(ខេត្តកំពត)៖ នៅរសៀ ថ្ងៃចន្ទ ១១រោច ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៦ ខែសីហា ឆ្នាំ២០១៩ នៅសាលសន្និសីទ សាលាខេត្តកំពត មានរៀបចំកិច្ចប្រជុំបូកសរុបលទ្ធផលការងារឆមាសទី១ ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពត ។
ក្នុងពិធីនេះ ក៏មានការរអញ្ជើញចូករួមពីសំណាក់ លោកអនុប្រធានក្រុមការងារថ្នាក់ជាតិ លោក លោកស្រីប្រធានក្រុមការងារក្រុង ស្រុក លោកអភិបាលក្រុង ស្រុក និងក្រុមលេខាធិការដ្ឋានក្រុមការងារថ្នាក់ជាតិចុះមូលដ្ឋានខេត្តកំពតសរុបចំនួន ២៨០នាក់។
បន្ទាប់ពី លោក ជាវ តាយ អភិបាលខេត្តកំពត បានស្រង់របាយការណ៍រួចមក លោកកិត្តិសេដ្ឋា បណ្ឌិត ចម ប្រសិទ្ធ បានគូសបញ្ជាក់និងវាយតម្លៃខ្ពស់ ព្រមទាំងធ្វើការកោតសរសើរចំពោះលទ្ធផលការងារ ស្តែងចេញពីការខិតខំបំពេញភារកិច្ចរបស់ថ្នាក់ដឹកនាំនៃក្រុមការងារថ្នាក់ជាតិ ទាំងថ្នាក់ខេត្ត ថ្នាក់ក្រុង ស្រុក គ្រប់លំដាប់ថ្នាក់ដែលជានិច្ចកាលបានចុះបំពេញការងារបានល្អប្រសើរ។
លើសពីនេះ លោកទេសរដ្ឋមន្ត្រីក៏បានចាត់ទុកអង្គវេទិកាសាធារណៈរបស់រាជរដ្ឋាភិបាលនៅតែមានសារសំខាន់ក្នុងការផ្សព្វផ្សាយស្តីពីគោលនយោបាយរបស់រាជរដ្ឋាភិបាល និងដើម្បីឆ្លើយតបដំណោះស្រាយ សំណូមពរ ក្តីកង្វល់និងបញ្ហាប្រឈមទាំងឡាយប្រកបដោយប្រសិទ្ធភាពសំដៅជួយកាត់បន្ថយភាពក្រីក្រជូនប្រជាពលរដ្ឋនៅគ្រប់មូលដ្ឋាន៕ សេង ណារិទ្ធ
