(ខេត្តកែប)៖ លោក កែន សត្ថា អភិបាល នៃគណ:អភិបាលខេត្តកែប សង្ឃឹមយ៉ាងមុតមាំថា ការប្រលងសញ្ញាបត្រមធ្យមសិក្សាទុតិយភូមិ របស់សិស្សថ្នាក់ទី១២ ទាំងអស់ នៃវិទ្យាល័យ ហ៊ុន សែន ចំការដូង និងទទួលបានជោគជ័យ១០០% ក្នុងឆ្នាំនេះ។
ការលើកឡើងយ៉ាងដូច្នេះ ខណៈលោកអភិបាលខេត្តកែប ជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សថ្នាក់ទី១២ នៃវិទ្យាល័យ ហ៊ុន សែន ចំការដូង ចំនួន១៨១នាក់ នៅព្រឹកថ្ងៃទី១៤ ខែសីហា ឆ្នាំ២០១៩ ដែលជាបេក្ខជនត្រូវប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី១៩-២០ ខែសីហា ឆ្នាំ២០១៩ខាងមុខនេះ។
លោកអភិបាលខេត្តបានបញ្ជាក់ដោយមោទនភាពថា ការប្រឡងសញ្ញាបត្រមធ្យមសិក្សាទុតិយភូមិ នាឆ្នាំនេះ សិស្សនៃវិទ្យាល័យ ហ៊ុន សែន ចំការដូង និងទួលបានជោគជ័យ ១០០% ដោយការអះអាងនេះយោងទៅលេីការចូលរៀនរបស់សិស្សានុសិស្សដែលបានចូលរៀនបំប៉នស្ទើតែ១០០% និងដោយមានការខិតខំប្រឹងប្រែងបង្រៀនបំប៉នរបស់លោកគ្រូ អ្នកគ្រូ សុទ្ធតែមានបទពិសោធន៍។
លោកអភិបាលខេត្តបានបន្ថែមទៀតថា សិស្សានុសិស្សទាំងអស់មិនត្រូវធ្វើឲ្យ ឪពុក ម្ដាយ លោកគ្រូ អ្នកគ្រូទាំងអស់ បាត់ចង់ក្តីសង្ឃឹមឡើយ ហើយសិស្សានុសិស្សទាំងអស់ត្រូវតែមានភាពជឿជាក់លើសមត្ថភាពខ្លួនឯង ដើម្បីដណ្តើមយកនិទ្ទេសល្អឲ្យបានគ្រប់គ្នា។ ចំពោះការប្រឡងសញ្ញាបត្រមធ្យមសិក្សាទុតិយភូមិឆ្នាំ ២០១៩នេះ គឺបេក្ខជនប្រឡងត្រូវតែខិតខំប្រឹងប្រែងឲ្យអស់សមត្ថភាពរបស់ខ្លួន ដើម្បីជាក្តីសង្ឃឹមរបស់អាណាព្យាបាល លោកគ្រូ អ្នកគ្រូ ពិសេសការជួយលើកមុខមាត់របស់ខេត្តរបស់យើងផងដែរ។
មុននឹងបញ្ចប់ លោកអភិបាលខេត្ត ក៏បានឧបត្ថម្ភជាថវិកាជូនដល់លោកគ្រូ អ្នកគ្រូ ដែលបានខិតខំប្រឹងប្រែង បង្រៀនបំប៉នដល់សិស្សានុសិស្សជាទឹកប្រាក់សរុបចំនួន ៩.៩៦៧.០០០រៀល និងសិស្សានុសិស្សក្នុងម្នាក់ៗចំនួន១០.០០០រៀល សរុប១.៨១០.០០០រៀល៕ សេង ណារិទ្ធ
