ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យស្តេចយាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធីទា្វទសមាស ច្រត់ព្រះនង្គ័ល នៅទីព្រះស្រែ ភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ នាវេលាព្រឹកថ្ងៃពុធ ៤រោច ខែពិសាខ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២២ ខែឧសភា ឆ្នាំ២០១៩ នេះ ដោយមានការយាងនិងអញ្ជើញចូលរួមដោយ ព្រះរាជវង្សានុវង្ស ឥស្សរជនជាន់ខ្ពស់ និងថ្នាក់ដឹកនាំនៃរាជរដ្ឋាភិបាលគ្រប់លំដាប់ថ្នាក់ បណ្តាអង្គទូតនានា ប្រចាំព្រះរាជាណាចក្រកម្ពុជា ព្រមទាំងភ្ញៀវជាតិ និងអន្តរជាតិជាច្រើនផងដែរ។
ក្នុងឱកាសដ៏ឧត្តុង្គឧត្តមនោះ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យស្តេចយាងទត ពិព័រណ៍ ផលិតផលកសិកម្ម និងសិប្បកម្មកែច្នៃផលិតកម្មកសិកម្មក្នុងស្រុក ដែលបានរៀបចំឡើង ដើម្បីឆ្លុះបញ្ចំងឲ្យឃើញពីភាពរីកចម្រើនឥតឈប់ឈរចំពោះវិស័យកសិកម្មជាតិ ដែលព្រះរាជាណាចក្រកម្ពុជា សម្រេចបាននាពេលកន្លងមក។
ព្រះរាជពិធីបុណ្យប្រពៃណីនេះ ធ្វើឡើងក្នុងគោលបំណងផ្សងមើលប្រផ្នូលរបស់ស្រុកទេស ទៅតាមការបរិភោគរបស់ «គោឧសភរាជ» និងម្យ៉ាងទៀតក៏ជាការដាស់តឿន ក្រើនរំឭកដល់ប្រជាជនខ្មែរ ដែលពឹងផ្អែកលើការធ្វើកសិកម្មជាចម្បងនោះ ឱ្យបានដឹងថា រដូវវស្សាបានចូលមកដល់ហើយ ក៏ដូចជាបង្ហាញឲ្យឃើញនូវព្រះរាជហឫទ័យទុកដាក់ខ្ពស់ នៃព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ចំពោះកូនចៅប្រជានុរាស្ត្ររបស់ព្រះអង្គ និងចំពោះវិស័យកសិកម្មជាតិ។
