(ខេត្តកែប)៖ នៅព្រឹកថ្ងៃអង្គា ១១រោច ខែចេត្រ ឆ្នាំកុរ ឯកស័ក ព.ស. ២៥៦២ ត្រូវនឹងថ្ងៃទី ៣០ ខែ មេសា ឆ្នាំ ២០១៩ សាខាកាកបាទក្រហមកម្ពុជាខេត្តកែប ដឹកនាំដោយ លោក កែន សត្ថា អភិបាល នៃគណៈអភិបាលខេត្តកែប នឹងប្រធានគណៈកម្មាធិការសាខាកាកបាទក្រហមខេត្ត អនុសាខាកាកបាទក្រហមក្រុង និងសហការី បានអញ្ជើញចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសពលោកស្រី សឹង សុគន្ធាវី អាយុ ២៧ឆ្នាំ ជាមន្ត្រីបំរើការងារក្នុងមន្ទីរទំនាក់ទំនងជាមួយរដ្ឋសភា ព្រឹទ្ធសភា នឹងអធិការកិច្ចខេត្តកែប ដែលបានទទួលមរណភាព ដោយសារជំងឺ(សម្រាលកូន)ហើយសពត្រូវបានតម្ដល់ទុកនិងធ្វើបុណ្យតាមប្រពៃណី ស្ថិតនៅភូមិកែប សង្កាត់កែប ក្រុងកែប ខេត្តកែប។
ក្នុងឱកាសនោះ លោក អភិបាលក៏បាននាំយកថវិកាដែលជាអំណោយដ៍ថ្លៃរថ្លារបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចំនួន ២.៧៦០.០០០រៀល ថវិកាសមាគមសង្គហមិត្តភាពរបស់ក្រសួងទំនាក់ទំនងជាមួយរដ្ឋសភា ព្រឹទ្ធសភា នឹងអធិការកិច្ចចំនួន៤.០០០.០០០រៀល មន្ទីរទំនាក់ទំនងជាមួយរដ្ឋសភា ព្រឹទ្ធសភានឹងអធិការកិច្ច ៤០០.០០០រៀល មន្ត្រីក្នុងមន្ទីទំនាក់ទំនងជាមួយរដ្ឋភា ព្រឹទ្ធសភា នឹងអធិការកិច្ច ៨០០.០០០រៀល ប្រគល់ជូនដល់ក្រុមគ្រួសារសពទុកចាត់ចែងធ្វើបុណ្យតាមប្រពីណី។
ពិធីនេះផងដែរដោយមានការអញ្ជើញចូលរួមពី លោក លោកស្រី ជាអភិបាលរងខេត្ត ប្រធាន អនុប្រធានមន្ទីរអង្គភាពជំវិញខេត្ត ព្រមទាំងអាជ្ញាធរមូលដ្ឋានផងដែរ។
ក្នុងឱកាសនោះដែរ លោក កែន សត្ថា ក្នុងនាមប្រធានគម្មណៈកម្មាធិការសាខាកាកបាទក្រហមខេត្ត បានសម្ដែងនូវការសោកស្ដាយចំពោះមនុស្សជាទីស្រាលាញ់ និងសូមបួងសួងដល់វិញ្ញាណក្ខ័ន្ធនៃសព បានទៅកាន់សុគតិភព កុំបីឃ្លៀងឃ្លាតឡើយ។
ចុងក្រោយលោកគ្រូ សឹង ទាម តំណាងក្រុមគ្រួសារនៃសពសូមថ្លែងអំគុណចំពោះ លោកអភិបាលខេត្ត ថ្នាក់ដឹកនាំទាំងអស់ នឹងក្រុមការងារតាមមន្ទីរអង្គភាពជំវិញខេត្ត ដែលបានយកចិត្តទុកដាក់ដល់ក្រុមគ្រួសារគាត់នាពេលនេះ៕ សេង ណារិទ្ធ
