ក្នុងនាមជាមន្ត្រីរាជការ ក្រោមឱវាទមួយរូប ខ្ញុំបាទសូមសម្តែងនូវសេចក្តីគោរពនិងដឹងគុណយ៉ាងជ្រាលជ្រៅបំផុតជូនចំពោះឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា ដែលបានបង្ហាញនូវមនោសញ្ចេតនាដ៏ជ្រាលជ្រៅ និងការរួមសុខរួមទុក្ខជាមួយមន្ត្រីនៅក្រោមឱវាទ ជាពិសេសសកម្មភាព ៣ របស់ឯកឧត្តម និងលោកជំទាវ គឺ៖
សកម្មភាពទី១. នៅព្រឹកថ្ងៃទី១៧ ខែឧសភា ឆ្នាំ២០២៦ នេះ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ កែ សួនសុភី ស សុខា បានអញ្ជើញចុះសួរសុខទុក្ខ និងពិនិត្យស្ថានភាពលោកអនុសេនីយ៍ឯក ជិន លីណា មន្ត្រីនគរបាល នៃអធិការដ្ឋាននគរបាលស្រុកកៀនស្វាយ ខេត្តកណ្តាល ដែលបាន និងកំពុងសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត។ ក្នុងនោះ ឯកឧត្តមអភិសន្តិបណ្ឌិត និងលោកជំទាវ ក៏បាននាំយកថវិកាមួយចំនួន ជូនក្រុមគ្រួសាររបស់លោកអនុសេនីយ៍ឯក ជិន លីណា ដើម្បីជួយសម្រួលដល់ការចំណាយថ្លៃពេទ្យផងដែរ។
សកម្មភាពទី២. កាលពីរសៀលថ្ងៃទី១៦ ខែឧសភា ឆ្នាំ២០២៦ លោកជំទាវ កែ សួនសុភី ស សុខា បានអញ្ជើញចុះសួរសុខទុក្ខ និងពិនិត្យស្ថានភាពលោកអនុសេនីយ៍ឯក ជិន លីណា មន្ត្រីនគរបាល នៃអធិការដ្ឋាននគរបាលស្រុកកៀនស្វាយ ខេត្តកណ្តាល ដែលកំពុងសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត។
លោកអនុសេនីយ៍ឯក ជិន លីណា មន្ត្រីនគរបាល នៃអធិការដ្ឋាននគរបាលស្រុកកៀនស្វាយ បានជួបគ្រោះថ្នាក់ចរាចរណ៍រងរបួសធ្ងន់ ក្នុងពេលបំពេញបេសកកម្ម ការពារប្រតិភូជាតិជាន់ខ្ពស់ នៅតាមដងផ្លូវជាតិលេខ១ ក្នុងចន្លោះគីឡូម៉ែត្រលេខ ៣៣-៣៤ ចំណុចភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល កាលពីថ្ងៃទី១៦ ខែឧសភា ឆ្នាំ២០២៦។
សកម្មភាពទី៣. កាលពីថ្ងៃទី៧ ខែឧសភា ឆ្នាំ២០២៦ ឯកឧត្តមអភិសន្តិបណ្ឌិត ស សុខា បានអញ្ជើញចុះសួរសុខទុក្ខ និងពិនិត្យស្ថានភាពលោកវរសេនីយ៍ទោ ម៉ាប់ សុផាត អធិការរងនៃអធិការដ្ឋាននគរបាលស្រុកស្ទឹងត្រង់ ដែលសម្រាកព្យាបាលរបួសនៅមន្ទីរពេទ្យ ប្រទេសវៀតណាម។ ក្នុងនោះ ឯកឧត្តមអភិសន្តិបណ្ឌិត ក៏បាននាំយកថវិកាមួយចំនួន ជូនក្រុមគ្រួសាររបស់លោកវរសេនីយ៍ទោ ម៉ាប់ សុផាត ដើម្បីជួយសម្រួលដល់ការចំណាយថ្លៃពេទ្យផងដែរ។
លោកវរសេនីយ៍ទោ ម៉ាប់ សុផាត អធិការរង នៃអធិការដ្ឋាននគរបាលស្រុកស្ទឹងត្រង់ បានរងរបួសយ៉ាងធ្ងន់ធ្ងរ ក្នុងពេលចុះបង្ក្រាបករណីហិង្សា ដោយចេតនាមានស្ថានទម្ងន់ទោស កាលពីយប់ថ្ងៃទី២៤ ខែមេសា ឆ្នាំ២០២៦ នៅចំណុចភូមិបឹងដែង១ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។
សកម្មភាពដ៏ឧត្តុង្គឧត្តមរបស់លោកទាំងទ្វេ បានបង្ហាញឱ្យយ៉ាងច្បាស់ពីទឹកចិត្តមេត្តា ករុណា និងការយកចិត្តទុកដាក់ខ្ពស់ចំពោះសុខទុក្ខ និងសុខុមាលភាពរបស់មន្ត្រីក្រោមឱវាទ ជាការផ្តល់តម្លៃ និងលើកទឹកចិត្តដល់មន្ត្រី ដែលបានលះបង់កម្លាំងកាយចិត្ត ដើម្បីបុព្វហេតុជាតិមាតុភូមិ។
ខ្ញុំបាទសូមគោរពកោតសរសើរដោយស្មោះអស់ពីដួងចិត្តចំពោះកាយវិការដ៏ប្រពៃ និងពោរពេញដោយសប្បុរសធម៌របស់ឯកឧត្តម និងលោកជំទាវ។ សកម្មភាពដ៏មានអត្ថន័យនេះ មិនត្រឹមតែផ្តល់កម្លាំងចិត្តដល់អ្នករងគ្រោះប៉ុណ្ណោះទេ ប៉ុន្តែថែមទាំងបានញ៊ាំងឱ្យស្មារតីស្នេហាជាតិ និងការលះបង់របស់កងកម្លាំងនគរបាលជាតិ កាន់តែមានភាពមុតមាំទ្វេឡើង។
មុននឹងបញ្ចប់ ខ្ញុំបាទសូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមតាមជួយថែរក្សា ការពារ និងប្រសិទ្ធពរជ័យ សិរីសួស្តី ជ័យមង្គល វិបុលសុខគ្រប់ប្រការជូនឯកឧត្តមអភិសន្តិបណ្ឌិត ស សុខា និងលោកជំទាវ កែ សួនសុភី ព្រមទាំងបុត្រាបុត្រី និងក្រុមគ្រួសារ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
ជាទីបញ្ចប់នេះ ខ្ញុំសូមជូនពរដល់លោកអនុសេនីយ៍ឯក ជិន លីណា និងលោកវរសេនីយ៍ទោ ម៉ាប់ សុផាត សូមឆាប់បានជាសះស្បើយ និងមានសុខភាពល្អឡើងវិញ ដើម្បីឆាប់បានវិលទៅជួបជុំក្រុមគ្រួសារ និងបន្តបេសកកម្មបម្រើជាតិមាតុភូមិ និងប្រជាជន តរៀងទៅ៕
