(ខេត្តកំពត)៖ អាងស្តុកទឹកត្រង់ចំណុចភូមិកំពង់ត្រាចទី២ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ត្រូវបានអាជ្ញាធរស្រុក រៀបចំគម្រោងស្តារឡើងវិញ ដើម្បីស្តុកទឹកសម្រាប់ផ្គត់ផ្គង់ដល់ប្រជាពលរដ្ឋក្នុងមូលដ្ឋាន។
ក្នុងដំណើរដឹកនាំមន្ត្រីចុះពិនិត្យ គម្រោងស្តារទំនប់ និងសំណេះសំណាលជាមួយបងប្អូនប្រជាពលរដ្ឋក្នុងមូលដ្ឋានជាង៥០គ្រួសារ កាលពីរសៀលថ្ងៃពុធ ៤រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២២ ខែឧសភា ឆ្នាំ២០១៩ លោក អូន ខន អភិបាល នៃគណៈអភិបាលស្រុកកំពង់ត្រាច បានលើកឡើងថា គម្រោងស្តារអាងទំនប់ទឹកនេះមានទំហំបណ្ដោយប្រវែង៤០០ម ចាប់ពីចំណុចទ្វារទឹកខាងត្បូងទៅដល់កូនប្រឡាយទឹកប៉ែកខាងជើង និងទទឹងប្រវែង២៥ម ជម្រៅ២,៥០ម និងមួយខ្សែទៀតមានទំហំបណ្ដោយប្រវែង២០០ម ចាប់ពីចំណុចទ្វារទឹកទៅប៉ែកខាងលិច ទទឹងប្រវែង២៥ម ជម្រៅ២,៥០ម
ដោយអាងទំនប់ទឹកនេះ អាចបម្រើជូនសេចក្ដីត្រូវការរបស់ប្រជាពលរដ្ឋចំនួន៣ភូមិ គឺភូមិអូរច្រនៀង ភូមិកំពង់ត្រាចទី២ និងភូមិដើមចារ នៃភូមិសាស្ត្រឃុំកំពង់ត្រាចខាងលិច។
សូមបញ្ជាក់ជូនថា គម្រោងស្តារអាងទឹកទំនប់នេះ ត្រូវបានបងប្អូនប្រជាពលរដ្ឋស្នើឡើងក្នុងវេទិកាសាធារណៈថ្នាក់ជាតិកាលពីចុងឆ្នាំ២០១៧ នៅវត្តកោះព្រះធម៌ ហៅវត្តតូប ភូមិអូរច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ក្រោមអធិបតីភាពរបស់ លោក អូន ខន អភិបាលស្រុកកំពង់ត្រាច និងជាអនុប្រធានអចិន្ដ្រៃយ៍ នៃក្រុមការងារថ្នាក់ជាតិចុះមូលដ្ឋានស្រុកកំពង់ត្រាច៕ សេង ណារិទ្ធ
