(ខេត្តកែប)៖ មនុស្សប្រុស ស្រី ចំនួន៤នាក់ បានរងរបួសធ្ងន់ និងស្រាល ដេករដូករណែលពេញផ្លូវ ខណៈពេលជួបហេតុការណ៍គ្រោះថ្នាក់ចរាចរ រវាងម៉ូតូនិងម៉ូតូ លើកំណាត់ផ្លូវខ្វែងគ្នាក្នុងភូមិសាស្ត្រក្រុងកែប។
ហេតុការណ៍នេះបានកើតឡើងកាលពីវេលាម៉ោង ១៧និង១០នាទីល្ងាច ថ្ងៃទី១៤ ខែមីនា ឆ្នាំ២០១៩ ត្រង់ចំណុចផ្លូវខ្វែង33Aចូលផ្លូវលំ ស្ថិតក្នុងភូមិថ្មី សង្កាត់ព្រៃធំ ក្រុងកែប ខេត្តកែប។
តាមប្រភពព័ត៌មានពីមន្ត្រីនគរបាលមូលដ្ឋាន បានរៀបរាប់ថា មុនពេលកើតហេតុ មានម៉ូតូ១គ្រឿងម៉ាកC125 ពណ៌ខ្មៅ ផលិតឆ្នាំ២០១៤ ពាក់ស្លាកលេខ កំពត 1I-4323 ជិះគ្នា២នាក់បានបត់ឆ្វេងចូលផ្លូវលំដោយខ្វះការប្រុងប្រយ័ត ទើបជ្រុលទៅបុកជាមួយម៉ូតូ C125 ពណ៌ខ្មៅ ផលិតឆ្នាំ២០១៧ ពាក់ស្លាកលេខ កំពត 1L-6745 ជិះគ្នា២នាក់ដូចគ្នា ដែលបើកចេញពីផ្លូវលំបំណងឡើងផ្លូវជាតិ បណ្តាលឲ្យម៉ូតូទាំងពីរគ្រឿងដួលច្រងាប់ច្រងិល ហើយរងរបួសធ្ងន់និងស្រាលតែម្តង។
សមត្ថកិច្ចបានឲ្យដឹងទៀតថា ភាគីម៉ូតូC125 ផលិតឆ្នាំ២០១៧ អ្នកបើកបរឈ្មោះ ចាន់ ប៊ុនធឿន ភេទប្រុស អាយុ២៨ឆ្នាំ របួសស្រាល រីឯអ្នករួមដំណើរ ឈ្មោះ ហង់ រួយ ភេទស្រី អាយុ៤៩ឆ្នាំ រងរបួសធ្ងន់ អ្នកទាំងពីររស់នៅភូមិកំពង់នង់ ឃុំកូនសត្វ ស្រុកទឹកឈូ ខេត្តកំពត។ ចំណែកភាគី ម៉ូតូបង្កម៉ាកC125ផលិតឆ្នាំ២០១៤ អ្នកបើកបរ ឈ្មោះ ពៅ នូច ភេទប្រុស អាយុ៣០ឆ្នាំ មុខរបរកសិករ រងរបួសស្រាល អ្នករួមដំណើរ ឈ្មោះ អំ ពៅ ភេទស្រី អាយុ៦២ឆ្នាំ រងរបួសធ្ងន់ ទាំងពីរនាក់រស់នៅ ភូមិអូរតូច សង្កាត់អណ្តូងខ្មែរ ក្រុងកំពត ខេត្តកំពត។
ក្រោយពីវាស់វែង មធ្យោបាយពាក់ព័ន្ធទាំងពីរគ្រឿង នគរបាលបាននាំយកទៅរក្សាទុកនៅអធិការដ្ឋាននគរបាលក្រុងកែប សម្រាប់ដោះស្រាយគ្នានៅពេលក្រោយ។ដោយឡែក អ្នករងរបួសត្រូវបានរថយន្តសាមុយ របស់ស្នងការដ្ឋាននគរបាលខេត្តកែប ដឹកទៅសង្គ្រោះនៅឯមន្ទីរពេទ្យបង្អែកខេត្តកំពត៕
សេង ណារិទ្ធ
