(ខេត្តកំពត)៖ នៅព្រឹកថ្ងៃទី ៨ ខែ មេសា ឆ្នាំ២០១៩នេះ លោក ជាវ តាយ អភិបាលនៃគណ:អភិបាលខេត្តកំពត អមដំណើរដោយ លោក លោកស្រី ជាអភិបាលរងខេត្ត ប្រធានមន្ទីរអង្គភាពពាក់ព័ន្ធជុំវិញខេត្ត កងកម្លាំងទាំង៣ប្រភេទ និងលោកអភិបាលក្រុង ដើម្បីចុះពិនិត្យមើលសកម្មភាពរបស់ក្រុមការងារកាត់ខ្សែកាបអុបទិក នៅបរិវេណរង្វង់មូលខេត្តកំពត ក្នុងគោលបំណងដើម្បីរៀបចំកែលម្អសោភ័ណ្ឌភាពក្រុង នៅក្នុងឱកាសបុណ្យចូលឆ្នាំថ្មី ដែលខេត្តកំពតនិងរៀបចំកំពតសង្ក្រាននាពេលខាងមុខ ព្រមទាំងត្រៀមរៀបចំពិធីបុណ្យសមុទ្រនៅចុងឆ្នាំ២០១៩នេះផងដែរ។
ក្នុងនោះ លោកអភិបាលខេត្តកំពត បានណែនាំឲ្យមន្ទីរប្រៃសណី និងទូរគមនាគមន៍ខេត្ត សហការជាមួយ អង្គភាពអគ្គិសនីខេត្ត និងក្រុមហ៊ុនខ្សែកាបអុបទិក ត្រូវកាត់ទម្លាក់រាល់ខ្សែកាបទាំងអស់ ក្នុងថ្ងៃនេះ ដោយទម្លាក់ចុះក្រោមដើម្បីកប់ចូលទៅក្នុងដីវិញ ដើម្បីចូលរួមរក្សាសោភណ្ឌភាពក្រុងឲ្យមានភាពស្រស់បំព្រងឡើងវិញ៕ សេង ណារិទ្ធ
