(ខេត្តកំពត)៖ នៅព្រឹកថ្ងៃពុធ ៤រោច ខែពិសាខ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២២ ខែឧសភា ឆ្នាំ២០១៩ នៅមន្ទីរគណបក្សប្រជាជនកម្ពុជាខេត្តកំពត មានបើកវគ្គបំប៉នភ្នាក់ងារសង្កេតការណ៍បោះឆ្នោតរបស់គណបក្ស សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ដែលនឹងប្រព្រឹត្តទៅនៅថ្ងៃអាទិត្យទី ២៦ ខែឧសភាខាងមុខ ក្រោមអធិបតីភាពលោក ស៊ឹម វុទ្ធា សមាជិកអចិន្ត្រៃយ៍គណបក្សខេត្ត និងជាប្រធានគណ:ឃោសនាអប់រំគណបក្សប្រជាជនកម្ពុជាខេត្តកំពត និងមានការអញ្ជើញចូលរួមពីលោក តាក ហាប់ សមាជិកអចន្ត្រៃយ៍គណបក្សខេត្ត និងជាអនុប្រធានគណៈឃោសនាអប់រំ លោកស្រី ទិត សេដ្ឋា សមាជិកាអចិន្ត្រៃយ៍គណបក្សខេត្ត និងជាគ្រូបង្គោលការងារបោះឆ្នោតគណបក្សខេត្ត ព្រមទាំងមានការចូលរួមពីលោក លោកស្រី ប្រធាន អនុប្រធានគណបក្សក្រុង ស្រុក ថ្នាក់ដឹកនាំការិយាល័យទាំង៣នៃគណៈឃោសនាអប់រំខេត្ត តំណាងមន្ទីរគណបក្សខេត្ត គណបក្សស្រុក ក្រុង ព្រមទាំងភ្នាក់ងារសង្កេតការណ៍របស់គណបក្សប្រជាជនកម្ពុជាទាំង ៨ក្រុង-ស្រុក។
មានមតិក្នុងវគ្គអប់រំបំប៉ននេះ លោក ស៊ឹម វុទ្ធា បានមានប្រសាសន៍ថា៖ តួនាទីជាអ្នកសង្កេតការណ៍ ត្រូវតែយល់ឲ្យបានច្បាស់នូវនីតិវិធី និងច្បាប់ បទបញ្ជានៃការបោះឆ្នោតអសាកលរបស់ គ.ជ.ប ជៀសវាងការធ្វេីឲ្យមានកំហុស ហេីយត្រូវត្រួតពិនិត្យឲ្យបានល្អត្រឹមត្រូវនូវដំណើរការតាមការិយាល័យបោះឆ្នោតនីមួយៗ ថាតេីប្រពឹត្តទៅបានរលូន ឬមានបញ្ហាដែរឬទេ? ដើម្បីជាមូលដ្ឋានបម្រើ ការពារនូវផលប្រយោជន៍ជូនគណបក្សយើង ហើយស្របតាមគោលការណ៍ច្បាប់ និងលទ្ធិប្រជាធិបតេយ្យ ។
ជាមួយនេះដែរ លោកស្រី ទិត សេដ្ឋា សមាជិកាអចិន្ត្រៃយ៍គណបក្សខេត្ត និងជាគ្រូបង្គោលក្នុងវគ្គបណ្តុះបណ្តាលបានធ្វើបទបង្ហាញ នឹងបកស្រាយរាល់នីតិវិធី និងច្បាប់ បទបញ្ជានៃការបោះឆ្នោតអសាកលនេះទៅដល់សិក្ខាកាមដែលចូលរួមឲ្យបានយល់កាន់តែច្បាស់ថែមទៀត ដេីម្បីបម្រើដល់ការបោះឆ្នោតនៅថ្ងៃទី២៦ ខែឧសភា ឆ្នាំ២០១៩ ខាងមុខនេះ។
នៅចុងបញ្ចប់នៃវគ្គបំប៉ន លោក សឹម វុទ្ធា ក៏បានផ្តាំផ្ញើដល់សិក្ខាកាមជាភ្នាក់ងារគណបក្សទាំង ៨ស្រុក ក្រុង ត្រូវប្រឹងប្រែងយកអស់កម្លាំងកាយ ចិត្ត បញ្ញាស្មារតី ជួយបម្រើ និងការពារផលប្រយោជន៍ជូនគណបក្សប្រជាជនកម្ពុជាយើង សម្រាប់ការបោះឆ្នោតជ្រើសរើសក្រុមប្រឹក្សាខេត្ត ស្រុក ក្រុងអាណត្តិទី៣នេះ ឲ្យទទួលបានជោគជ័យ ១០០% ប្រកបដោយមនសិការទទួលខុសត្រូវការងារខ្ពស់ និងសេចក្តីស្រឡាញ់ជឿជាក់ គាំទ្រ ដឹងគុណយ៉ាងក្រៃលែងចំពោះគណបក្សប្រជាជនកម្ពុជា៕ សេង ណារិទ្ធ
