ភ្នំពេញ ៖ លោក ហ៊ុន ម៉ាណែត ប្រធានសមាគមសិស្ស-និស្សិត អាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត( អ ម ត ឬ AMT) បានលើកឡើងថា សូមឲ្យការចុះអនុស្សារណយោគយល់គ្នា (MOU) នៅលើឯកសារត្រូវប្រែក្លាយជាការអនុវត្តសម្រាប់ប្រយោជន៍និស្សិត។
លោកលើកឡើងក្នុងពិធីចុះហត្ថលេខាលើអនុស្សរណៈយោគយល់រវាង សមាគមសិស្ស-និស្សិតអាហារូបករណ៍ សម្តេចអគ្គមហាសេនាបតីតេ ជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.តឬAMT) និងសាកលវិទ្យាល័យវិទ្យាសាស្ត្រ និងបច្ចេកវិទ្យា គុនមិញ និងក្រុមហ៊ុន អង្គរអ៊ីនធើណេសិនណលអ៊ែរផតអ៊ីនវេសម៉ិន (ខេមបូឌា) និងសមាគមមិត្តអតីតនិស្សិតចិននៅក្រៅប្រទេស នៅសណ្ឋាគារភ្នំពេញ នាថ្ងៃទី២៩ ខែកក្កដា ឆ្នាំ២០១៩។
លោកបន្តថា ផលប្រយោជន៍ នៃការចុះអនុស្សារណយោគយល់គ្នា នាពេលនេះគឺជាការភ្ជាប់ទំនាក់ទំនងស្ថាប័នទាំង៣ ដើម្បីរួមចំណែកអភិវឌ្ឍធនធានមនុស្សនៅកម្ពុជា និងជាការបើកច្រកដើម្បីឱ្យយុវជនមានឱកាសកសាងអនាគត ព្រោះពួកគេមិនខុសពីកូនចៅរបស់យើងនោះទេ ពួកគេគឺជាកូនចៅរបស់ប្រជាពលរដ្ឋ។ លោកបញ្ជាក់ថា ប្រទេសកម្ពុជាបើប្រៀបធៀបទៅនឹងប្រទេសដទៃគឺមនុស្សវ័យក្មេងមានចំនួនច្រើន។ ដូច្នេះដើម្បីធានាការជំរុញការអភិវឌ្ឍ បរិមាណមួយមុខគឺមិនគ្រប់គ្រាន់នោះទេ គុណភាពគឺសំខាន់ណាស់ដើម្បីជំរុញឲ្យមានការអភិវឌ្ឍឲ្យបានលឿន។
ក្នុងឱកាសនោះលោកសូមថ្លែងអំណរគុណអង្គភាពទាំងបីខាងលើដែលជួយជ្រោមជ្រែងសហប្រតិបត្តិការ និងព្យាយាមទំនាក់ទំនងផ្សារភ្ជាប់ជាមួយ នឹងសមាគម ( អ ម ត ឬ AMT) ក្នុងការរួមចំណែកអភិវឌ្ឍធនធានមនុស្ស និងផ្សារភ្ជាប់រវាងនិស្សិតកម្ពុជា-ចិន ដែលនេះ គឺស្របនឹងគោលការណ៍របស់ប្រមុខរាជរដ្ឋាភិបាលកម្ពុជា។
តំណាងស្ថាប័នទាំង៣នៃសាធារណរដ្ឋប្រជាមានិតចិនបានបង្ហាញនូវភាពសប្បាយរីករាយក្នុងការផ្សារភ្ជាប់ទំនាក់ទំនង និងចូលរួមអភិវឌ្ឍធនធានមនុស្សនៅកម្ពុជា ដែលគម្រោងបណ្ដុះបណ្ដាលនិស្សិតកម្ពុជានៅប្រទេសចិន គឺជាគម្រោងសប្បុរសធម៌មួយដែលជួយដល់ប្រទេសកម្ពុជាក្នុងការអភិវឌ្ឍធនធានមនុស្សវ័យក្មេង។
សូមបញ្ជាក់ថា គិតត្រឹមឆ្នាំ២០០៩ ដល់ ឆ្នាំ២០១៨ មាននិស្សិតទទួលអាហារូបករណ៍ទៅសិក្សាថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិតទៅសិក្សានៅប្រទេសចិនក្រោមការសម្របសម្រួលរបស់គណៈកម្មាធិការបានចំនួន១៤១នាក់ ក្នុងនោះ បរិញ្ញាបត្រចំនួន៨៥នាក់បរិញ្ញាបត្រជាន់ខ្ពស់ចំនួន៥៤នាក់ និងបណ្ឌិតចំនួន២នាក់៕
