មណ្ឌលគិរី៖ នៅព្រឹកថ្ងៃទី០១ខែធ្នូនេះនៅរង្វង់មូលគោព្រៃ ក្រុងសែនមនោរម្យ មន្ទីរសុខាភិបាលខេត្តមណ្ឌលគិរី បានរៀបចំពិធីប្រារព្ធទិវាពិភពលោកប្រយុទ្ធប្រឆាំងនឹងប្រយុទ្ធ ប្រឆាំងជម្ងឺអេដស៍ ០១ធ្នូ២០១៥ ក្រោមវត្តមាន លោក ចឹង សុចន្ថា អភិបាលរងខេត្តមណ្ឌលគិរី ។
បើតាមរបាយការណ៍របស់លោក ប៊ុន សួ ប្រធានមន្ទីរ សុខាភិបាលខេត្តមណ្ឌលគិរី បានឱ្យដឹងថា៖នៅក្នុងឆ្នាំ២០១៥នេះ សរុបទូទាំងខេត្តមណ្ឌលគិរី មានកន្លែងសេវាកំសាន្តចំនួន២៣កន្លែង មានស្ត្រីបំរើសេវាចំនួន៤៣៣នាក់ ហើយអ្នកដែលមកពិនិត្យធ្វើតេស្តឈាមមានចំនួន៥២៥នាក់ ស្រីចំនួន៣២៦នាក់ ពេលដែលពិនិត្យឈាមពុំឃើញមានអ្នកផ្ទុកមេរោគអេដស៍នោះទេ ចំណែកស្រី្តមានផ្ទៃពោះចំនួន ៣.៥៧៣នាក់ ពេលពិនិត្យឈាមទៅមានចំនួន១នាក់ដែល ផ្ទុកមេរោគអេដស៍ ហើយត្រូវបានទទួលថ្នាំបង្ការប្រឆាំងមេរោគអេដស៍ផងដែរ ។
នៅក្នុងឱកាសនោះដែរ លោក ចឹង សុចន្ថា អភិបាលរងខេត្ត បានមានប្រសាសន៍ថា៖ រាជរដ្ឋាភិបាលកម្ពុជា រួមនឹងថ្នាក់ដឹកនាំកំពូលៗកម្ពុជា ជាពិសេស សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន បានយកចិត្តទុកដាក់ ជាពិសេសដល់ការប្រយុទ្ធនឹងជម្ងឺអេដស៍ ការលុបបំបាត់ការរើសអាង និងការថែទាំអ្នកផ្ទុកមេរោគអេដស៍ ។ លោកអភិបាលរងខេត្តបានបន្តទៀតថា ការងារប្រយុទ្ធប្រឆាំងនឹងជម្ងឺអេដស៍កំពុងឈានដល់ដំណាក់កាល ឆ្ពោះទៅរកការការលុបបំបាត់ ការឆ្លងរាលដាលមេរោគអេដស៍ក្នុងរយះពេល៥ទៅ១០ឆ្នាំខាងមុខ៕
