មណ្ឌលគិរី ៖ ថ្លែងក្នុងពីធីខួបអនុស្សាវរីយ៍លើកទី ១២ នៃទិវាអតីតយុទ្ធជនកម្ពុជា ( ២១ មិថុនា ២០០៧-២១ មិថុនា ២០១៩)ដែលបានរៀបចំឡើងនៅសាលប្រជុំមន្ទីរសង្គមកិច្ច ដោយមានអញ្ជើញចូលរួមពីសំណាក់ លោក សាន គឹមអឿន ប្រធានគណៈកម្មាធិការសមាគម ព្រមទាំងលោក លោកស្រី ប្រធានមន្ទីរអង្គភាពជុំវិញខេត្ត និងអតីតយុទ្ធជនជាង ១២០នាក់ នាព្រឹកថ្ងៃទី៣១ ខែឧសភា ឆ្នាំ២០១៩។
ឯកឧត្តម ស្វាយ សំអ៊ាង អភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្ត បានមានប្រសាសន៍ថា ការរៀបចំទិវានេះឡើង គឺបានបង្កលក្ខណៈដល់អតីតយុទ្ធជន ឲ្យមានឱកាសបានចូលរួម ដែលជាសក្ខីភាពឆ្លុះបញ្ចាំងឲ្យឃើញនូវការគោរព ស្រឡាញ់ និងស្មារតីយកចិត្តទុកដាក់ខ្ពស់ចំពោះ អតីត យុទ្ធជន និងគ្រួសារអតីតយុទ្ធជន។ ឯកឧត្តម អភិបាលខេត្ត បានបញ្ជាក់បន្ថែមថា អតីតយុទ្ធជន គឺជាជន ដែលមានគុណបំណាច់ ចំពោះជាតិមាតុភូមិ ជានិមិត្តរូប នៃស្មារតីលះបង់ ពលីកម្ម ដើម្បីជាតិ និងជាអ្នកស្នេហាជាតិពិតប្រាកដដោយសកម្មភាពជាក់ស្តែងរបស់ខ្លួន ។ ជាមួយគ្នានេះដែរ ឯកឧត្តម បានលើកឡើងនូវ ការងារមួយចំនួន ដើម្បីបន្តអភិវឌ្ឍន៍វិស័យអតីតយុទ្ធជនរួមមាន៖ ទី១. អតីតយុទ្ធជនទាំងអស់ ត្រូវប្រកាន់ខ្ជាប់នូវវីរៈភាពអង់អាចក្លាហាន ហើយត្រូវបន្តរក្សាស្មារតីវីរៈភាពដ៏ថ្លៃថ្លានេះជាប់ជានិច្ច ដើម្បីជាគំរូដ៏ល្អ សម្រាប់សង្គមជាតិ ទី២ គ្រប់ក្រសួងស្ថាប័ន អង្គភាព និងអាជ្ញាធរដែនដីគ្រប់លំដាក់ថ្នាក់ ត្រូវរៀបចំគណៈប្រតិភូចុះសួរសុខទុក្ខអតីតយុទ្ធជន តាមមូលដ្ឋាន ទី៣ ក្រសួងព័ត៌មានត្រូវណែនាំប្រព័ន្ធឃោសនារបស់រដ្ឋ ឯកជន ជួយផ្សព្វផ្សាយសារាចរណ៍លើលិខិតនានា របស់រាជរដ្ឋាភិបាល ក្នុងឱកាសខួបលើកទី១២ ទិវាអតីតយុទ្ធជនកម្ពុជា ក៏ដូចជាសមិទ្ធផលនានាដែលពាក់ព័ន្ធនឹងវិស័យអតីតយុទ្ធជន ឲ្យបានដល់សាធារណជាតិ អន្តរជាតិ បានយល់ដឹងអំពីការងារអតីតយុទ្ធជន ទី៤ ក្រសួងសង្គមកិច្ច អតីតយុទ្ធជន និងយុវនិតិសម្បទា ត្រូវបន្តអនុវត្តឲ្យបានល្អ និងមានប្រសិទ្ធភាព នូវការផ្តល់សេវាសន្តិសុខសង្គម សម្រាប់អតីតយុទ្ធជន តាមរយះបេឡាជាតិអតីតយុទ្ធជននៅទូទាំងប្រទេស ទី៥ ក្រសួងស្ថាប័នពាក់ព័ន្ធ ត្រូវបន្តសហការណ៍គ្នា ជម្រុញអនុវត្តគោលនយោបាយ ស្តីពីការផ្តល់ដីសម្បទានសង្គមកិច្ចជូនអតីត កងកម្លាំងប្រដាប់អាវុធ ឲ្យកាន់តែមានប្រសិទ្ធភាពថែមទៀត ទី៦ ក្រសួងស្ថាប័នពាក់ព័ន្ធ អាជ្ញាធរដែនដី កងកម្លាំងប្រដាប់អាវុធ ត្រូវចូលរួមក្នុងការឧបត្ថម្ភគាំទ្រ ដល់អតីតយុទ្ធជន និងគោលការណ៍អតីតយុទ្ធជនដែលកំពុងជួបប្រទះការលំបាក ទី៧ សមាគមអតីតយុទ្ធជនកម្ពុជា ត្រូវបន្តធ្វើជាស្នូលក្នុងការលើកកម្ពស់តួនាទី អតីតយុទ្ធជននៅក្នុងសង្គម និងលើកទឹកចិត្ត បងប្អូនអតីតយុទ្ធជនឲ្យប្រកាន់ខ្ជាប់នូវសាមគ្គីភាព។
តាមការបញ្ជាក់ពីប្រធានមន្ទីរសង្គមកិច្ចអតីតយុទ្ធជន និងយុវនីតិសម្បទាខេត្តមណ្ឌលគិរី លោក ខឹម សុផុន បានឲ្យដឹងថា ចំពោះអតីតយុទ្ធជនកម្ពុជាខេត្តមណ្ឌលគិរី បច្ចុប្បន្ននេះមានចំនួន ២៩៨នាក់និងបន្ទុក៤៣៧នាក់ មានប្រពន្ធ២៥៣នាក់ កូន១៥៧នាក់ ឳពុក១២នាក់ ម្តាយ១៤នាក់ និងអ្នកបម្រើ ១នាក់កំពុងទទួលបានរបបគោលនយោបាយពីរដ្ឋ។ លោកបន្ថែមថា ចំពោះអតីតយុទ្ធជនមកពីក្រុងស្រុកចំនួនបី មានចំនួន១២០នាក់ បានចូលរួម ដោយក្នុងម្នាក់ៗទទួលបានថវិការ៤ម៉ឺនរៀល ក្នុងនោះឯកឧត្តម អភិបាលខេត្ត បានចូលរួមឧបត្ថម្ភថវិកា បន្ថែមក្នុងម្នាក់ៗ២ម៉ឺនរៀលផងដែរ ៕
