(ខេត្តកំពត)៖ នៅរលៀលថ្ងៃទី២៣ ខែឧសភាឆ្នាំ២០១៩ លោក ជាវ តាយអភិបាល នៃគណៈអភិបាលខេត្តអមដំណើរដោយអាជ្ញាធរមូលដ្ឋានក្រុង សង្កាត់ បានអញ្ជើញចុះពិនិត្យគម្រោង ការសាងសង់ផ្លូវបេតុងចំនួនពីរខ្សែដែលស្ថិតនៅសង្កាត់ក្រាំងអំពិលនិងសង្កាត់កំពង់បាយ ក្រុងកំពត ខេត្តកំពត។
ផ្លូវទាំងពីរខ្សែនេះគឺទី១-ឈ្មោះផ្លូវលានស្រូវមានប្រវែង២០០០ម៉ែត្រមានទទឹង៩ម៉ែត្រអមលូសងខាងផ្លូវមានមុខកាត់០,៨ម៉ែត្រដែលតបំបែកចេញពីផ្លូវជាតិលេខ៣ទៅខាងកើតក្រុងកំពតក្នុងនោះមានប្រវែង១០០០ម៉ែត្រឆ្លងកាត់នៅក្នុងសង្កាត់ក្រាំងអំពិល ក្រុងកំពតនិង១០០០ម៉ែត្រទៀតឆ្លងកាត់ក្នុងឃុំត្រពាំងធំ ស្រុកទឹកឈូ ដែលត្រូវតភ្ជាប់ទៅនឹងផ្លូវវាងក្រុងកំពត។
ចំណែកឯផ្លូវទី២គឺជាផ្លូវមានការសម្របសម្រួកផលប៉ះពាល់ដ៏រ៉ាំរ៉ៃជាមួយប្រជាពលរដ្ឋក្នុងភូមិកំពង់បាយខាងជើងសង្កាត់កំពង់បាយ តបំបែកចេញពីផ្លូវជាតិលេខ៣ទៅផ្លូវត្រពាំងព្រលឹតមានប្រែង៥៤០ម៉ែត្រ ទទឹងផ្លូវមួយចំណែកទំហំ១០ម៉ែត្រនិងមួយចំណែកធំទៀតមានទំហំ២០ម៉ែត្រដែលផ្លូវទាំងពីរខ្សែនេះប្រើប្រាស់ថវិការបស់រដ្ឋបាលខេត្ត។
លោក ជាវ តាយ អភិបាលខេត្ត បានបញ្ជាក់ថា៖បញ្ហាប្រព័ន្ធផ្លូវ លូទឹកក៏ដូចជាហេដ្ឋារេចនាសម្ព័ន្ធផ្សេងៗទៀតមិនថាក្នុងក្រុងឬស្រុកដ៏ទៃទៀតឡើយគឺជាបញ្ហាការគិតគូរជាចាំបាច់និងជាប្រចាំរបស់រាជរដ្ឋាភិបាលក៏ដូចរដ្ឋបាលខេត្តនិងក្រុង ស្រុក ឃុំសង្កាត់កន្លងមក។ ព្រោះបើមានហេដ្ឋារេចនាសម្ព័ន្ធល្អសម្បូរបែបវាអាចផ្ដល់នូវភាពងាយស្រួលសព្វបែបយ៉ាងក្នុងការបម្រើដល់ជីវភាពរស់នៅនិងការចរាចរណ៍រប្រជាពលរដ្ឋ ដោយមើលឃើញពីភាពចាំបាច់នេះឬការប៉ះពាល់ដល់ការរស់នៅរបស់ប្រជាពលរដ្ឋ។
លោក ជាវ តាយ អភិបាលខេត្ត បានសំណូមពរឲ្យអាជ្ញធរ ក្រុង សង្កាត់និងប្រជាពលរដ្ឋរួមនិងអ្នកម៉ៅការសាងសង់ត្រូវរួមសហការគ្នា សម្របសម្រួលឲ្យបានល្អដើម្បីធ្វើយ៉ាងណាឲ្យដំណើរការសាងសង់នេះប្រព្រឹត្តទៅដោយរលូនឆាប់រហ័សនិងតាមលក្ខណៈបទដ្ឋានបច្ចេកទេសត្រឹមត្រូវដើម្បីបម្រើឲ្យការប្រើប្រាស់បានយូរអង្វែង។
ជាមួយឱកាសនោះ លោក ជាវ តាយអភិបាលខេត្តក៏បានណែនាំជម្រុញឲ្យអាជ្ញាធរមូលដ្ឋានក្រុងសង្កាត់ត្រូវតែយកចិត្តទុកដាក់ជាចាំបាច់ក្នុងការតាមដានត្រួតពិនិត្យប្រព័ន្ធលូទឹកផ្លូវនិងបញ្ហាអនាម័យបរិស្ថានក្រុងដោយទុកដាក់ប្រមូលសម្រាមនិងពង្រីកសេវាកម្មក្រុមហ៊ុនប្រមូលសម្រាមជាពិសេសផ្សព្វផ្សាយឲ្យប្រជាពលរដ្ឋយល់ដឹងនិងចូលរួមទើបការអភិវឌ្ឍទទួលបានលទ្ធផលជោគជ័យ៕ សេង ណារិទ្ធ
