាំ២០១៩ ដែលមានការចូលរួមជាសមាជិកអង្គប្រជុំពីសំណាក់ លោក លោកស្រី ជាអភិបាលរងខេត្តនិងថ្នាក់ដឹកនាំ មន្ទីរ អង្គភាពជុំវិញខេត្ត អង្គភាពកម្លាំងកងឯកភាពឈរជើងក្នុងភូមិសាស្ត្រខេត្តព្រមទាំងអាជ្ញាធរក្រុង ស្រុកសរុបប្រមាណ៧២នាក់។
លោក ជាវ តាយ អភិបាលខេត្ត បានលើកបញ្ជាក់ទៀតថា៖ ពាក់ព័ន្ធ ពិធីបុណ្យសមុទ្រលើកទី៨ជុំទី២ ដែលខេត្តកំពតត្រៀមរៀបចំធ្វើជាម្ចាស់ផ្ទះនៅចុងឆ្នាំ២០១៩នេះគឺមានពេលវេលាកាន់តែខើចទៅៗនៅសល់រយៈពេលខ្លីចាប់ពីខែ៩នេះទៅ។
ដូច្នេះដើម្បីឲ្យពិធីបុណ្យសមុទ្រឆ្នាំ២០១៩នៅខេត្តកំពតបានប្រព្រឹត្តទៅប្រកបដោយភាពរលូននិងទទួលបានលទ្ធផលកាន់តែល្អប្រសើរជោគជ័យថែមទៀតជាងបណ្ដាឆ្នាំកន្លងទៅក៏ដូចនៅតាមបណ្ដាខេត្តជាប់សមុទ្រទាំងបួននោះ ជាការចាំបាច់មន្ទីរ អង្គភាពជុំវិញខេត្តនីមួយៗត្រូវតែមានការយកចិត្តទុកដាក់ទាំងអស់គ្នាក្នុងការរៀបចំបណ្ដើរៗធ្វើយ៉ាងណាឲ្យមានសោភ័ណភាពតាមមន្ទីរអង្គភាព នីមួយៗ ដែលនៅក្នុងក្រុងកាន់តែមានភាពលេចធ្លោជាងមុន។
ជាមួយនេះ លិកអភិបាលខេត្តក៏បានលើកឡើងថា តាមរយៈការសង្កេត នៅតាមបណ្ដាមន្ទីរ អង្គភាព នីមួយៗក្នុងខេត្តនៅមិនទាន់បានអុវត្តព្រមគ្នានៅឡើយហើយក៏មានភាពមិនទាន់ល្អស្អាតនៅឡើយដែរ។ ដោយមើលឃើញពីបញ្ហាដូចនេះ លោកអភិបាលខេត្តក៏បានដាក់ជាសំណូមពរក៏ដូចជាផែនការណែនាំជាចាំបាច់ ឲ្យមន្ទីរអង្គភាព អាជ្ញាធរ រួមនិងប្រជាពលរដ្ឋត្រូវតែចូលរួមចលនាឲ្យបានផុលផុសមានជាសកម្មភាពនិងការផ្សព្វផ្សាយឲ្យបានទូលំទូលាយសស្រាក់សស្រាំទាំងអស់គ្នាដោយយកចិត្តទុកដាក់ពីបញ្ហា អនាម័យសោភ័ណភាព បរិស្ថានតាមដងផ្លូវឬ បរិវេណជុំវិញមន្ទីរអង្គភាពសួនសាធារណៈនិងលំនៅដ្ឋានប្រជាពលរដ្ឋ ក្នុងក្រុងកំពតជាបន្តបន្ទាប់ពីពេលឥឡូវនេះតទៅ កុំរងចាំដល់ថ្ងៃឬពេលមកដល់ហើយលើកហេតុផលថាគៀកពេលពេកនោះឡើយ។
ថ្វីត្បិតមានបញ្ហាស្មុគស្មាញខ្លះៗក្តី ក្នុងកិច្ចប្រជុំ លោក ជាវ តាយ អភិបាលខេត្ត ក៏បានលើកការសរសើរ ដល់មន្ទីរ អង្គភាព មួយចំនួនដែលបានខិតខំប្រឹងប្រែង និងបានជំរុញឲ្យមានការខិតខំប្រឹងប្រែងយកចិត្តទុកដាក់ទាំងអស់គ្នាដើម្បីធ្វើយ៉ាងណាធ្វើឲ្យខេត្តកំពតមានការទទួលគាំទ្រពីសំណាក់ប្រជាពលរដ្ឋ ពិសេសភ្ញៀវទេសចរណ៍នៅពេលខាងមុខកាន់តែច្រើនឡើងៗ។
លោក ជាវ តាយ អភិបាលខេត្តក៏បានលើកឡើងឲ្យដឹងពីភាពប្រែប្រួលរីកចម្រើនពាក់ព័ន្ធអាជីវកម្មរបស់ខេត្តកំពតនាពេលបច្ចុប្បន្ន ជាច្រើនវិស័យ ដូច្នេះ លោកអភិបាលខេត្តនៅតែទទូចបន្ត ទាំងថ្នាក់ដឹកនាំមន្រីរាជការកងកម្លាំងប្រដាប់អាវុធគ្រប់លំដាប់ថ្នាក់និងប្រជាពលរដ្ឋ ត្រូវខិតខំរួមគ្នា ធ្វើឲ្យបានព្រមគ្នា គោលដៅរួមគ្នា ដើម្បីជំរុញការអភិវឌ្ឍខេត្តកំពតឲ្យកាន់តែរីចម្រើនថែមទៀត។
សូមបញ្ជាក់ថា៖-របៀបវារៈក្នុងកិច្ចប្រជុំនេះរួមមាន៖
១-ពិនិត្យ ពិភាក្សាលើសេចក្ដីព្រាងរបាយការណ៍ប្រចាំខែសីហាឆ្នាំ២០១៩ស្ដីពីការអនុវត្តការងាររបស់រដ្ឋបាលខេត្ត។
២-ពិនិត្យពិភាក្សាលើលើការចែងចែកប្រាក់រង្វាន់លើកទឹកចិត្តជូនមន្ត្រីរាជការខែកក្កដាឆ្នាំ២០១៩។
៣-ពិនិត្យពិភាក្សាលើសេចក្ដីព្រាងប្រតិទិនការងារសម្រាប់ដំណើរការកសាងផែនការអភិវឌ្ឍខេត្តកំពត(២០២០-២០២៤)
៤-បញ្ហាផ្សេងៗដោយអង្គប្រជុំមានការពិនិត្យ ពិភាក្សាយ៉ាងយកចិត្តទុកដាក់ក្នុងស្មារតីទទួលខុសត្រូវខ្ពស់៕ សេង ណារិទ្ធ
