កំពង់ឆ្នាំង៖ ឯកឧត្តម កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង បានជំរុញ អោយមន្ត្រីជំនាញទាំងអស់ត្រូវបង្កើនប្រសិទ្ធភាព ក្នុងការផ្តល់សេវាសាធារណៈជូនប្រជាពលរដ្ឋឱ្យមានតម្លាភាព និងទាន់ពេលវេលាលើវិស័យសាធារណៈការនិងដឹកជញ្ជូន ដែលវិស័យមួយនេះកំពុងតែទទួលបានការគាំទ្រពីប្រជាពលរដ្ឋក្នុងពេលដែលមកទទួលសេវាសាធារណៈនៅមន្ទីរសាធារណការនិងដឹកជញ្ជូនរាជធានីខេត្តនៅទូទាំងប្រទេស។ លោកបានថ្លែងដូចនេះនៅក្នុងកិច្ចប្រជុំបូកសរុបលទ្ធផលការងារខែឧសភា ឆ្នាំ២០១៩ និងលើកទិសដៅអនុវត្តការងារបន្តរបស់មន្ទីរសាធារណការ និងដឹកជញ្ជូនខេត្តកំពង់ឆ្នាំងនាព្រឹក ថ្ងៃទី២៨ ខែឧសភា ឆ្នាំ២០១៩ នៅសាលប្រជុំមន្ទីរសាធារណការខេត្តកំពង់ឆ្នាំង។
ឯកឧត្តម កែវ ពៅ ក៏បានបញ្ជាក់ទៀតថា បច្ចុប្បន្នមន្ទីរសាធារណការ និងដឹកជញ្ជូនខេត្តកំពង់ឆ្នាំងគឺបានផ្តល់សេវាប្រកបដោយតម្លាភាព មិនលម្អៀង គ្មានការរើសអើង ចំពោះសេវាសាធារណៈ នៅមន្ទីរសាធារណការនិងដឹកជញ្ជូនខេត្ត ការត្រួតពិនិត្យលក្ខណៈបច្ចេកទេយានយន្ត ការផ្តល់ស្លាកលេខយានយន្ត ប្រឡងយកប័ណ្ណបើកបរ ការផ្ទេរកម្មសិទ្ធ និងមានវិស័យជាច្រើនទៀត ដែលកំពុងប្រតិបត្តិការនៅក្នុងអង្គភាពរបស់មន្ទីរសាធារណការនិងដឹកជញ្ជូន។
ពាក់ព័ន្ធនឹងហេដ្ឋារចនាសម្ព័ន្ធ ស្ពានផ្លូវថ្នល់វិញ ឯកឧត្តម កែវ ពៅ បានគូសបញ្ជាក់ថា កន្លងមកនេះ មន្ត្រីជំនាញនៃមន្ទីរសាធារណការខេត្ត បានខិតខំបំពេញបេសកកម្មយ៉ាងយកចិត្តទុកដាក់ ក្នុងការធ្វើអោយប្រសើរឡើងលើវិស័យផ្លូវថ្នល់ ទាំងការជួសជុល ការសាងសង់ ធ្វើយ៉ាងណាពង្រឹងគុណភាពជាចំបងដើម្បីធានាអោយបាននូវការប្រើប្រាស់ធនមាំ។ លោកក៏បានផ្តាំផ្ញើដល់មន្ត្រីជំនាញត្រូវចុះធ្វើការផ្សព្វផ្សាយតាមគ្រប់រូបភាពស្តីពីច្បាប់ចរាចរណ៍ដល់គ្រប់មូលដ្ឋាននានាក្នុងខេត្តកំពង់ឆ្នាំងអោយប្រជាពលរដ្ឋបានយល់និងចូលរួមគោរពច្បាប់ចរាចរណ៍ដើម្បីកាត់បន្ថយនូវអត្រាគ្រោះថ្នាក់ចរាចរណ៍អោយនៅកម្រិតទាបបំផុតក្នុងឆ្នាំ២០១៩នេះ៕
