(ខេត្តកំពត)៖ នៅព្រឹកថ្ងៃអាទិត្យ ៥រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ២១ ខែកក្កដា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត រួមជាមួយ លោក ជឹង ផល្លា ប្រធានក្រុមប្រឹក្សាខេត្ត អញ្ជើញជាអធិបតីភាព ក្នុងទិវាអន្តរជាតិប្រយុទ្ធប្រឆាំងញៀន “២៦ មិថុនា ២០១៩”។
សមាសភាពអញ្ជើញចូលរួមនាពេលនេះរួមមាន លោក លោកស្រី សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោកនាយក នាយករងរដ្ឋបាលសាលាខេត្ត ប្រធានក្រុមប្រឹក្សាក្រុង ស្រុក អភិបាលក្រុង ស្រុក ប្រធានមន្ទីរ អង្គភាពជុំវិញខេត្ត នាយកទីចាត់ការ អង្គភាពចំណុះសាលាខេត្ត មេឃុំ នាយប៉ុស្តិនគរបាល ទូទាំងស្រុកឈូក ដងទង់ ជុំគីរី ប្រជាពលរដ្ឋ និងសិស្សានុសិស្ស ចំនួន ១៨៩៨នាក់។
ក្នុងឱកាសនោះ លោក ជាវ តាយ បានមានប្រសាសន៍ថា ការប្រារព្ធទិវាអន្តរជាតិប្រយុទ្ធប្រឆាំងគ្រឿងញៀននេះ គឺពិតជាមានអត្ថប្រយោជន៏ និងអត្ថន័យយ៉ាងជ្រាលជ្រៅ ដែលបណ្តារដ្ឋជាសមាជិកទាំងអស់នៅលើសកលលោក តែងប្រារព្ធឡើងជារៀងរាល់ឆ្នាំ ក្រោមប្រធានបទ”សុខភាព ដើម្បីយុត្តិធម៌ យុត្តិធម៌ដើម្បីសុខភាព” ដើម្បីពញ្ញាក់ស្មារតី និងដាស់តឿន ក្រើនរំលឹកដល់ជនគ្រប់រូបឲ្យយកចិត្តទុកដាក់ និងចូលរួមកាន់តែសកម្មថែមទៀតក្នុងការបង្ការ ទប់ស្កាត់ និងដោះស្រាយរាល់បញ្ហា ដែលពាក់ព័ន្ធនឹងគ្រឿងញៀន ប្រកបដោយការទទួលខុសត្រូវ ឈានទៅសម្រេចតាមខ្លឹមសារពាក្យស្លោក “ចូលរួមលុបបំបាត់គ្រឿងញៀន ដើម្បីអនាគតកូនចៅយើង”។
លោក អភិបាលខេត្តបានបន្តថា អំឡុងពេលនេះយើងមានសេវាព្យាបាលដល់អ្នករងគ្រោះដោយសារគ្រឿងញៀន ដោយស្ម័គ្រចិត្ត ដោយផ្អែកលើសហគមន៍នៅតាមគ្រឹះស្ថានសុខាភិបាល តាមរយៈយន្តការច្បាស់លាស់ដើម្បីដឹកនាំសម្របសម្រួលរាល់បញ្ហាពាក់ព័ន្ធ ប៉ុន្តែការដោះស្រាយបញ្ហាគ្រឿងញៀនឲ្យមានប្រសិទ្ធភាព គឺទាមទារចំបាច់នូវការចូលរួម និងការគាំទ្រពីគ្រប់មជ្ឈដ្ឋាននៃសង្គម ពិសេសមាតាបិតា និងអាណាព្យាបាល ដែលចាត់ទុកជាកម្លាំងអូសទាញមួយដ៏មានប្រសិទ្ធភាពបំផុត៕
សេង ណារិទ្ធ
