(ខេត្តកំពត)៖ នៅរសៀលថ្ងៃទី២៧ ខែមេសា ឆ្នាំ២០១៩ លោក អូន ខន អភិបាល នៃគណៈអភិបាលស្រុក និងជាប្រធានកិត្តិយសអនុសាខាកាកបាទក្រហមស្រុកកំពង់ត្រាច ខេត្តកំពត អមដំណើរ ដោយលោក ជួន សុភា អភិបាលរងស្រុក និងអាជ្ញាធរភូមិ ឃុំ បានអញ្ជើញចុះសួរសុខទុក្ខ ស្ត្រីម៉េម៉ាយដែលចាស់ជរា ក្រីក្រគ្មានទីពឹង ឈ្មោះ គង់ ទន់ ភេទស្រី អាយុ៧៥ឆ្នាំ រស់នៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ខេត្តកំពត។
ជាមួយនឹងការអញ្ជើញចុះសួរសុខទុក្ខនេះ លោក អូន ខន អភិបាលស្រុកកំពង់ត្រាច ក៏បាននាំយកនូវអំណោយអនុសាខាកាកបាទក្រហមស្រុក រួម មាន៖ អង្ករ ២បាវ=៥០គីឡូក្រាម, មី ១កេស, ត្រីខ ១យួរ និងថវិកាចំនួន១៨០.០០០រៀល ប្រគល់ជូនលោកយាយ ឈ្មោះ គង់ ទន់ ដើម្បីជួយសម្រួលដល់ជីវភាពរបស់គាត់។
ក្នុងឱកាសនោះ លោក អូន ខន ប្រធានកិត្តិយសអនុសាខាកាកបាទក្រហមកម្ពុជាស្រុកកំពង់ត្រាច ក៏បានពាំនាំនូវប្រសាសន៍ ផ្តាំផ្ញើ សួរសុខទុក្ខ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីទុក្ខលំបាករបស់ប្រជាពលរដ្ឋគ្រប់មជ្ឈដ្ឋាន ពិសេសជនងាយរងគ្រោះគ្រប់ប្រភេទ ដោយគ្មានរើសអើងពូជសាសន៍ ពណ៌សម្បុរឡើយ។
ក្នុងឱកាសនោះ លោកយាយ គង់ ទន់ ព្រមទាំងក្រុមគ្រួសារ ក៏សូមថ្លែងអំណរគុណយ៉ាងជ្រៀលជ្រៅចំពោះក្រុមការងារកាកបាទក្រហមរបស់ស្រុកកំពង់ត្រាច ពិសេសសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានជួយផ្តល់នូវនូវគ្រឿងឧបភោគ បរិភោគ ក៏ដូចជាថវិកាដល់លោកយាយនាពេលនេះ។
ដោយឡែក នៅរសៀលថ្ងៃដដែល បន្ទាប់ពីចុះសួរសុខទុក្ខ និងនាំអំណោយកាកបាទក្រហមផ្តល់ជូនប្រជាពលរដ្ឋក្រីក្ររួចមក លោក អូន ខន ក៏បានចុះត្រួតពិនិត្យមើលពីស្ថានភាពទឹក នៅតាមព្រែក ប្រឡាយ ស្ថិតក្នុងភូមិសាស្ត្រឃុំព្រែកក្រឹស ផងដែរ៕ សេង ណារិទ្ធ
