ខេត្តបាត់ដំបង ៖ អគ្គីភ័យឆេះអគារស្នាក់នៅរបស់គ្រូមួយខ្នង នៃសាលារៀនអនុវិទ្យារូងជ្រៃ បំផ្លាញការខូចខាត៤បន្ទប់ និងឯកសារសិក្សា សម្ភារៈសិក្សាមួយចំនួន និង សម្ភារៈប្រើប្រាស់មួយចំនួនធំ សង្ស័យមានអ្នកលួចដុត ព្រោះមិនមានមនុស្សស្នាក់នៅទេ កាលពីម៉ោង១៩និង២០នាទីយប់ ថ្ងៃទី៩ ខែតុលា ឆ្នាំ២០១៥ នៅចំណុចក្រុម ៣៣ ភូមិប្រគាប ឃុំរូងជ្រៃ ស្រុកថ្មគោល ខេត្តបាត់ដំបង ។ កម្លាំងអធិការស្រុក និងកម្លាំងកងរាជអាវុធហត្ថស្រុកថ្មគោល.សហការជាមួយកម្លាំងប៉ុស្ត៍បន្សាយត្រែងនិងប្រជាការពារចូលរូមពន្លត់ភ្លើងកំពុងឆេះរាលដាលដល់ផ្ទះប្រជាពលរដ្ឋ ហើយក៏បានហៅរថយន្តពន្លត់អគ្គីភយ័ខេត្តមកជួយចំនួន៣ឡាន តែប្រើទឹកអស់១ឡានទេ។
ប្រជាពលរដ្ឋបញ្ជាក់អោយដឹងថា ៖ កម្លាំងនគរបាលប៉ុស្ត៍រូងជ្រៃក្រោមការដឹកនាំរបស់លោក ឆែម សាមុន នាយប៉ុស្តិ៍ មិនមាននរណាម្នាក់នៅកន្លែងកើតហេតុទេ ដោយមិនខ្វល់ពីទុក្ខលំបាកប្រជាពលរដ្ឋឡើយ ។
កម្លាំងសមត្ថកិច្ចបានអោយដឹងថា អគារស្នាក់នៅរបស់គ្រូមួយខ្នងស្មើ ៤ បន្ទប់ បណ្តោយ២០ម x ៥ម. ត្រូវភ្លើងឆេះអស់គ្មានសល់ សម្ភារៈខូចខាតរួមមាន ឯកសារសិក្សាមួយចំនួនធំ សម្ភារៈសិក្សា នឹងសម្ភារៈប្រើប្រាស់មួយចំនួនធំ គិតជាប្រាក់សរុបការខូចខាតប្រហែលជិត១០០០០ដុល្លា(មួយម៉ឺនដុល្លា)។
សមត្ថកិច្ចបានបញ្ជាក់់ថា នៅពេលកើតហេតុ នៅក្នុងបរិវេណសាលារៀនអនុវិទ្យារូងជ្រៃ មិនមានភ្នក់ភ្លើង ពេលលោកគ្រូអ្នកគ្រូស្នាក់នៅមានភ្លើងអគ្គិសនី តែពេលពួកគាត់់ទៅផ្ទះគាត់បិទគប់ (ព្រីភ្លើង) ដូច្នេះករណីឆេះអគារខាងលើសង្ស័យមានគេលួចដុត ដោយខឹងនាយកសាលា ឬគ្រូបង្រៀននៅទីនោះ ដោយប្រការណាមួយជាក់ជាពុំខាន ៕
