(ខេត្តកំពត) ៖ នៅរសៀលថ្ងៃទី១១ ខែកក្កដា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានអញ្ជើញចូលរួមក្នុងពិធីប្រកាសចូលកាន់មុខតំណែងអភិបាលរងនៃគណៈអភិបាលខេត្តកំពត ចំនួន០២រូប ក្រោមអធិបតីភាព លោក លេង វី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
តាមអនុក្រឹត្យត្រូវបានតែងតាំងលោក សេង សិរីបុត្រ និងលោក ភូ លិ ជាអភិបាលរងនៃគណៈអភិបាលខេត្តកំពត។
មានមតិសំណេះសំណាលក្នុងឱកាសនោះលោក ជាវ តាយ អភិបាលខេត្តកំពត បានផ្តាំផ្ញើរដល់លោកអភិបាលរងខេត្តដែលទើបតែងតាំងថ្មីទាំងពីររូប ត្រូវខិតខំប្រឹងប្រែងអនុវត្តតួនាទី ភារកិច្ចរបស់ខ្លួនតាមរយៈបទពិសោធន៍របស់ខ្លួនពីមុនមក ដើម្បីបន្តចូលរួមក្នុងការងារដឹកនាំ គ្រប់គ្រង និងអភិវឌ្ឍន៍រដ្ឋបាលខេត្តរបស់យើងឲ្យកាន់តែរីកចម្រើន និងទទួលបានសមិទ្ធិផលថ្មីៗបន្ថែមទៀត ជាពិសេសត្រូវរក្សាសាមគ្គីភាពផ្ទៃក្នុងឲ្យបានល្អ។
សូមជម្រាបថា៖ ពិធីប្រកាសចូលកាន់មុខតំណែងអភិបាលរងខេត្តកំពតនាពេលនេះ មានសមាសភាពអញ្ជើញចូលរួម ពីសំណាក់លោក លោកស្រី រដ្ឋលេខាធិការ អនុរដ្ឋលេខាធិការក្រសួងមហាផ្ទៃ ប្រធានក្រុមប្រឹក្សាខេត្ត សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោកនាយករដ្ឋបាលសាលាខេត្ត នាយកទីចាត់ការ អង្គភាពចំណុះសាលាខេត្ត កងកំលាំងទាំង៣ប្រភេទ មន្ទីរអង្គភាពជុំវិញខេត្តសរុបប្រមាណ ២៥០នាក់។
ជាមួយគ្នានេះ បើយោងតាមអនុក្រិត្យស្តីពីការផ្ទេរភារកិច្ចនិងតែងតាំងមន្ត្រីរាជការ ក្នុងនោះត្រូវបានសម្រេចផ្ទេរភារកិច្ច លោក ជឹង ផល្លា និងលោក ស៊ឹម វុទ្ធា ពីអភិបាលរងខេត្តកំពតឲ្យទៅបម្រើការងារនៅទីស្តីការក្រសួងមហាផ្ទៃ និងសម្រេចតែងតាំងជំនួស ដោយលោក សេង សិរីបុត្រ និងលោក ភូ លិ ជាអភិបាលរងខេត្តកំពតវិញ៕ សេង ណារិទ្ធ
