(ខេត្តកំពត)៖ នៅរសៀលថ្ងៃពុធ ៦រោច ខែចេត្រ ឆ្នាំ កុរ ឯកស័ក ព.ស ២៥៦២ ត្រូវនឹងថ្ងៃទី ២៥ ខែមេសា ឆ្នាំ២០១៩ នៅសាលាខេត្តកំពត លោក ជាវ តាយ អភិបាលនៃគណ:អភិបាលខេត្តកំពត ទទួលស្វាគមន៍ ប្រតិភូគណៈកម្មការទី៣ នៃរដ្ឋសភា ដឹកនាំដោយ លោក ដា វ៉ាន់ដេត ប្រធានគណៈកម្មការ ។
សមាសភាពអញ្ជើញចូលរួមនាពេលនេះ មាន៖ គណ:អភិបាលខេត្ត នាយករដ្ឋបាលសាលាខេត្ត នាយកទីចាត់ការ-អង្គភាពចំណុះសាលាខេត្ត លោកប្រធានមន្ទីរ អង្គភាពពាក់ព័ន្ធជុំវិញខេត្ត សរុបប្រមាណ៥២នាក់។
លោក ជាវ តាយ អភិបាលខេត្តកំពត បានរាយការណ៍ជូនគណ:ប្រតិភូ អំពីសភាពការណ៍រួមទូទៅ និងវឌ្ឍនភាពរីកចម្រើនព្រមទាំងលទ្ធផលការងារសំខាន់ៗ ដែលរដ្ឋបាលខេត្តកំពតសម្រេចបានកន្លងមក និងផែនការទិសដៅអនុវត្តបន្តនូវកម្មវិធីនយោបាយយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល ព្រមទាំងបញ្ហាប្រឈមនិងសំណូមពរនានា ដែលរដ្ឋបាលខេត្តកំពតបានជួបប្រទះកន្លងមក និងកំពុងបានខិតខំជម្រុញការអភិវឌ្ឍន៍ជាប្រចាំផងដែរ។ ជាមួយឱកាសនោះដែរ លោក អភិបាលខេត្តនិងថ្នាក់ដឹកនាំមន្ទីរអង្គភាពពាក់ព័ន្ធក៏បានរាយការណ៍លំអិតអំពីលទ្ធផល និងសមិទ្ធផលសំខាន់ៗពាក់ព័ន្ធលើវិស័យមួយចំនួនរួមមាន ការងារផែនការ ការងារវិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ជូនគណៈប្រតិភូជ្រាបផងដែរ។
ក្នុងឱកាសនោះ លោក ដា វ៉ាន់ដេត ប្រធានគណៈកម្មការទី៣នៃរដ្ឋសភា ក៏បានកោតសរសើរ និងបានវាយតម្លៃខ្ពស់ចំពោះខេត្តកំពត ដែលបានធ្វើការអភិវឌ្ឍន៍លើគ្រប់វិស័យ ដោយអនុវត្តតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ដែលសម្តេចបានណែនាំឲ្យមន្ត្រីរាជការទាំងអស់ខិតខំបម្រើប្រជាពលរដ្ឋទ្វេរដង ឲ្យសក្តិសមនូវអ្វី ដែលបងប្អូនប្រជាពលរដ្ឋផ្តល់សេចក្តីទុកចិត្តតាមរយៈការបោះឆ្នោតនាពេលកន្លងមក។ ហើយលោកក៏បានថ្លែងអំណរគុណចំពោះការធ្វើបដិសណ្ឋារកិច្ច និងយកចិត្តទុកដាក់ចំពោះប្រតិភូគណៈកម្មការទី៣ នៃរដ្ឋសភា ដែលមកបំពេញការងារនាថ្ងៃនេះ៕ សេង ណារិទ្ធ
