(ខេត្តកំពត)៖ នៅព្រឹកថ្ងៃទី១៧ ខែសីហា ឆ្នាំ២០១៩នេះ ឯកឧត្តម បណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាគណៈអធិបតី ក្នុងពិធីបញ្ចុះខណ្ឌសីមា និងសម្ពោធសមិទ្ធផលនានា នៅវត្តពោធិ៍រាជលំពូ ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត។
ក្នុងពិធីនេះក៏មានការអញ្ជើញចូលរួម ពីសំណាក់ លោក ជាវ តាយ អភិបាល នៃគណៈអភិបាលខេត្តកំពត លោក ជឹង ផល្លា ប្រធានក្រុមប្រឹក្សាខេត្ត លោក លោកស្រី ជាសមាជិកក្រុមប្រឹក្សាខេត្ត និងលោក លោកស្រី ជាអភិបាលរងខេត្ត កងកម្លាំងទាំងបីប្រភេទ អភិបាលក្រុង ស្រុក លោកមេឃុំ យុវជនសម្ពនស្រលាញ់សន្តិភាព យុវជនកាយរិទ្ធ យុវជន ស ស យ ក ព្រមទាំងប្រជាពលរដ្ឋក្នុងមូលដ្ឋាន។
បន្ទាប់ពី លោក ជាវ តាយ អភិបាលខេត្តកំពត បានស្រង់របាយការណ៍រួចមក ឯកឧត្តម បណ្ឌិត ហ៊ុន ម៉ាណែត បានលើកឡើង ដោយបានពាំនាំនូវប្រសាសន៍ផ្តាំផ្ញើ សួរសុខទុក្ខពីសំណាក់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេចតែងតែព្រួយបារម្ភយ៉ាងខ្លាំង ពីសុខ ទុក្ខរបស់ប្រជាពលរដ្ឋនៅទូទាំងប្រទេស។ ឯកឧត្តម បានបន្តថាដោយសារការដឹកនាំដោយភាពត្រឹមត្រូវរបស់ប្រមុខរាជរដ្ឋាភិបាលទើបប្រទេសយើងទទួលបានសុខសន្តិភាពរហូតមកដល់បច្ចុប្បន្ន ហើយចំពោះ សមិទ្ធផលទាំងអម្បាលមានដែលបានបង្ហាញរូបរាងនាពេលនេះ គឺបានផ្តើមចេញពីកត្តាសុខសន្តិភាពយ៉ាងពិតប្រាកដ។ដូច្នេះយើងទាំងអស់គ្នាពិតជាមិនចង់ឲ្យមានសង្គ្រាមកើតឡើងនោះទេ ព្រោះកន្លងមកសង្គ្រាមបានធ្វើឲ្យមានសោកនាដកម្មធ្ងន់ធ្ងរ ធ្វើឲ្យខ្ទេចខ្ទាំនូវហេដ្ឋារចនាសម្ព័ន្ធគ្រប់បែបយ៉ាង ពិសេសការនិរាសព្រាត់ប្រាស់ដែលបានបន្សល់នូវភាពឈឺចាប់។
ឯកឧត្តមបណ្ឌិត ហ៊ុន ម៉ាណែត បានលើកឡើងផងដែរថា លោកសូមថ្លែងអំណរគុណដល់លោកតា លោកយាយ និងបងប្អូនប្រជាពលរដ្ឋគ្រប់មជ្ឈដ្ឋានដែលតែងបោះឆ្នោតគាំទ្រដល់គណបក្សប្រជាជនកម្ពុជា ឲ្យដឹកនាំដោយសម្តេចតេជោ ហ៊ុន សែន ហើយឯកឧត្តម ជឿជាក់ថា លោកតា លោកយាយ និងបងប្អូនប្រជាពលរដ្ឋពិតជាបន្តគាំទ្រសម្តេច ហ៊ុន សែន ឲ្យធ្វើជានាយករដ្ឋមន្ត្រីដើម្បីដឹកនាំប្រទេសគ្រប់អាណតិ្ត។
ជាមួយគ្នានេះ ឯកឧត្តម ហ៊ុន ម៉ាណែត ក៏សូមវាយតម្លៃខ្ពស់ នូវកិច្ចខិតខំប្រឹងប្រែងរបស់អាជ្ញាធរគ្រប់ជាន់ថ្នាក់ក្នុងខេត្តកំពត ក្នុងនោះក៏មានកងម្លាំងប្រដាប់អាវុធទាំងបីប្រភេទ កម្លាំងយុវជនទាំងអស់ ដែលរួមសហការគ្នាបានល្អ ក្នុងការគ្រប់គ្រងនូវគ្រោះមហន្តរាយដែលផ្តើមដោយសារជំនន់ភ្លៀងបានល្អប្រសើរ។លើសពីនេះ ឯកឧត្តម ក៏សូមឲ្យអាជ្ញាធរ សមត្ថកិច្ចគ្រប់មូលដ្ឋានត្រូវត្រៀមលក្ខណៈបន្តទៀតដើម្បីត្រៀមវិធានការទប់ទល់រាល់ករណីចាំបាច់ណាមួយសម្រាប់ទប់ស្កាត់រាល់ផលប៉ះពាល់ទាំងឡាយដែលកើតឡើងដោយសារគ្រោះធម្មជាតិ ពិសសជំនន់ភ្លៀង ព្រោះឆ្នាំនេះមានភ្លៀងធ្លាក់ខ្លាំងនៅគ្រប់តំបន់ទូទាំងប្រទេស។
ក្នុងឱកាសនោះ ឯកឧត្តម ហ៊ុន ម៉ាណែត ក៏បានបំពាក់គ្រឿងឥស្សរិយយសជូនដល់មន្ត្រីរាជការមានស្នាដៃ និងសប្បុរសជនដែលបានជួយឧបត្ថម្ភជាថវិកាសម្រាប់កសាងសមិទ្ធផលនានានៅវត្តពោធិ៍រាជលំពូ និងប្រគេនថវិកាជូនព្រះចៅអធិការវត្ត ព្រមទាំងឧបត្ថម្ភថវិកាដល់ លោកតា លោកយាយ អាជ្ញាធរមូលដ្ឋាន កងកម្លាំងទាំងបី ក្រុមយុវជន លោកគ្រូ អ្នកគ្រូ និងសិស្សានុសិស្សដែលចូលរួមក្នុងពិធីនេះផងដែរ៕
សេង ណារិទ្ធ
