កំពង់ឆ្នាំង៖ តាមប្រជាពលរដ្ឋនិងមន្ដ្រីតូចតាចក្នុងស្រុកទឹកផុស ខេត្តកំពង់ឆ្នាំង បានឲ្យដឹងថា ដោយសារមានការឃុបឃិតបើកដៃពីសំណាក់លោក ស៊ុំ ប្ញទ្ធី នាយផ្នែករដ្ឋបាលព្រៃឈើរមាស ទើបក្រុមឈ្មួញអាចធ្វើសកម្មភាពដឹកជញ្ជូនឈើពីតំបន់ដែនជម្រកសត្វព្រៃភ្នំឱរ៉ាល់ និងពីស្រុកក្រគរ ខេត្តពោធិ៍សាត់ ឆ្លងកាត់ស្រុកទឹកផុស យ៉ាងពេញបន្ទុក។ តាមរយៈការប្រព្រឹត្តអំពើពុករលួយ គឺលោក ស៊ុំ ប្ញទ្ធី អាចប្រមូលលុយបានយ៉ាងច្រើនក្នុងមួយថ្ងៃៗ ព្រោះលោក ស៊ុំ ប្ញទ្ធី បានដាក់ពង្រាយបក្ខពួកចាំប្រមូលលុយពីក្រុមឈ្មួញដឹកជញ្ជូនឈើខុសច្បាប់មិនឲ្យគេចរួចឡើយ។ សូម្បីតែប្រជាពលរដ្ឋដឹកអុស ដឹកធ្យូង និងដឹកឈើបន្តិចបន្តួចយកទៅសាងសង់ផ្ទះក៏ត្រូវលោក ស៊ុំ ប្ញទ្ធី គាបយកលុយយ៉ាងកំរោលដែរដោយពុំមានការយោគយល់បន្តិចណាឡើយ។
ប្រភពពីមន្ត្រីអាជ្ញាធរនិងមន្ត្រីមូលដ្ឋានក្នុងស្រុកទឹកផុស ខេត្តកំពង់ឆ្នាំង បានឲ្យដឹងថា មួយរយៈចុងក្រោយនេះលោក ស៊ុំ ប្ញទ្ធី នាយផ្នែករដ្ឋបាលព្រៃឈើរមាស កំពុងសប្បាយប្រមូលលុយពីក្រុមឈ្មួញដឹកជញ្ជូនឈើខុសច្បាប់ ក៏ដូចជាប្រើអំណាចគាបយកលុយពីក្រុមឈ្មួញប្រើគ្រឿងចក្រឈូសឆាយបំផ្លាញព្រៃឈើយ៉ាងក្រអឺតក្រទម។ ប្រភពដែលស្និទ្ធនឹងលោក ស៊ុំ ប្ញទ្ធី បានឲ្យដឹងថា ការដែលលោក ស៊ុំ ប្ញទ្ធី ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់ លោក ថោង វ៉ាន់វីរ៉ាវុឌ្ឍី នាយខណ្ឌរដ្ឋបាលព្រៃឈើខេត្តកំពង់ឆ្នាំង ផងដែរទើបអ្វីៗអាចប្រព្រឹត្តទៅដោយរលូន។ ចំណែកលោក ឈួរ ច័ន្ទឌឿន អភិបាលខេត្តកំពង់ឆ្នាំង កំពុងរក្សាភាពស្ងៀមស្ងាត់ក្នុងខណៈដែលបទល្មើសដឹកជញ្ជូនឈើខុសច្បាប់និងបទល្មើសប្រើគ្រឿងចក្រឈូសឆាយទន្ទ្រានកាន់កាប់ដីព្រៃរបស់រដ្ឋកើតឡើងយ៉ាងរាលដាលក្នុងស្រុកទឹកផុស។
ប្រភពដែលស្និទ្ធនឹងលោក ស៊ុំ ប្ញទ្ធី បានឲ្យដឹងថា ចាប់តាំងពីទទួលបានតំណែងជានាយផ្នែករដ្ឋបាលព្រៃឈើរមាស ក្នុងស្រុកទឹកផុស រួចមកគឺលោក ស៊ុំ ប្ញទ្ធី កំពុងប្រើអំណាចនិងតួនាទីរបស់ខ្លួនដើម្បីប្រព្រឹត្តអំពើពុករលួយដោយគ្មានញញើតអ្វីទាំងអស់។ ប្រភពបានឲ្យដឹងទៀតថាលោក ស៊ុំ ប្ញទ្ធី តែងប្រើប្រាស់ប្រើឈ្មោះមេរដ្ឋបាលព្រៃឈើខេត្តកំពង់ឆ្នាំង ដើម្បីការពារទង្វើរបស់ខ្លួនយ៉ាងគឃ្លើនបំផុតព្រោះអាងមានខ្នងបង្អែករឹងមាំ។ សូម្បីតែមន្ត្រីរដ្ឋបាលព្រៃឈើមួយចំនួនក្នុងស្រុកទឹកផុស ក៏លាតត្រដាងរឿងអាស្រូវពុករលួយរបស់លោក ស៊ុំ ប្ញទ្ធី ផងដែរព្រោះបុគ្គលនេះកំពុងប្រើឥទ្ធិពលមន្ត្រីថ្នាក់លើដើម្បីផលប្រយោជន៍ផ្ទាល់ខ្លួនយ៉ាងក្រអឺតក្រទម។
ប្រភពពីមន្ត្រីអាជ្ញាធរមូលដ្ឋានក្នុងស្រុកទឹកផុស បានឲ្យដឹងថាលោក ស៊ុំ ប្ញទ្ធី នាយផ្នែករដ្ឋបាលស្រុកទឹកផុស បានប្រើប្រជាពលរដ្ឋជាកូនអ្នកភូមិ និងប្រើប្រាស់កម្លាំងយោធាឬកម្លាំងអាវុធហត្ថចាំប្រមូលលុយពីអ្នកដឹកជញ្ជូនឈើតាមរថយន្តនិងតាមគោយន្តទាំងយប់ទាំងថ្ងៃតែម្តង។ សូម្បីតែប្រជាពលរដ្ឋដឹកអុស ដឹកធ្យូង ឆ្លងកាត់មុខស្នាក់ការផ្នែករដ្ឋបាលព្រៃឈើរមាស ក៏លោក ស៊ុំ ប្ញទ្ធី គាបយកលុយតាមរបៀបពុករលួយយ៉ាងគឃ្លើនបំផុត ។ សមត្ថកិច្ចពាក់ព័ន្ធក្នុងស្រុកទឹកផុស បានឲ្យដឹងថា សម្រាប់គោយន្តដឹកឈើមូល១គ្រឿងត្រូវលោក ស៊ុំ ប្ញទ្ធី កំណត់ឲ្យបង់លុយពី៥ម៉ឺនទៅ១០ម៉ឺនរៀល ហើយគោយន្តដឹកឈើអាររួចត្រូវបង់១០ម៉ឺនរៀលទៅ១៥ម៉ឺនរៀល។ ជាងនេះទៅទៀតសូម្បីតែគោយន្តរបស់ប្រជាពលរដ្ឋដឹកធ្យូង ដឹកអុស ក៏លោក ស៊ុំ ប្ញទ្ធី តម្រូវឲ្យបង់លុយក្នុងមួយជើង៥ម៉ឺនរៀលផងដែរ ហើយប្រសិនបើនរណាមិនបង់លុយតាមការកំណត់ទេនោះ គឺលោក ស៊ុំ ប្ញទ្ធី ចាត់វិធានការបង្ក្រាបយ៉ាងពេញបន្ទុក៕
