(ខេត្តកំពត)៖ នៅព្រឹកថ្ងៃព្រហស្បតិ៍ ១២រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣០ ខែឧសភា ឆ្នាំ២០១៩ នៅនៅស្នាក់ការគណបក្សប្រជាជនកម្ពុជាខេត្តកំពត លោក ជាវ តាយ អភិបាលនៃគណៈអភិបាលខេត្ត និងជាប្រធានគណៈចលនាមហាជននៃគណបក្សខេត្ត បានអញ្ជើញ ដឹកនាំកិច្ចប្រជុំត្រៀមលក្ខណៈទទួលបដិសណ្ឋារកិច្ច លោក ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា និងជាប្រធានសហភាពសហព័ន្ធយុវជនកម្ពុជា។
អញ្ជើញចូលរួមក្នុងពិធីនេះរួមមាន៖ លោក លោកស្រី ជាសមាជិក សមាជិកា គណៈចលនាមហាជន លោក លោកស្រីប្រធាន អនុប្រធានមន្ទីរអង្គភាពជុំវិញខេត្ត នាយក នាយករងរដ្ឋបាលខេត្ត នាយក នាយករងទីចាត់ការ ប្រធាន អនុប្រធានអង្គភាព ចំណុះសាលាខេត្ត សរុប ៣៥នាក់។
ក្នុងកិច្ចប្រជុំ លោក ជាវ តាយ ក៏បានជំរុញដល់ថ្នាក់ដឹកនាំស្ថាប័ន មន្ទីរអង្គភាពទាំងអស់ក្នុងខេត្ត ត្រូវត្រៀមលក្ខណៈជាស្រេចដើម្បីរៀបចំទទួលបដិសណ្ឋារកិច្ច និងស្វាគមន៍ដល់ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលបានអញ្ជើញមកទឹកដីខេត្តកំពតនាពេលខាងមុខនេះ៕ សេង ណារិទ្ធ
