មណ្ឌលគិរី ៖ នាព្រឹកថ្ងៃទី២១ ខែឧសភា ឆ្នាំ២០១៩ នៅសាលប្រជុំអគារក្រុមប្រឹក្សាខេត្តមណ្ឌលគិរី
មានប្រារព្ធពិធីប្រកាសចូលកាន់មុខដំណែងប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តមណ្ឌលគិរី ក្រោមអធិបតីដ៏ខ្ពង់ខ្ពស់របស់ ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនិតិសម្បទា បានមានប្រសាសន៍ ក្នុងពិធីប្រកាសចូលកាន់មុខដំណែងប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តមណ្ឌលគិរី ដោយមានការចូលរួមពីសំណាក់លោក ឈឹម កាន អភិបាលរងខេត្ត លោក លី សាមិ សមាជិកក្រុមប្រឹក្សាខេត្ត ថ្នាក់ដឹកនាំនៃក្រសួងសង្គមកិច្ច ព្រមទាំងលោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត លោក លោកស្រីប្រធានមន្ទីរសង្គមកិច្ច តាមបណ្តារាជធានីខេត្ត អភិបាលក្រុង/ស្រុក និងសិស្សានុសិស្សជាច្រើនរូប ដែលប្រព្រឹត្តទៅ ។
ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនិតិសម្បទា បានថ្លែងថា បច្ចុប្បន្ននេះ រាជរដ្ឋាភិបាលកម្ពុជា បានដាក់ចេញគោលនយោបាយជាច្រើន ជាពិសេស គោលនយោបាយគាំពារសង្គម ដើម្បីជួយដល់ស្ត្រីមានផ្ទៃពោះ ដែលជាជនក្រីក្រ ហើយថវិកានេះ ផ្តល់ជូនតាមរយៈមន្ទីរសុខាភិបាលរាជធានី/ខេត្ត ដើម្បីផ្តល់ជូនដោយផ្ទាល់ដល់ស្ត្រីមានផ្ទៃពោះ និងឆ្លងទន្លេ នៅតាមមន្ទីរពេទ្យរដ្ឋ។ ឯកឧត្តម បញ្ជាក់ថា កម្មវិធីគាំពារសង្គម វាជាជ្រុងម្ខាងមិនមែនគ្រាន់តែជាការសម្រាលជីវភាពទេ តែជាផ្នែកមួយនៃការកាត់បន្ថយភាពអត្រាមរណភាពមាតា និងទារក និងបង្កើនអាហារូបត្ថម្ភ សម្រាប់ស្ត្រីឆ្លងទន្លេផងដែរ។
ឯកឧត្តម បន្ថែមថា រាជរដ្ឋាភិបាលកំណត់ថា បច្ចុប្បន្ននេះ ប្រទេសកម្ពុជា មានចំណូលមធ្យម កម្រិតទាប រហូតដល់ឆ្នាំ២០៣០ មានចំណូលមធ្យម កម្រិតខ្ពស់ ហើយជាប្រចាំឆ្នាំ ធ្វើយ៉ាងណាកាត់បន្ថយភាពក្រីក្រឱ្យបានច្រើនជាង៤% រហូតដល់ឆ្នាំ២០៥០ ប្រទេសកម្ពុជា អាចជាប្រទេសអភិវឌ្ឍន៍។ ឯកឧត្តម រដ្ឋមន្ត្រីក្រសួងសង្គមកិច្ច បានស្នើដល់អាជ្ញាធរគ្រប់លំដាប់ថ្នាក់ និងសមត្ថកិច្ចទាំងអស់ ត្រូវសហការគ្នា ចូលរួមថែរក្សាសុខសន្តិភាព ព្រោះកត្តាសុខសន្តិភាពនេះហើយ ដែលធ្វើឱ្យប្រទេសជាតិមានការរីកចម្រើន និងប្រជាពលរដ្ឋមានជីវភាពធូរធារ ។
បន្ថែមលើសនេះ ឯកឧត្តម ណែនាំដល់លោកប្រធានមន្ទីរថ្មី ត្រូវបន្តសហការគ្នាជាមួយស្ថាប័ននានា ជាពិសេស ត្រូវរក្សាសាមគ្គីភាពផ្ទៃក្នុង មានទំនាក់ទំនងល្អជាមួយស្ថាប័នដ៏ទៃ ដើម្បីបំពេញការងារឱ្យគ្នាទៅវិញទៅមក ទៅតាមភារកិច្ចរបស់រាជរដ្ឋាភិបាល ក៏ដូចជាថ្នាក់ដឹកនាំខេត្តប្រគល់ជូន ។
លោក ខឹម សុផុន ប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តមណ្ឌលគិរី បានឡើងមានមតិប្តេជ្ញាចិត្ត ដូចជា ៖ អនុវត្តយ៉ាងខ្ចប់ខ្ជូន និងលិខិតបទដ្ឋាននានារបស់រាជរដ្ឋាភិបាលកម្ពុជា ខិតខំអស់ពីកម្លាំងកាយចិត្ត ស្មារតី បំបេញការងារឱ្យទទួលបានជោគជ័យ តាមគោលនយោបាយកម្មវិធីរបស់ក្រសួងសង្គមកិច្ច អតីតយុទ្ធជន និងយុវនិតីសម្បទា អនុវត្តនូវអនុសាសន៍ណែនាំពីថ្នាក់ដឹកនាំខេត្ត រហូតដល់ក្រសួង បន្តលើកកម្ពស់ស្មារតីសាមគ្គីភាពផ្ទៃក្នុង និងការទំនាក់ទំនងសហប្រតិបត្តិការល្អជាមួយស្ថាប័នក្នុងអអ្គភាព ក៏ដូចជាស្ថាប័នដទៃ និងត្រូវខិតខំរៀនសូត្រ ដក់ស្រង់បទពិសោធន៍ ចំណេះដឹងថ្មីបន្ថែមទៀត ដើម្បីឆ្លើយតបតាមតម្រូវការ ដែលប្រទេសជាតិ កំពុងមានការរីកចម្រើន ៕
