ខេត្តកំពត ៖ ប្រភពពីប្រជាពលរដ្ឋក្នុងភូមិត្រពាំងកក់ ឃុំស្ទឹងកែវ ស្រុកទឹកឈូ ខេត្តកំពត បានឲ្យដឹងថា បច្ចុប្បន្នក្នុងមូលដ្ឋានពួកគាត់មានមន្ត្រីនគរបាលម្នាក់ឈ្មោះ ប្រុស បើកសង្វៀនបញ្ជល់មាន់និងល្បែងអាប៉ោងយ៉ាងពេញបន្ទុក ហើយមន្ត្រីអាជ្ញាធរនិងសមត្ថកិច្ចមូលដ្ឋានមិនចាត់វិធានការបង្ក្រាបឡើយ។
ប្រជាពលរដ្ឋបានរិះគន់ថាមេឃុំស្ទឹងកែវ ក៏ដូចជានាយប៉ុស្ដិ៍នគរបាលរដ្ឋបាលឃុំស្ទឹងកែវ ព្រមទាំងអភិបាលស្រុកទឹកឈូ និងអធិការនគរបាលស្រុកទឹកឈូ មិនយកចិត្តទុកដាក់បង្ក្រាបល្បែងស៊ីសងដើម្បីពង្រឹងសន្តិសុខសង្គមឲ្យស្របទៅតាមគោលនយោបាយភូមិ-ឃុំ មានសុវត្ថិភាពទាំង៩ចំណុចនោះទេ។ ដូច្នេះហើយទើបប្រជាពលរដ្ឋអំពាវនាវឲ្យលោក ជាវ តាយ អភិបាលខេត្តកំពត និងលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បង្ក្រាបល្បែងស៊ីសងក្នុងឃុំស្ទឹងកែវ ស្រុកទឹកឈូ ជាបន្ទាន់។
សេចក្ដីរាយការណ៍ពីប្រជាពលរដ្ឋក្នុងភូមិត្រពាំងកក់ ឃុំស្ទឹងកែវ បានឲ្យដឹងថា មន្ត្រីនគរបាលម្នាក់ឈ្មោះ ប្រុស បានបើកសង្វៀនបញ្ជល់មាន់និងវង់អាប៉ោងក្នុងដីឡូត៍មួយកន្លែង ហើយមានអ្នកចូលលេងយ៉ាងគគ្រឹកគគ្រេងជាយូរមកហើយមិនដែលមានសមត្ថកិច្ចថ្នាក់ខេត្ត ចាត់វិធានការបង្ក្រាបទាល់តែសោះ។
ប្រជាពលរដ្ឋបានរាយការណ៍ថា នៅក្នុងទីតាំងសង្វៀនបញ្ជល់មាន់និងវង់អាប៉ោងនោះមានអ្នកកាងឈ្មោះ វ៉ាន់ ហើយឈ្មោះ វ៉ាន់ នោះជាសាច់ញាតិមន្ត្រីមានឥទ្ធិពលក្នុងស្រុកទឹកឈូ ទើបហ៊ានធ្វើអ្វីៗស្រេចតែអំពើចិត្ត។ ទន្ទឹមនឹងនេះឈ្មោះ វ៉ាន់ ជាអ្នកកាងសង្វៀនបញ្ជល់មាន់ និងវង់អាប៉ោង ក្នុងភូមិត្រពាំងកក់ បានអួតអាងប្រាប់អតិថិជនរបស់ខ្លួនថា ខ្លួនបានរត់ការបង់លុយឲ្យសមត្ថកិច្ចពាក់ព័ន្ធរួចរាល់អស់ហើយ ទើបអ្វីៗអាចប្រព្រឹត្តទៅដោយរលូន។
បើតាមប្រភពខ្លះបានឲ្យដឹងថា មេប៉ុស្ដិ៍នគរបាលរដ្ឋបាលឃុំស្ទឹងកែវ ក៏ដូចជាអធិការនគរបាលស្រុកទឹកឈូ បានចាត់ទុកសង្វៀនបញ្ជល់មាន់និងវង់អាប៉ោងរបស់ឈ្មោះ ប្រុស ជាប្រភពចំណូលរបស់ខ្លួនទើបមិនចាត់វិធានការបង្ក្រាប។ បញ្ហានេះគឺជារឿងដែលលោក ជាវ តាយ អភិបាលខេត្តកំពត និងលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត មិនគួរមើលរំលងតទៅទៀតទេ ព្រោះឈ្មោះ ប្រុស ជាមន្ត្រីនគរបាល បែរជាបើកល្បែងស៊ីសងខុសច្បាប់ធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។ ប្រជាពលរដ្ឋក្នុងឃុំស្ទឹងកែវ បានឲ្យដឹងថា ចាប់តាំងពីឈ្មោះ ប្រុស បើកសង្វៀនបញ្ជល់មាន់និងវង់អាប៉ោងនៅភូមិត្រពាំងកក់ ហើយមានឈ្មោះ វ៉ាន់ ជាអ្នកកាងគឺអំពើចោរកម្ម និងបទល្មើសផ្សេងៗកើតឡើងយ៉ាងរាលដាលក្នុងមូលដ្ឋានរបស់ពួកគាត់។ ចំណែកមេឃុំស្ទឹងកែវ មេប៉ុស្ដិ៍នគរបាលរដ្ឋបាលឃុំស្ទឹងកែវ ក៏ដូចជាអធិការនគរបាលស្រុកទឹកឈូ កំពុងសម្ងំទទួលផលប្រយោជន៍ដោយមិនខ្វល់ពីការរិះគន់អ្វីទាំងអស់៕
