(ខេត្តកំពត)៖ បញ្ហាទឹកជំនន់ទឹកភ្លៀងក្រុងកំពត កន្លងមកពិតជាបានបង្កភាពស្មុកស្មាញដល់ប្រជាពលរដ្ឋយ៉ាងខ្លាំង ដោយបញ្ហាខាងលើ ត្រូវបានមជ្ឈដ្ឋានជាច្រើនលើកឡើងថា គឺកើតឡើងព្រោះតែបុគ្គលមួយចំនួនដែលមានលុយ មានអំណាចមួយក្តាប់តូច បានចាក់ដីចូលតំបន់បណ្តោះទឹក និងចាក់ដី បិទមុខលូប្រឡាយទឹក ដែលជាហេតុធ្វើឲ្យទឹកជំនន់ទឹកភ្លៀងមិនអាចហូចេញពីក្រុងកំពតទាន់ពេលវេលាបានឡើយ។
ទាក់ទិននឹងបញ្ហាដូចខាងលើ នៅយប់ថ្ងៃទី២៧ឈានចូល២៨ ខែមេសា ឆ្នាំ២០១៩នេះ ក្រោយមានភ្លៀងធ្លាក់មួយមេយ៉ាងធំនោះបានធ្វើឲ្យផ្ទះសំបែងប្រជាពលរដ្ឋក្នុងក្រុងកំពត ត្រូវរងការលិចលង់មួយអន្លើ ហើយក៏បានធ្វើឲ្យពួកគាត់ត្រូវនាំគ្នាបាចទឹកចេញពីលំនៅស្ថានទាំងកណ្តាលយប់ ពិសេសចំណុចដែលមានការចាក់ដីលុបផ្លូវបណ្តោះទឹកតែម្តង។
បន្ទាប់ពីមានភ្លៀងបង្កភាពជនលិចនេះ នៅព្រឹកថ្ងៃ២៨ ខែមេសា ឆ្នាំ២០១៩នេះ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំមន្ត្រីជំនាញពាក់ព័ន្ធនិងអាជ្ញាធរក្រុង សង្កាត់មូលដ្ឋាន និងម្ចាស់ ក្រុមហ៊ុនចាក់ដី និងម្ចាស់ដីដែលជួលខាងលើ មកពិនិត្យជាក់ស្តែង ដើម្បីស្វែងរកដំណោះស្រាយជួយដល់ប្រជាពលរដ្ឋដែលរងគ្រោះទឹកជំនន់ទឹកភ្លៀងនាពេលនេះផងដែរ។
លោក ជាវ តាយ អភិបាលខេត្តបានមានប្រសាសន៍ទៀតថា ដំណោះស្រាយនាពេលនេះ ទាំងសង្កាត់ ទាំងជំនាញពាក់ពាក់ព័ន្ធត្រូវ តែរកវិធីរំដោះទឹកចេញពីក្រុងកំពតឲ្យបានឆាប់បំផុត ហើយមិនត្រូវទុកឲ្យនៅដក់ជាប់យូរបែបនេះឡើយ ព្រោះយើងមិនអាចឈរមើលទិដ្ឋភាពមួយ ដែលកំពុងធ្វើឲ្យប្រជាពលរដ្ឋជួបផលលំបាកបន្តទៀតនោះឡើយ៕ សេង ណារិទ្ធ
