(ខេត្តកែប)៖ នៅរសៀលថ្ងៃទី២២ ខែឧសភា ឆ្នាំ២០១៩ រដ្ឋបាលខេត្តកែប មានរៀបចំកិច្ចប្រជុំជាមួយគណ:ប្រតិភូបច្ចេកទេសរបស់ Urban And Design Institution of Shenzhen (UPDIS) ដេីម្បីសិក្សាស្វែងយល់ពីស្ថានភាពជាក់ស្ដែង និងបញ្ហាប្រឈមនៅក្នុងខេត្តកែប ពាក់ព័ន្ធនឹងការគ្រប់គ្រងទឹក បរិស្ថាន និងផែនការយុទ្ឋសាស្ត្រឆ្លេីយតបរបស់ខេត្ត។
កិច្ចប្រជុំនេះដែរបែរប្រព្រឹត្តទៅក្រោមអធិបតីភាព លោក កែន សត្ថា អភិបាល នៃគណៈអភិបាលខេត្ត និងលោក ស៊ាវ សុីម៉ា នាយក វិទ្យាស្ថាននគរូបនីយកម្ម និងឌីសាញសិនជិន(President ,Urban Planning And Design Institution Of Shenzhen) និងលោក សុខ ណារិន តំណាងប្រចាំប្រទេសរបស់អង្គការសហប្រជាជាតិ ដេីម្បីអភិវឌ្ឍន៍ឧស្សាហកម្ម(UNIDO)។
ថ្លែងក្នុងកិច្ចប្រជុំ លោក កែន សត្ថា អភិបាលខេត្តកែបបានឱ្យដឹងថា តាំងពីដើមរហូតមកដល់បច្ចុប្បន្ន ខេត្តកែបសំបូរទៅដោយធនធានធម្មជាតិ ដូចជាមានខ្យល់អាកាសល្អបរិសុទ្ធ មានទឹកសមុទ្រពណ៌ខៀវស្រងាត់ គឺទឹកស្អាត ដីស្អាត ខ្យល់ស្អាត ដោយគ្មានសារធាតុពុលមកបង្កដល់បរិស្ថានឡើយ។
លោកអភិបាលខេត្តបានបន្តថា ដោយសារខេត្តកែបមានសក្តានុពលលើវិស័យទេសចរណ៍ ធ្វើឱ្យរមណីយដ្ឋានឆ្នេរកែបទទួលភ្ញៀវទេសចរណ៍ជាតិ និងអន្តរជាតិយ៉ាងច្រើនសន្ធឹកសន្ធាប់ ពីមួយឆ្នាំទៅមួយឆ្នាំ។ដោយសារមានមនុស្សសម្រុកមកសម្រាក លម្ហែ កម្សាន្ត នៅខេត្តកែបដ៏ច្រើនបែបនេះ ខេត្តក៏ជួបបញ្ហាប្រឈមខ្លះៗដោយសារខ្វះកន្លែងស្នាក់អាស្រ័យ ព្រោះថាសណ្ឋាគារ ផ្ទះសំណាក់ បឹងហ្គាឡូវ រីស៊តនៅតំបន់ខេត្តកែបមិនទាន់មានគ្រប់គ្រាន់ សម្រាប់ទទួលបដិសណ្ឋារកិច្ចដល់ក្រុមភ្ញៀវទេសចរណ៍ដែលមកសម្រាក លម្ហែនៅខេត្តកែបនៅឡើយ។
លោកអភិបាលខេត្តបានបញ្ជាក់ទៀតថា បើទោះជារដ្ឋបាលខេត្តបានខិតខំស្តារហេដ្ឋារចនាសម្ព័ន្ធគ្រប់ផ្នែកប្រកបដោយការរីកចម្រើនបែបណាក្តី ប៉ុន្តែខេត្តពុំទាន់មានប្រព័ន្ធទឹកស្អាតប្រើប្រាស់នៅឡើយទេ ដោយសព្វថ្ងៃប្រជាពលរដ្ឋបានប្រើប្រាស់ទឹកនៅក្រោមដីដែលបុកចុះទៅក្រោមថ្មដា ដែលមានជម្រៅពី៤០ទៅ៧០ម៉ែត្រ ប៉ុន្តែទឹកនោះមានសភាពស្អាតបរិសុទ្ធ គ្មានសារជាតិពុលដែលនាំបង្កឱ្យប៉ះពាល់ដល់សុខភាពឡើយ។
ចំពោះបញ្ហាប្រឈមមួយទៀតដែលជាកក្តាសំខាន់ គឺខេត្តកែបពុំទាន់មានវិនិយោគអន្តរជាតិ ហើយទុនវិនិយោគក៏មិនទាន់មាន សម្រាប់កសាងវិស័យទេសចរណ៍ ដូចជាមិនទាន់មានសណ្ឋាគារលំដាប់ស្តង់ដារ ដែលធ្វើឱ្យអ្នកទេសចរណ៍ចូលមកមិនទៀងទាត់ផងដែរ។ តែទោះជាជួបបញ្ហាបែបនេះក្តី រដ្ឋបាលខេត្តនៅតែខិតខំពុះពារកែលម្អ ដើម្បីអភិវឌ្ឍតំបន់ទេសចរណ៍មួយនេះ ឱ្យកាន់តែរីកចម្រើននិងស្រស់បំព្រងជាលំដាប់៕ សេង ណារិទ្ធ
