(ខេត្តស្វាយរៀង)៖ ប្រមុខរាជរដ្ឋាភិបាលកម្ពុជាបានដាក់ចេញនូវគោលនយោបាយភូមិ ឃុំ សង្កាត់មានសុវត្ថិភាពទាំង៧ចំណុចឱ្យមន្ត្រីថ្នាក់ក្រោមជាតិអនុវត្តទប់ស្កាត់ និងបង្ក្រាបរាល់ល្បែងស៊ីសង គ្រប់ប្រភេទនូវទូទាំងប្រទេសឱ្យមានប្រសិទ្ធភាពប៉ុន្តែអាជ្ញាធរនិងសមត្ថកិច្ចមូលដ្ឋាន បែរជាបណ្តោយឱ្យម្ចាស់ កាស៊ីណូ ៦៧ មួយកន្លែងនេះបើកឱ្យជនជាតិវៀតណាមនិងពលរដ្ឋខ្មែរចូលលេងល្បែងស៊ីសង (បញ្ជល់មាន់ ) ខុសច្បាប់ យ៉ាងគគ្រឹកគគ្រេងបង្កភាពអនាធិបតេយ្យទៅវិញ។
ប្រភពច្បាស់ការណ៍ពីប្រជាពលរដ្ឋដែលរស់នៅក្នុងមូលដ្ឋាននោះបានឱ្យដឹងថា ម្ចាស់កាស៊ីណូ ៦៧នៅជិតច្រកទ្វារព្រំដែនសំរោង(ហៅច្រកសៀងហៃ)ស្រុកចន្ទ្រាខេត្តស្វាយរៀងបានឱ្យមេការគៀងគរពលរដ្ឋខ្មែរនិងវៀតណាមឱ្យមកជួបជុំគ្នាមកលេងល្បែងសុីសងបញ្ចល់មាន់ដោយសេរីភ្នាល់ដាក់លុយ ចាញ់ឈ្នះ រាប់លានរៀលដល់រាប់ពាន់ដុល្លារ ហើយនាំគ្នាស្រែកហ៊ោកញ្ជ្រៀវ ទ្រហឹង អឺងកង បង្កការភ្ញាក់ផ្អើលដល់ប្រជាពលរដ្ឋដែលពួកគាត់រស់នៅទីនោះ មានការព្រួយបារម្ភអំពីបញ្ហាអសន្តិសុខខ្លាចកើតមាននូវអំពើចោរកម្ម និងបទល្មើសផ្សេងៗដូចជា លួច ឆក់ ប្លន់ និងអំពើហិង្សា ក្នុងគ្រួសារ ជាដើម។ល។
អ្នកច្បាប់ក៏ដូចជាមហាជនទូទៅធ្លាប់បានដឹងហើយថាគោលការណ៍(កាស៊ីណូ)នីមួយៗនៅប្រទេសកម្ពុជា គេមិនតម្រូវឱ្យពលរដ្ឋខ្មែរចូលលេងល្បែងស៊ីសងនោះទេ ក្នុងនោះបើមានពលរដ្ឋខ្មែរសុំចូលបម្រើការងារឬមួយសុំច្បាប់អាជីវកម្មបើក(កាស៊ីណូ) ជារឿងត្រឹមត្រូវតែបើឱ្យពលរដ្ឋខ្មែរចូលលេងល្បែងស៊ីសងទាំងនោះគឺជារឿងខុសច្បាប់មួយរយភាគរយ។
ដូច្នេះហើយប្រជាពលរដ្ឋក៏ដូចជាមហាជនទូទៅបានសំណូមពរទៅដល់ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀងនិងលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀងជាពិសេសឯកឧត្តម នាយឧត្តមសេនីយ៍ សន្តិបណ្ឌិត ស ថេត អគ្គស្នងការនគរបាលជាតិ សូមជួយពិនិត្យនឹងចាត់វិធានការតាមផ្លូវច្បាប់ចំពោះបនល្បែងស៊ីសងបញ្ច្ជល់មាន់ដែលនៅក្នុង កាស៊ីណូ៦៧នៅជិត
ច្រកទ្វារព្រំដែនសំរោង(ហៅច្រកសៀងហៃ)មួយកន្លែងដែលស្ថិតក្នុងភូមិសាស្រ្តខាងលើនេះផងទាន៕
