(ខេត្តកំពត)៖ នៅព្រឹកថ្ងៃសុក្រ ១រោច ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៦ ខែសីហា ឆ្នាំ២០១៩ លោក ជាវ តាយ អភិបាលនៃគណ:អភិបាលខេត្តកំពត បានអញ្ជើញចូលរួមក្នុងកិច្ចប្រជុំត្រៀមរៀបចំការប្រឡងសញ្ញាបត្រមធ្យមសិក្សាទុតិយភូមិ សម័យប្រលងថ្ងៃទី១៩ខែសីហាឆ្នាំ២០១៩ ដោយមានការអញ្ញើញចូលរួមពីលោកអភិបាលរងខេត្ត តំណាងមន្ទីរអប់រំយុវជន និងកីឡា តំណាងស្នងការដ្ឋាននគរបាល តំណាងបញ្ជាការដ្ឋានកងរាជអាវុធហត្ថខេត្ត អភិបាលក្រុង ស្រុក និងមន្ត្រីពាក់ព័ន្ធក្នុងសាលាខេត្តកំពត។
នៅក្នុងកិច្ចប្រជុំនេះ លោក ជាវ តាយ អភិបាលខេត្ត បានណែនាំនិងបានផ្តល់អនុសាន៍ដឹកនាំដូចខាងក្រោម៖
១/. ផ្តល់ជូនលោកអភិបាលក្រុងកំពត និងលោកអភិបាលស្រុកទឹកឈូទទួលខុសត្រូវក្នុងការផ្ញើកង់ និងម៉ូតូរបស់បេក្ខជនប្រលងទាំង ១០មណ្ឌល ដោយមិនយកប្រាក់កំរៃ ដោយរដ្ឋបាលខេត្តជាអ្នកទទួលបន្ទុកចំណាយ។
២/. នៅថ្ងៃទី១៩ ខែ សីហា ឆ្នាំ២០១៩ លោកអភិបាលខេត្ត រួមជាមួយនិងថ្នាក់ដឹកនាំខេត្តនឹងអញ្ជើញចូលរួមក្នុងពិធីបើកស្រោមសំបុត្រវិញ្ញាប្រឡងតាមមណ្ឌលប្រឡនីមួយៗ។
៣/. ស្នើដល់មន្ទីរអប់រំយុវជន និងកីឡារៀបចំសញ្ញា ឬប្លង់ចំពោះមណ្ឌលដែលប្តូរទីតាំងថ្មី ពីអនុវិទ្យាល័យ ហ៊ុន សែន ក្រាំងអំពិល មកសាលារៀន គួង យ៉ុក និងផ្សព្វផ្សាយឲ្យបានទូលំទូលាយជូនដល់បេក្ខជន និងមហាជន។
៤/. គណៈបញ្ជាការរដ្ឋបាលឯកភាពខេត្ត បានរៀបចំផែនការពារការប្រឡងសញ្ញាបត្រទុតិយភូមិទាំង១០មណ្ឌលដោយប្រើប្រាស់កម្លាំងនគរបាល និងកម្លាំងកងរាជអាវុធហត្ថតាមគោលដៅនីមួយៗរួចជាស្រេច ។ ចំពោះ ភោជនីយដ្ឋាន អាហារដ្ឋាន សណ្ឋាគារ ផ្ទះសំណាក់ ត្រូវធ្វើអន្តរាគមន៍ជាក់ស្តែងចំពោះកន្លែងណាដែលបានតម្លើងថ្លៃ នៅអំឡុងពេលប្រឡង ត្រូវរៀបចំលេខទូរស័ព្ទទំនាក់ទំនង (Hotline) បិទនៅតាមភោជនីយដ្ឋាន អាហារដ្ឋាន សណ្ឋាគារ ផ្ទះសំណាក់ ដើម្បីងាយស្រួលក្នុងការសម្របសម្រួលដោះស្រាយបញ្ហាដែលកើតឡើងជាយថាហេតុ៕ សេង ណារិទ្ធ
