(ខេត្តកំពត)៖ គេនៅចាំបានថា កាលពីដើមខែសីហា ឆ្នាំ២០១៩ កន្លងផុតទៅ វត្តទឹកវិល និងលំនៅដ្ឋានរបស់ប្រជាពលរដ្ឋ ស្ថិតក្នុងឃុំកំពង់គ្រែង ស្រុកទឹកឈូ ខេត្តកំពត ត្រូវបានរងនូវជំនន់ភ្លៀងបណ្តាលឲ្យលិចលង់ជាច្រើនថ្ងៃផងដែរ។យ៉ាងណាមិញក្រោយពីជំនន់ស្រកចុះមិនទាន់បានប៉ុន្មានថ្ងៃផងស្រាប់តែវត្តទឹកវិលនិងលំនៅដ្ឋានប្រជាពលរដ្ឋស្ថិតតាមមាត់ព្រែកកំពង់បាយ ត្រូវបានរងនូវជំនន់ភ្ញៀងម្តងទៀតហើយ គឺលិចលង់១ខែពីរដងឯណោះ។
តាមប្រភពព័ត៌មានពីប្រជាពលរដ្ឋដែលរស់ក្នុងភូមិសាស្ត្រខាងលើ បាននិយាយថា ជំនន់ភ្លៀងបានវាយលុកខ្លាំងម្តងទៀតនៅចំណុចវត្តទឹកវិល នៃឃុំកំពង់គ្រែង ស្រុកទឹកឈូ ខេត្តកំពត ខណៈមានភ្លៀងធ្លាក់ខ្លាំងនៅថ្ងៃទី២៩ ខែសីហា ឆ្នាំ២០១៩ម្សិលមិញ ហើយស្ថានភាពលិចលង់នេះ គឺមិនទាន់ស្រកចុះនៅឡើយទេ ប៉ុន្តែជំនន់លើកនេះរងផលប៉ះពាល់មិនធ្ងន់ធ្ងរដូចលើកមុននោះទេ។
ទោះជាយ៉ាងណាក៏ដោយ ក្រោយពីមានជំនន់កើតឡើង គេសង្កេតឃើញវត្តមានអាជ្ញាធរគ្រប់ជាន់ថ្នាក់ និងសមត្ថកិច្ច បានចុះត្រួតពិនិត្យមើលពីស្ថានភាពទឺជំនន់យ៉ាងសស្រាក់សស្រាំ ដើម្បីរកវិធានការស្រោចស្រង់ និងរកដំណោះស្រាយជូនពលរដ្ឋឲ្យបានទាន់ពេលវេលា ដោយមិនទុកឲ្យប្រជាពលរដ្ឋណាម្នាក់ជួបបញ្ហា ឬរងគ្រោះដោយសារគ្រោះធម្មជាតិទាំងនេះឡើយ។
សូមបញ្ជាក់ថា ជំនន់ភ្លៀងដែលធ្វើឲ្យរងផលប៉ះពាល់ដល់លំនៅដ្ឋានប្រជាពលរដ្ឋនោះ គឺតែងតែកើតឡើងនៅតាមភូមិសាស្ត្រជាប់ដងព្រែកកំពត ដោយជំនន់នេះវាបានផ្តើមឡើងដោយសារមានភ្លៀងធ្លាក់ខ្លាំង គាប់ជួនទំនប់វារីអគ្គិសនីកំចាយ ត្រូវបើកទ្វារទឹកគ្រប់ទ្វារទាំងអស់ ដើម្បីបង្ហូរទឹកមកក្រោម ធ្វើបែបនេះគឺដើម្បីសុវត្ថិភាព សម្រាប់បញ្ចៀសនូវហានិភ័យផ្សេងៗ ដែលអាចកើតឡើងជាយថាហេតុ៕ សេង ណារិទ្ធ
