(ខេត្តកំពត)៖ បន្ទាប់ពីសារព័ត៌មានក្នុងស្រុកចុះផ្សាយរិះគន់ពីករណីបោះបង្គោលចូលក្នុងទឹកសមុទ្រមកនោះ លោក ជាវ តាយ អភិបាល នៃគណៈអភិបាលខេត្តកំពត បានបញ្ជាក់ថា តាមពិតដីសមុទ្រនៅតំបន់ភ្នំដូង ភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពត ដែលគេបោះបង្គោលចូលក្នុងសមុទ្រ គឺសុទ្ធតែមានច្បាប់ទម្លាប់អស់ហើយ។
ការអះអាងបែបនេះ ជាការលើកឡើងរបស់លោក ជាវ តាយ នៅក្នុងសន្និសីទសារព័ត៌ កាលពីថ្ងៃទី២៧ ខែឧសភា ឆ្នាំ២០១៩ ក្នុងសាលប្រជុំសាលាខេត្តកំពត ដែលមានក្រុមមន្ត្រីជំនាញ ព្រមទាំងក្រុមអ្នកសារព័ត៌មានជាច្រើនអង្គភាព។
លោកអភិបាលខេត្តបានបញ្ជាក់យ៉ាងដូច្នោះថា តាមការពិនិត្យជាក់ស្តែងជាលទ្ធផលគឺទីតាំងបោះបង្គោលនោះមានម្ចាស់កម្មសិទ្ធិស្របច្បាប់ដែលមានម្ចាស់កម្មសិទ្ធិចំនួន១២គ្រួសារ។
ជាមួយគ្នានេះ លោកទើបតែមកកាន់តំណែងក្នុងខេត្តកំពតបានប្រមាណជាងមួយឆ្នាំប៉ុណ្ណោះ ហើយករណីមុនៗលោកមិនសូវដឹងច្បាស់ឡើយ ប៉ុន្តែបន្ទាប់ពីមានបាតុភាពរឿងបោះបង្គោលចូលក្នុងសមុទ្រត្រង់ចំណុចភ្នំដូងនេះភ្លាម លោកក៏បានឲ្យអាជ្ញាធរ និងមន្ត្រីជំនាញចុះស្រាវជ្រាវផ្ទាល់នៅលើទីតាំជាក់ស្តែង។
លោក ជាវ តាយ បានបញ្ជាក់ថា បើយោងតាមឯកសារពាក់ព័ន្ធរបស់អាជ្ញាធរមូលដ្ឋាននិងជំនាញបានបញ្ជាក់ថា ដីនេះស្ថិតនៅខាងកើតភ្នំដូង ភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពត។ចំពោះស្ថានភាពដីនេះ កាលពីមុននិងបច្ចុប្បន្នមានលក្ខណៈខុសគ្នា គឺដីនេះជាដីអ៊ូរចញ្ចឹមបង្គា និងក្តាម ដែលមានពលរដ្ឋ១២គ្រួសារជាអ្នកកាន់កាប់ និងអាស្រ័យផល ហើយដីនេះមានផ្ទៃដីសរុបស្មើនឹង ៤៥,៦១៤ហិកតា។រហូតដល់ឆ្នាំ២០០៨ ប្រជាពលរដ្ឋបានដាក់ពាក្យស្នើសុំប័ណ្ណកម្មសិទ្ធិកាន់កាប់ស្របច្បាប់ជូនទៅប្រមុខរាជរដ្ឋាភិបាលតាមរយៈលោកអភិបាលខេត្តកំពត។
លោកអភិបាលខេត្តបានបញ្ជាក់ទៀតថា បន្ទាប់ពីមានការសម្រេចពីរាជរដ្ឋាភិបាល ទើបអាជ្ញាធរបានធ្វើប័ណ្ណទាំង១២ជូនគាត់ប្រើប្រាស់ដោយស្របច្បាប់ ថែមទាំងយល់ព្រមឲ្យកែប្រែប្រភេទដីចំណុចនេះទៅជាតំបន់ទេសចរណ៍ធម្មជាតិ ឬទេសចរណ៍កែច្នៃ ដែលឯកសារដីពាក់ព័ន្ធដីកម្មសិទ្ធិរបស់ប្រជាពលរដ្ឋនេះត្រូវបានរដ្ឋបាលខេត្តបង្ហាញអ្នកសារព័ត៌មានតាមរយៈបញ្ចាំងស្លាយផងដែរ។
លោក ជាវ តាយ បានបញ្ជាក់ទៀតថា រយៈពេលកន្លងមក តែងមានការលេចឮ និងការលកឡើងតាមរយៈប្រព័ន្ធផ្សព្វផ្សាយមួយចំនួន ដែលពុំមានភាពច្បាស់លាស់វាយប្រហារមកលើរដ្ឋបាលខេត្ត ពាក់ព័ន្ធនឹងការបោះបង្គោលចូលក្នុងសមុទ្រនេះ។
លោកបានបន្តថា រដ្ឋបាលខេត្តមិនមានបំណងណាមួយឃុបឃិតដើម្បីលក់ដីទៅឲ្យបុគ្គលណាម្នាក់នោះទេ គឺរដ្ឋបាលខេត្តជាតំណាង ឬជាសេនាធិការឲ្យរាជរដ្ឋាភិបាល ហើយអនុវត្តអ្វីក៏ត្រូវផ្អែកលើឯកសារគតិយុតិ្ត ដែលមានចែង និងអនុញ្ញាតរបស់រាជរដ្ឋាភិបាល ដោយមិនអាចធ្វើអ្វីទៅតាមចិត្តចង់ ឬការនឹកឃើញឡើយ៕
សេង ណារិទ្ធ
