កំពង់ចាម៖ ឯកឧត្តម ហ៊ុន ម៉ាណែត តំណាងសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង អមដំណើរដោយលោក គួច ចំរើន អភិបាលខេត្តកំពង់ចាម បានអញ្ជើញសម្ពោធដាក់ឲ្យប្រើប្រាស់ជាផ្លូវការ បណ្ណាល័យ១ខ្នង ខ្លោងទ្វារ ស្រះទឹក និងរបងវិទ្យាល័យ ហ៊ុន សែន ព្រៃទទឹង ដែលស្ថិតក្នុងឃុំជ្រៃវៀន ស្រុកព្រៃឈរ ខេត្តកំពង់ចាម ។
លោក កើត រឹទ្ធ តំណាងអតីតសិស្សវិទ្យាល័យ ហ៊ុន សែន ព្រៃទទឹង បានលើកឡើងថា មានបណ្ណាល័យថ្មី អគារសិក្សាថ្មី សិស្សានុសស្សិត្រូវខិតខំប្រឹងប្រែងរៀនសូត្រ ដើម្បីចូលរួមអភិវឌ្ឍន៍សង្គមជាតិ ហើយបណ្ណាល័យនេះគឺជាកន្លែង និងឃ្លាំងចំណេះដឹង អាចចូលសិក្សាស្រាវជ្រាវ ពោលគឺអានច្រើន ចេះច្រើន។
លោក គួច ចំរើន អភិបាលខេត្តកំពង់ចាម បានមានប្រសាសន៍ថា បច្ចុប្បន្នប្រទេសជាតិមានសុខសន្តិភាព ធ្វើឱ្យវិស័យអប់រំសិក្សាធិការមានការរីកចម្រើន។ មានអគារសិក្សាថ្មី បណ្ណាល័យ មានសៀវភៅអាន ស្រាវជ្រាវ វាជាឱកាសសិក្សាល្អសម្រាប់ការស្រាវជ្រាវបន្ថែម។ ទន្ទឹមនឹងនោះ លោក ស្នើសុំឲ្យបងប្អូនប្រជាពលរដ្ឋយកចិត្តទុកដាក់លើបញ្ហាគ្រោះរាំងស្ងួត នាពេលខាងមុខ ជាពិសេសប្រភពទឹក ដោយអាជ្ញាធរខេត្ត ខិតខំជួសជុល និងស្តារឡើងវិញនូវ អណ្តូង ស្រះទឹក ដោយត្រូវសន្សំទឹក ក្នុងការប្រើប្រាស់ប្រចាំថ្ងៃ កុំឲ្យមានប្រឈមគ្រោះរាំងស្ងួត និងអាកាសធាតុមានលក្ខណៈក្តៅខ្លាំង អាចបង្កឲ្យកើតជាបញ្ហាអគ្គិភ័យឆាបឆេះជាយថាហេតុ។
ឯកឧត្តម ហ៊ុន ម៉ាណែត បានអញ្ជើញសំណេះសំណាល សាកសួរសុខទុក្ខជាមួយបងប្អូនប្រជាពលរដ្ឋ សិស្សានុសិស្ស លោកគ្រូអ្នកគ្រូ ដោយភាពស្និទ្ធស្នាល និងរីករាយបំផុត។ ឯកឧត្តត្តមបានបញ្ជាក់បន្ថែមថា អាជ្ញាធរបានយកទុកដាក់យ៉ាងខ្លាំងលើវិស័យអប់រំ។ សុខសន្តិភាព និងស្ថិរភាពសង្គម ជាផ្នែកមួយដ៏សំខាន់មិនអាចកាត់ថ្លៃបានសម្រាប់ការអភិវឌ្ឍ ក្នុងនោះរួមមានការកសាងសមិទ្ធិផល អគារ ផ្លូវ ស្ពានថ្នល់ ហេដ្ឋារចនាសម្ព័ន្ធនានា មានការរីកដុះដាលជាបន្តបន្ទាប់។
ឯកឧត្តម ហ៊ុន ម៉ាណែត ក៏បានអំពាវនាវឱ្យរួមគ្នាថែរក្សាសុខសន្តិភាព ស្ថិរភាពនយោបាយក្រោមការដឹកនាំរបស់លោកនាយករដ្ឋមន្ត្រី ហ៊ុន សែន និងបានជំរុញឲ្យសិស្សានុសិស្សខិតខំប្រឹងប្រែងរៀនសូត្រដើម្បីក្លាយជាទំពាំងស្នងឬស្សី និងក្លាយជាយុវជនគំរូ កូនល្អ សិស្សល្អ មិត្តល្អ និងពលរដ្ឋល្អក្នុងសង្គម៕
