ត្បូងឃ្មុំ ៖ប្រភពពីប្រជាពលរដ្ធដែលរស់នៅជាប់ព្រំដែនបានបង្ហើបឲ្យដឹងថា បច្បន្ននេះសមត្ថកិច្ចពាក់ព័ន្ធនិងមន្ដ្រីគយ ប្រចាំច្រកដូង៧ដើម ឃុំដារ ស្រុកមេមត់ ខេត្តតក្បូងឃ្មុំ នៅតែបន្តឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុកដើម្បីជាថ្នូរនឹងផលប្រយោជន៍យ៉ាងសុខស្រួល។ ប្រភពបានឲ្យដឹងទៀតថា ការដែលលោក យឹម វណ្ណៈ ហ៊ានធ្វើអ្វីៗតាមអំពើចិត្ត គឺដោយសារមានការសម្របសម្រួលពីមន្ត្រីគយធំៗក្នុងខេត្តត្បូងឃ្មុំ ក៏ដូចជាអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា ផងដែរ។ ហេតុនេះឈ្មួញដែលនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុកតាមច្រកដូង៧ដើម ក្នុងស្រុកមេមត់ បានក្លាយទៅជាប្រភពចំណូលដ៏សំខាន់របស់លោក យឹម វណ្ណៈ និងបក្ខពួក។
បើតាមប្រភពពីមន្ដ្រីដែលស្និទ្ធនឹងលោក យឹម វណ្ណៈ មេគយច្រកដូង៧ដើម បានឲ្យដឹងថា ទំនិញដែលឈ្មួញធំៗនាំចូលតាមច្រកនេះ បង់ពន្ធត្រឹមតែ៣៥ទៅ៤០ភាគរយប៉ុណ្ណោះ ហើយក្រៅពីនេះឈ្មួញត្រូវបែងចែកផលប្រយោជន៍ក្រោមតុជាមួយលោក យឹម វណ្ណៈ យ៉ាងត្រជាក់ចិត្ត។ ប្រភពបានឲ្យដឹងទៀតថា ឈ្មួញទាំងធំទាំងតូចដែលនាំចូលទំនិញពីស្រុកយួនតាមច្រកដូង៧ដើម សុទ្ធតែសុំការយោគយល់ពីសំណាក់លោក យឹម វណ្ណៈ ដើម្បីឲ្យមុខរបររបស់ពួកគេអាចប្រព្រឹត្តទៅដោយរលូនគ្មានឧបសគ្គ។ ទន្ទឹមនឹងនេះលោក យឹម វណ្ណៈ តែងប្រើឈ្មោះលោក គុណ ញឹម ជាមេគយធំធ្វើជាបង្អែកដើម្បីគាបសង្កត់ទៅលើក្រុមឈ្មួញដែលនាំចូលទំនិញតាមច្រកដូង៧ដើម ស្រុកមេមត់ ខេត្តត្បូងឃ្មុំ ទៀតផង។
ប្រភពពីមន្ត្រីគយនៅក្នុងខេត្តត្បូងឃ្មុំ មួយចំនួនបានឲ្យដឹងថា លោក យឹម វណ្ណៈ អត្តលេខ៦៥២ មេគយច្រកដូង៧ដើម ស្រុកមេមត់ ខេត្តត្បូងឃ្មុំ កំពុងឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់កាន់តែច្រើនឡើងៗដើម្បីផលប្រយោជន៍ផ្ទាល់ខ្លួន។ មន្ត្រីគយក្នុងខេត្តត្បូងឃ្មុំ បានឲ្យដឹងទៀតថា សូម្បីតែអាជីវករដឹកកសិផល ចេញទៅស្រុកយួនតាមច្រកដូង៧ដើម ក៏ត្រូវលោក យឹម វណ្ណៈ និងបក្ខពួកគាបយកលុយដោយគ្មានការយោគយល់ដែរ ព្រោះពួកគេគិតតែពីរឿងប្រមូលលុយតាមរបៀបពុករលួយយ៉ាងក្រអឺតក្រទម។ បញ្ហានេះជារឿងដែលលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរមើលរំលងទៅទៀតទេ ព្រោះករណីលោក យឹម វណ្ណៈ មេគយច្រកដូង៧ដើម ឃុបឃិតឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ លើសនេះទៅទៀតលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនគួរបណ្ដោយឲ្យលោក យឹម វណ្ណៈ ធ្វើអ្វីៗតាមអំពើចិត្តទៀតឡើយ ព្រោះលោក យឹម វណ្ណៈ មេគយច្រកដូង៧ដើម ល្បីល្បាញអំពើពុករលួយយ៉ាងពេញបន្ទុកទៅហើយ..៕
(ដោយ គេហទំព័រ កម្ពុជា អភិវឌ្ឍន៍)
www.Kap-news.com
077797952/0887797952
WhatsApp=012680455
