ព្រះវិហារ៖ នៅថ្ងៃចន្ទ ១៤រោច ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១ ខែកក្កដា ឆ្នាំ២០១៩ លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ បានដឹកនាំកិច្ចប្រជុំដើម្បីបូកសរុប លទ្ធផលកិច្ចសហប្រត្តិការរបស់ស្នងការដ្ឋាននគរបាលខេត្តប្រចាំឆមាសទី១ និងលើកទិសដៅបន្តឆមាសទី២ ឆ្នាំ២០១៩ ដោយមានការចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរងទទួលផែនគ្រប់ផែន នាយ នាយរងការិយាងល័យ នាយផ្នែក លោកអធិការទាំង ៨ក្រុង/ស្រុក និងនាយប៉ុស្តិ៍នគរបាលរដ្ឋបាលទាំង ៥១ប៉ុស្តិ៍។
តាមរបាយការណ៍ឆមាសទី១ បានឱ្យដឹងថា បទល្មើសព្រហ្មទណ្ឌកើតឡើង៣១/២២ លើកកើនឡើង៩លើក ស្មើនឹង៤១% ក្នុងនោះបទឧក្រិដ្ឋ១៣/៥លើក កើន៨លើក ស្មើ ១៦០% និងបទមជ្ឈិម១៨/១៧លើក កើន១ស្មើ ៦% បណ្តាលឲ្យមនុស្សស្លាប់ ៤នាក់ របួស ៧នាក់ រងគ្រោះជាស្ត្រី ១០នាក់ បាត់ម៉ូតូ ៧គ្រឿង និងសម្ភារប្រើប្រាស់មួយចំនួន។
លទ្ធផលបង្ក្រាបក្មេងទំនើង ៨លើក ឃាត់មុខសញ្ញាបាន ៣១នាក់ បានធ្វើកិច្ចសន្យាអប់រំ និងបញ្ជួនឲ្យអាណាព្យាបាលអប់រំបន្ត,បង្ក្រាបល្បែងស៊ីសងបាន ៤លើក ឃាត់មុខសញ្ញា ១នាក់ ឲ្យធ្វើកិច្ចសន្យាអប់រំបញ្ឈប់ និងលទ្ធផលបង្ក្រាបគ្រឿងញៀនកើតឡើង ២៣លើក ឃាត់មុខសញ្ញាបាន ៦១នាក់ ស្រី ៧នាក់ ក្នុងនោះជនជាតិឡាវ ២នាក់ ប្រុស ព្រមទាំងដកហូតវត្ថុតាងរួមមាន មេតំហ្វេតាមីន ice ចំនួន ១,១៤២,៩០ក្រាម ម្សៅក្រាមពណ៍សថ្លាចំនួន ១០.៦ក្រាម និងម៉ូតូ ១៣គ្រឿង។
ចំពោះកិច្ចប្រតិបត្តិការសំខាន់ៗក្នុងឆមាសទី១ នេះរួមមាន ការល្បាតរក្សាសន្តិសុខសណ្តាប់ធ្នាប់នៅតាមមូលដ្ឋាន ភូមិ ឃុំ ដែលបានចាត់តាំងធ្វើទាំងពេលថ្ងៃ និងពេលយប់ ការងារបង្ការបង្ក្រាបបទល្មើសព្រហ្មទណ្ឌ,គ្រឿងញៀន និងការជួយសហការជួយសង្គ្រោះ ជនដែលងាយរងគ្រោះ។
មានប្រសាសន៍បូកសរុបអង្គប្រជុំ លោកឧត្តមសេនីយ៍ទោ ស្នងការ ក៏បានដាក់ចេញទិសដៅបន្ត ដោយផ្តោតសំខាន់ការងាររក្សាសន្តិសុខ សណ្តាប់ធ្នាប់ ការបង្ការបង្ក្រាប បទល្មើសព្រហ្មទណ្ឌ គ្រឿងញៀន និងការរក្សាសន្តិសុខ សណ្តាប់ធ្នាប់គ្រប់មូលដ្ឋានអោយបានល្អប្រសើរជាបន្តទៀត។
ហើយជាចុងក្រោយលោកឧត្តមសេនីយ៍ទោ ស្នងការបាន ធ្វើពិធីចែកអាវុធម៉ាក AK៤៧ ដល់ការិយាល័យជំនាញដែលចំណុះអោយស្នងការដ្ឋាននគរបាលខេត្ត និងអធិការដ្ឋាននគរបាលទាំង ៨ក្រុង/ស្រុកចំនួន ២៣២ដើម,ប៉ង់ចំនួន ៤៦៤ប៉ង់ និងគ្រាប់AK47 ចំនួន ១៣,៩២០គ្រាប់ ៕
