(ខេត្តកំពត)៖ នៅរសៀលថ្ងៃចន្ទ ៧កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៨ ខែកក្កដា ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត និងលោក ជឹង ផល្លា ប្រធានក្រុមប្រឹក្សាខេត្ត បានអញ្ជើញចូលរួមក្នុងពិធីបិទវគ្គគរុសិស្សឆ្នាំទី២ ជំនាន់ទី៣៦ នៃសាលាគរុកោសល្យ និងវិក្រឹតការខេត្តកំពត នៅសាលសន្និសិទខេត្តកំពត ក្រោមអធិបតីភាព លោកបណ្ឌិត ប៉ែន ស៊ីម៉ន អ្នកតំណាងរាស្ត្រ មណ្ឌលកំពត និងជាប្រធានគណៈកម្មការទី១០ រដ្ឋសភា។
បានអញ្ជើញចូលរួមក្នុងពិធីនេះមាន លោក លោកស្រី សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រី ប្រធានមន្ទីរ-អង្គភាពជុំវិញខេត្ត នាយករដ្ឋបាលខេត្ត នាយកទីចាត់ការ ប្រធានអង្គភាពចំណុះសាលាខេត្ត គ្រូឧទ្ទេស គរុសិស្សជំនាន់ទី៣៤ ទី៣៥ ទី៣៦ ទី៣៧ មន្ត្រីមន្ទីរអប់រំ យុវជន និងកីឡាខេត្ត គ្រូចូលនិវត្តន៍ សរុបប្រមាណ ៣៣៥នាក់៕
ក្នុងពិធីនេះដែរ លោក បណ្ឌិត គណៈអធិបតី ក៏មានប្រសាសន៍ផ្តាំផ្ញើ និងដាស់តឿនដល់សិស្សានុសិស្សទាំងអស់ត្រូវខិតខំរៀនសូត្របន្តទៀត ជាពិសេសត្រូវជៀសឱ្យឆ្ងាយពីគ្រឿងញៀន ហើយក្នុងឱកាសនោះ លោកបណ្ឌិត ប៉ែន សីុម៉ន ក៏បានចែកជូនរង្វាន់ដល់សិស្សរៀនពូកែ ចំណាត់ថ្នាក់លេខ១-៣ ចំនួន ០៦នាក់ និងបានចែកជូនសញ្ញាបត្រដល់គរុសិស្សជំនាន់ទី៣៤ ផងដែរ៕ សេង ណារិទ្ធ
