ព្រៃវែង៖ នារសៀលថ្ងៃសៅរ៍ ៩កើត ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៩ ខែវិច្ឆិកា ឆ្នាំ២០២៥នេះ លោក ជា សុមេធី ប្រធានគណៈកម្មាធិការគណបក្សក្រសួងសង្គមកិច្ច អតីតយុទ្ធជន និងយុវនីតិសម្បទា អនុប្រធានក្រុមការងារគណបក្សចុះមូលដ្ឋានខេត្តព្រៃវែង និងជាប្រធានក្រុមការងារចុះមូលដ្ឋានស្រុកពាមជរ បានអញ្ជើញសំណេះសំណាលជាមួយថ្នាក់ដឹកនាំ និងសមាជិក សមាជិកាគណបក្ស និង ពិនិត្យវឌ្ឍនភាពការងាររយៈពេល៩ខែ ដើម្បីក្តាប់សភាពការណ៍មូលដ្ឋាន ដោយមានការអញ្ជើញចូលរួមពីសមាជិកា សមាជិកាជាង ១០០នាក់ នៅទីស្នាក់ការគណបក្សប្រជាជនកម្ពុជាស្រុកពាមជរ។
របាយការណ៍គណបក្សប្រជាជនកម្ពុជាស្រុកពាមជរ បានបង្ហាញថា រយៈពេល៩ខែឆ្នាំ២០២៥នេះ ក្រុមការងារ និងគណបក្សនៅមូលដ្ឋាន បានចុះធ្វើសកម្មភាពយ៉ាងសស្រាក់សស្រាំមានចំនួន ១១៤លើក។ តាមរយៈសកម្មភាពទាំងនេះ បានរួមចំណែកដ៏សំខាន់ក្នុងការដោះស្រាយបញ្ហានៅមូលដ្ឋាន។
លោក ជា សុមេធី បានវាយតំលៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារឃុំ ភូមិ និងក្រុមការងារចុះជួយទាំងអស់ ដែលបានចំណាយពេលវេលា កំលាំង កាយ ប្រាជ្ញាស្មារតី និងថវិកា ដើម្បីចុះជួយគាំទ្រដល់មូលដ្ឋានក្នុងការបំរើប្រជាពលរដ្ឋ កសាងហេដ្ឋារចនា សម្ព័ន្ធទាំងផ្នែកអាណាចក្រ និងពុទ្ធចក្រ ធ្វើឱ្យមូលដ្ឋានកាន់តែរីកចំរើន។ លោក ក៏បានអរគុណគណៈកម្មាធិការ គណបក្សស្រុក ឃុំ ភូមិ ដែលបានខិតខំផ្តល់សេវាល្អប្រសើរជូនប្រជាពលរដ្ឋ។
ក្នុងឱកាសនោះ លោក ជា សុមេធី ក៏បានលើកបង្ហាញពីសភាពការណ៍ព្រំដែនកម្ពុជា-ថៃ ដោយគូសរំលេចពីការប្រឹងប្រែងរបស់សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា និងសេនាធិការក្នុងការដោះស្រាយបញ្ហាទប់ស្កាត់ការផ្ទុះអាវុធ ដើម្បីធានាឱ្យបាននូវសុខសុវត្ថិភាពជូនប្រជាពលរដ្ឋនៅតាមបន្ទាត់ព្រំដែន។ លោក ជា សុមេធី ទន្ទឹមនឹងការប្រឹងប្រែងដោះស្រាយបញ្ហាបញ្ចៀសការផ្ទុះអាវុធ តែរាជរដ្ឋាភិបាលប្រកាន់ខ្ជាប់នូវស្មារតីធានាការពារឱ្យបាននូវបូរណភាពទឹកដី និងអធិបតេយ្យជាតិ។
ក្នុងឱកាសនោះលោក ជា សុមេធី ក៏បានក្រើនរំលឹកដល់ក្រុមការងារចុះជួយស្រុកពាមជរ និងក្រុមការងារបក្សនៅមូលដ្ឋាន បន្តយកចិត្តទុកដាក់លើការងារ និងដោះស្រាយបញ្ហាប្រជាពលរដ្ឋនៅមូលដ្ឋានឱ្យកាន់តែសកម្មថែមទៀត។
ក្រៅពីសំណេះសំណាលជាមួយសមាជិក សមាជិកាបក្សហើយនោះ នៅរសៀលថ្ងៃដដែលនេះ លោក ជា សុមេធី អមដោយប្រធាន អនុប្រធានក្រុមការងារចុះជួយឃុំទាំ១០ ប្រធានគណៈកម្មាធិការគណបក្សស្រុក ប្រធាន-អនុប្រធានគណៈកម្មាធិការគណបក្សឃុំ បានអញ្ជើញជាអធិបតីក្នុងពិធីបញ្ចុះបឋមសិលា សាងសង់អគារទីស្នាក់ការគណបក្សឃុំកោះចេកផងដែរ។
លោក សុខ ប៊ុនថា ប្រធានក្រុមការងារគណបក្សចុះមូលដ្ឋានជួយឃុំកោះចេក បានបញ្ជាក់ថា ស្នាក់ការគណបក្សឃុំកោះចេកនឹងធ្វើការសាងសង់លើផ្ទៃដីទំហំ ២០ម៉ែត្រ គុណ ៣០ម៉ែត្រ មានទំហំអគារ ៨ម៉ែត្រ គុណ ១៦ម៉ែត្រ ធ្វើពីបេតុង ប្រក់ក្បឿង។ អគារនេះ រួមមានសាលប្រជុំ, អគារស្នាក់នៅ, អគារប្រចាំការ, កញ្ចុះហូបបាយ, បន្ទប់អនាម័យ, ស៊ីទែនទឹក, និងមានការងារជីកស្រះទឹកផងដែរ។ ការងារសាងសង់សម្រេចបានប្រមាណ ៥៤ភាគរយហើយ គ្រោងបញ្ចប់ការសាងសង់នៅពាក់កណ្តាលឆ្នាំ២០២៦។ អគារនេះគ្រោងចំណាយថវិកាប្រមាណ ៤ម៉ឺនដុល្លាសហរដ្ឋអាម៉េរិក៕
