ភ្នំពេញ ៖លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានណែនាំដល់មន្ត្រីពាក់ព័ន្ធក្រោមឱវាទ បន្តពង្រឹង និងបង្កើនការយកចិត្តទុកដាក់បន្ថែមទៀតលើការងារបង្កា បង្ក្រាប ទប់ស្កាត់បទល្មើសព្រហ្មទណ្ឌគ្រប់ប្រភេទ បទល្មើសគ្រឿងញៀន ល្បែងស៊ីសងគ្រប់ប្រភេទ គ្រប់រូបភាពនៃអំពើជួញដូរមនុស្ស និងការទទួលពាក្យបណ្ដឹង សំណើរ សំណូមពរសុំកិច្ចអន្តរាគមន៍បន្ទាន់ផ្សេងៗពីប្រជាពលរដ្ឋ…
នៅព្រឹកថ្ងៃសុក្រ ១កើត ខែភទ្របទ ឆ្នាំកុរ ឯកស័ក ពុទ្ធស័ករាជ២៥៦៣ ត្រូវនឹងថ្ងៃទី៣០ ខែសីហា ឆ្នាំ២០១៩ រដ្ឋបាលខណ្ឌដូនពេញ បានបើកកិច្ចប្រជុំគណៈបញ្ជាការឯកភាពរដ្ឋបាលខណ្ឌ ប្រចាំខែសីហា ឆ្នាំ២០១៩ ក្រោមអធិបតីភាព លោក សុខ ពេញវុធ អភិបាល នៃគណៈអភិបាលខណ្ឌដូនពេញ ដោយមានការអញ្ជើញចូលរួមពី លោក លោកស្រីអភិបាលរង លោក នាយក-រងរដ្ឋបាល លោក អធិការនគរបាលខណ្ឌ លោកមេបញ្ជាការរងកងរាជអាវុធហត្ថខណ្ឌ លោក លោកស្រីប្រធាន អនុប្រធានការិយាល័យចំណុះជំនាញពាក់ព័ន្ធ លោក លោកស្រីប្រធានទីរួមផ្សារទាំង៣ លោក លោកស្រីចៅសង្កាត់ទាំង១១ លោក នាយនគរបាលប៉ុស្តិ៍រដ្ឋបាលទាំង១១ ។
ជាលទ្ធផល នៃកិច្ចប្រជុំខាងលើនេះ លោក សុខ ពេញវុធ អភិបាល នៃគណៈអភិបាលខណ្ឌដូនពេញ និងជាប្រធានអង្គប្រជុំបានធ្វើការណែនាំ និងដាក់ផែនការអនុវត្ត លើការងារសំខាន់ៗមួយចំនួន រួមមាន៖
-បន្តពង្រឹង និងបង្កើនការយកចិត្តទុកដាក់លើការងារបង្កា បង្ក្រាប ទប់ស្កាត់បទល្មើសព្រហ្មទណ្ឌគ្រប់ប្រភេទ
-បន្តតាមដាន កំណត់មុខសញ្ញា និងបង្ក្រាបបទល្មើសគ្រឿងញៀន
-បង្ក្រាបឲ្យបានគ្រប់រូបភាពនៃអំពើជួញដូរមនុស្ស អំពើជួញដូរផ្លូវភេទ និងករណីពរពោះជំនួស …
-ការទទួលពាក្យបណ្ដឹង សំណើរ សំណូមពរសុំកិច្ចអន្តរាគមន៍បន្ទាន់ផ្សេងៗពីប្រជាពលរដ្ឋគ្រប់មជ្ឈដ្ឋាន នៅក្នុងមូលដ្ឋាន
-ការងាររៀបចំសណ្តាប់ធ្នាប់របៀបរៀបរយសាធារណៈ និងអនាម័យតាមដងផ្លូវ
-និងបញ្ហាផ្សេងៗមួយចំនួនទៀត ។
គូសបញ្ជាក់ជូនផងដែរថា៖ កន្លងមករដ្ឋបាលខណ្ឌដូនពេញ បានទទួលជោគជ័យស្ទើរគ្រប់ករណីបង្ក្រាបបទល្មើស ដូចជា ករណីលួច ឆក់ ប្លន់ បទល្មើសគ្រឿងញៀន ការបង្ក្រាបល្បែងស៊ីសងគ្រប់ប្រភេទ ជាពិសេសទីតាំងអាជីវកម្មអ៊ីនធឺណិតបង្កប់ល្បែងស៊ីសង(ហ្គេមបាញ់ត្រី…) តាមរយៈវិធានការជាក់ស្តែង ក៏ដូចជាវិធានការរបស់កម្លាំងជំនាញផងដែរ ៕
