(ខេត្តកំពត)៖ នៅព្រឹកថ្ងៃសៅរិ៍ ២កើត ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣១ ខែ សីហា ឆ្នាំ២០១៩ លោក លាង រឿនសុធី អភិបាលក្រុងកំពត បានអញ្ជើញចូលរួមក្នុងពិធីប្រគល់សម្ភារៈសិក្សា ថវិកាជូនសិស្សានុសិស្ស លោកគ្រូអ្នកគ្រូ និងចែកអំណោយដល់គ្រួសារក្រីក្រ ដោយមានការចូលរួមពី សប្បុរសជន អភិបាលរងក្រុង ប្រធាន និងសមាជិកក្រុមប្រឹក្សាក្រុង ចៅសង្កាត់ សមាជិក ស.ស.យ.ក ក្រុង លោកគ្រូអ្នកគ្រូ និងសិស្សានុសិស្ស សរុបចំនួនប្រមាណ ៣៨០នាក់ នៅសាលាបឋមសិក្សាអូរតូច សង្កាត់អណ្តូងខ្មែរ ក្រុងកំពត។
ក្នុងឱកាសប្រគល់សម្ភារៈសិក្សាជូនដល់សិស្សានុសិស្សព្រឹកនេះ លោក លាង រឿនសុធី អភិបាលក្រុងកំពត ក៏បានផ្តាំផ្ញើដល់សិស្សានុសិស្សទាំងអស់ត្រូវខិតខំព្យាយាមរៀបសូត្រ ក្រេបយកចំណេះវិជ្ជាដោយយកចិត្តទុកដាក់ ដើម្បីក្លាយជាសិស្សពូកែ ត្រូវរក្សាអនាម័យ ផឹកស្អាត ហូបស្អាត និងជៀសឲ្យឆ្ងាយពីគ្រឿងញៀន។
ជាមួយគ្នានេះ លោក លាង រឿនសុធី អភិបាលក្រុងកំពត ក៏សូមថ្លែងអំណរគុណយ៉ាងជ្រាវជ្រៅចំពោះសប្បុរសជនគ្រប់មជ្ឈដ្ឋាន ដែលបានចូលរួមចំណែកយ៉ាងសកម្ម ក្នុងការឧបត្ថម្ភនូវសម្ភារៈសិក្សាដល់សិស្សានុសិស្ស ព្រមទាំងសម្ភារៈជាគ្រឿងឧបភោគ និងបរិភោគ ដើម្បីរួមវិភាគទាន ផ្តល់ជូនប្រជាពលរដ្ឋក្រីក្រក្នុងភូមិសាស្ត្រក្រុងកំពត នាពេលនេះផងដែរ៕
