ប៉ៃលិន ៖ ថ្ងៃសុក្រ ៦រោច ខែពិសាខ ឆ្នាំកុរ ឯកស័ក ព.ស.២០១៩ ត្រូវនឹងថ្ងៃទី២៤ ខែឧសភា ឆ្នាំ២០១៩ ពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សាខេត្ត ក្រុង/ស្រុក អាណត្តិទី៣ ឆ្នាំ២០១៩ ស្ថិតក្រោមអធិបតីភាព ឯកឧត្តម នាយឧត្តមសេនីយ៍ អុី ឈាន សមាជិកគណៈកម្មាធិការកណ្តាល និងជាប្រធាន ក្រុមការងាររបស់ថ្នាក់កណ្តាលចុះជួយខេត្តប៉ៃលិនកាលពីថ្ងៃទី២៤ ខែឧសភា គណបក្សនយោបាយនានាបានបិទយុទ្ធនាការឃោសនាបោះឆ្នោត ក្រុមប្រឹក្សា ក្រុង-ស្រុក រាជធានី-ខេត្ត។
ឯកឧត្តម នាយឧត្តមសេនីយ៍ អុី ឈាន បានអំពាវនាវឲ្យអាជ្ញាធរ កងកម្លាំងត្រូវត្រៀមអនុវត្តបទបញ្ជាថ្នាក់លើ ពោលគឺបង្ការ ទប់ស្កាត់ និងបង្ក្រាប បើកើតមាននូវហេតុការណ៍ ណាមួយបង្កដោយក្រុមណាមួយដែលមានគំនិតប៉ុនប៉ងរារាំងមិនចង់ឱ្យដំណើរការបោះឆ្នោត។
លោកបានកោតសរសើរនិងស្នើឲ្យក្រុមការងារចុះជួយ និងគណបក្សមូលដ្ឋានទាំងអស់ប្រធាន ពោលគឺគណបក្សគ្រប់ផ្នែក អាជ្ញាធរដែនដី សមត្ថកិច្ចគ្រប់ថ្នាក់កងកម្លាំងប្រដាប់អាវុធ យោធា នគរបាល កងរាជអាវុធហត្ថ ប្រជាពលរដ្ឋដែលរក្សាបាននូវស្មារតីសាមគ្គីភាព ឯកភាពផ្ទៃក្នុង ចូលរួមថែរក្សាបាននូវសុខសន្តិភាព សណ្តាប់ធ្នាប់សង្គម ទប់ស្កាត់បាននូវការប៉ុនប៉ងធ្វេីបដិវត្តពណ៌ ផ្តួលរំលំរដ្ឋាភិបាលស្របច្បាប់ដឹកនាំសម្តេចតេជោ ហ៊ុន សែន ពីសំណាក់ពួកអគតិ-អមិត្ត និងបានចូលរួមធ្វេីការងារមនុស្សធម៌ជួយប្រជាពលរដ្ឋដែលទទួលរងគ្រោះធម្មជាតិពិសេសខ្យល់កន្ត្រាក់ និងគ្រោះថ្នាក់នានា។
លោកបានសូមឲ្យមន្ត្រី និងសមាជិកទាំងអស់រួមគ្នាឆ្ពោះទៅដណ្តើមជ័យជំនះ ពោលគឺសូមអង្គបោះឆ្នោតទាំងអស់បោះឆ្នោតជូនគណបក្សប្រជាជនកម្ពុជា ក្នុងការបោះឆ្នោតជ្រើសតាំងក្រុមប្រឹក្សា រាជធានី-ខេត្ត ក្រុង-ស្រុក-ខណ្ឌ អាណត្តិទី៣ នៅថ្ងៃទី២៦ ខែឧសភា ឆ្នាំ២០១៩នេះ។
លោកបន្តថា គណបក្សនយោបាយដែលចូលរួមប្រកួតប្រជែងយកអាសនៈសមាជិកក្រុមប្រឹក្សាខេត្តនិងស្រុក ក្រុង ក្នុងខេត្តបន្ទាយមាន័យមាន៥គណបក្សរួមមាន ១.គណបក្សប្រជាជនកម្ពុជា, ២.គណបក្សហ្វ៊ុនស៊ិនប៉ិច, ៣.គណបក្សខ្មែររួបរួមជាតិ, ៤.គណបក្សឆន្ទៈខ្មែរ និង៥.គណបក្សសញ្ជាតិកម្ពុជា។
ឯការឃោសនារកសម្លេងឆ្នោតមានរយៈពេល៨ថ្ងៃ ចាប់ផ្តើមនៅថ្ងៃទី១៧ រហូតដល់ថ្ងៃទី២៤ ខែឧសភា ឆ្នាំ២០១៩ កន្លងមកនេះ គណបក្សនានាបានធ្វើយុទ្ធនាការរៀងខ្លួននៅតាមគោលដៅនានា។
ក្នុងនោះ គណបក្សប្រជាជនកម្ពុជាបានធ្វើយុទ្ធនាការទ្រង់ទ្រាយធំជាងគេ ពោលគឺគណបក្សនានាបានត្រៀមខ្លួនជាហើយសម្រាបថ្ងៃបោះឆ្នោតប្រព្រឹត្តទៅនៅថ្ងៃទី២៦ ខែឧសភា ឆ្នាំ២០១៩ ខានស្អែកនេះ៕
