(ខេត្តកំពត)៖ នៅព្រឹកថ្ងៃទី៣០ ខែ ឧសភា ឆ្នាំ២០១៩ នៅសាលាខេត្តកំពត លោក ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈអភិបាលខេត្តប្រចាំខែ ឧសភា ឆ្នាំ២០១៩។
កិច្ចប្រជុំនាព្រឹកនេះមានការអញ្ជេីញចូលរួមពី លោក លោកស្រីអភិបាលរងខេត្ត លោកនាយក នាយករងរដ្ឋបាលខេត្ត លោក លោកស្រីប្រធានមន្ទីរអង្គភាពជំនាញជុំវិញខេត្ត លោក លោកស្រីនាយកទីចាត់ការ អង្គភាពចំណុះសាលាខេត្ត លោក លោកស្រី អភិបាលក្រុង ស្រុក និងប្រធានទីស្នាក់ការច្រកទ្វារ សរុបចំនួន ៧២នាក់ ។
កិច្ចប្រជុំប្រព្រឹត្តទៅតាមរបៀបវារៈសំខាន់ៗរួមមាន៖
១/-ពិនិត្យលើសេចក្តីព្រាងរបាយការណ៍ប្រចាំខែឧសភា ឆ្នាំ២០១៩ ស្តីពីការអនុវត្តការងាររបស់រដ្ឋបាលខេត្ត
២/-ពិនិត្យលើនិងពិភាក្សាលើប្រតិទិនកិច្ចប្រជុំគណអភិបាលខេត្តរយៈពេល១២ខែ
៣/-ពិនិត្យ ពិភាក្សាលើការបែងចែកប្រាក់រង្វាន់លើកទឹកចិត្តជូនមន្ត្រីរាជការ ខែមេសា ឆ្នាំ២០១៩
៤/-ផ្សព្វផ្សាយអនុក្រឹត្យលេខ ៨៥ អនក្រ.តត ស្តីពីការតែងតាំងមន្ត្រីរាជការ។
ក្នុងកិច្ចប្រជុុព្រឹកនេះ លោក ជាវ តាយ អភិបាល នៃគណ:អភិបាលខេត្តកំពត បានជំរុញដល់គ្រប់មន្ទីរ ស្ថាប័នក្នុងខេត្តកំពតទាំងអស់ ត្រូវពង្រឹងការងារអនាម័យ សម្អាតបរិស្ថានៅតាមទីសាធារណ:នានា ពិសេសការកែប្រែសោភ័ណភាពនៅតាមមន្ទីរអង្គភាពដើម្បីរៀបចំបុណ្យសមុទ្រដែលនឹងត្រូវប្រព្រឹត្តទៅនៅចុងឆ្នាំ២០១៩ខាងមុខនេះ។
លោកអភិបាលខេត្តក៏បានលើកឡើងទៀតថា អំឡុងពេលឆ្នាំ២០២០ខាងមុខខេត្តត្រូវមានគម្រោងរៀបចំព្រឹត្តិការណ៍បន្តបន្ទាប់ជាច្រើន ហើយសុទ្ធតែពិធីធំៗថ្នាក់ជាតិ ទើបរដ្ឋបាលខេត្តត្រូវតែជំរុញឱ្យស្ថាប័នគ្រប់ជំនាញត្រូវតែចាប់ផ្តើមអនុវត្តការងារចាប់ពីពេលនេះទៅ ដោយមិនអាចពន្យាពេលបានឡើយ។
ជាមួយគ្នានេះ លោកអភិបាលខេត្តក៏បានជំរុញដល់លោកអភិបាលក្រុងកំពត ត្រូវផ្សព្វផ្សាយដល់ប្រជាពលរដ្ឋឱ្យតាក់តែងលំនៅដ្ឋានឱ្យបានស្អាតបាត ពិសេសកែប្រែសោភ័ណភាពនៅតាមដងផ្លូវសាធារណ:និងរៀបចំប្រព័ន្ធលូឱ្យបានត្រឹមត្រូវផងដែរ៕ សេង ណារិទ្ធ
