(ភ្នំពេញ)៖ លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ បានណែនាំឲ្យមន្ត្រីបក្សមូលដ្ឋានទាំងអស់ ខិតខំផ្សព្វផ្សាយឲ្យប្រជាពលរដ្ឋ ចូលរួមជាមួយអាជ្ញាធរដើម្បីធ្វើយ៉ាងណា នៅសង្កាត់ចោមចៅទី១ និងសង្កាត់ចោមចៅទី២ ខណ្ឌពោធិ៍សែនជ័យនេះ មិនឲ្យមានការលិចលង់ជំនន់ទឹកភ្លៀង តាមរយៈការមិនបោះសំរាម ចូលក្នុងលូ និងប្រឡាយទឹក។
ការណែនាំបែបនេះ របស់លោក ឃួង ស្រេង បានធ្វើឡើង ក្នុងពិធីសំណេះសំណាលជាមួយសមាជិក សមាជិកា គណៈកម្មាធិការគណបក្ស សង្កាត់ចោមចៅទី១ និងសង្កាត់ចោមចៅទី២ ខណ្ឌពោធិ៍សែនជ័យ នាព្រឹកថ្ងៃទី១៨ ខែតុលា ឆ្នាំ២០២៥នេះ នៅទីស្នាក់ការគណបក្សប្រជាជនកម្ពុជា ខណ្ឌពោធិ៍សែនជ័យ។
លោក ឃួង ស្រេង បានធ្វើការណែនាំឲ្យមន្ត្រីគណបក្សមូលដ្ឋាន ត្រូវបន្តធ្វើការងារបម្រើសេវាសាធារណៈ និងផ្ដល់សេវាសាធារណៈឲ្យលឿនឲ្យល្អ ចូលរួមកសាងហេដ្ឋារចនាសម្ព័ន្ធប្រព័ន្ធប្រឡាយ លូ ផ្លូវ ភ្លើងជូនប្រជាពលរដ្ឋឲ្យបានល្អ, ហើយណែនាំឲ្យប្រជាពលរដ្ឋទុកដាក់សំរាម និងសំណល់រឹងឲ្យបានល្អ។ លោកបញ្ជាក់ថា មន្ត្រីបក្សត្រូវតាមដានស្ដាប់ឲ្យបាននូវឧបាយកលរបស់គណបក្សដ៏ទៃ។ ត្រូវធ្វើកិច្ចការគ្រប់បែបយ៉ាង បម្រើប្រជាពលរដ្ឋឲ្យកាន់តែល្អឲ្យគាត់ពេញចិត្តពេញថ្លើម បន្តគាំទ្រគណបក្សប្រជាជនកម្ពុជា កាន់តែច្រើនឡើងថែមទៀត ហើយឈានទៅទទួលជ័យជំនះ ក្នុងការឈ្នះឆ្នោតនៅឆ្នាំ២០២៧ និងឆ្នាំ២០២៨ខាងមុខនេះបន្តទៀត។
លោកបន្តថា យើងត្រូវបន្តរួមគ្នា ធ្វើយ៉ាងណាឲ្យគណបក្សប្រជាជនកម្ពុជា ដឹកនាំប្រទេសជាតិជារៀងរហូត និងសម្រេចបាននូវចក្ខុវិស័យ ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០ ដែលនេះជាបំណងប្រាថ្នាចង់បានរបស់ប្រជាពលរដ្ឋខ្មែរគ្រប់រូប ហើយយើងនឹងទៅដល់ចំណុចនោះដោយយើងមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។
លោក ឃួង ស្រេង បានលើកឡើងទៀតថា យើងពិតជាមានមោទនភាព ដែលកម្ពុជាមានថ្នាក់ដឹកនាំដ៏ឆ្នើមនោះ គឺសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានប្តេជ្ញាចិត្តយ៉ាងដាច់ខាត ក្នុងកិច្ចការពារបូរណៈភាពទឹកដី មិនឲ្យបាត់បង់មួយមីលីម៉ែត្រឡើយ។ លោក ឃួង ស្រេង បានបញ្ជាក់ទៀតថា សម្តេចតេជោ ហ៊ុន សែន បានមានប្រសាសន៍ថា បើបងប្អូនប្រជាពលរដ្ឋយើងស្រឡាញ់ជាតិ «កុំប្រើប្រាស់លុយបាតនិងទំនិញរបស់ថៃ»។
លោក ឃួង ស្រេង បានបន្ដថា ការស្នើសុំបញ្ហាកង្វះខាតផ្សេងៗទៀត មន្ត្រីបក្សមូលដ្ឋានទាំងអស់ អាចរាយការណ៍ស្នើសុំមករដ្ឋបាលខណ្ឌ និងរដ្ឋបាលរាជធានីភ្នំពេញភ្លាម តាមរយៈប្រព័ន្ធបច្ចេកវិទ្យាតេឡេក្រាម បានវាលឿនកុំចាំបាច់ដល់មានវេទិកា ការសំណេះសំណាល ឬកិច្ចប្រជុំផ្សេងៗទើបស្នើសុំនោះ។ ជាមួយគ្នានោះ លោក ឃួង ស្រេង ក៏បានថ្លែងនូវការអរគុណផងដែរចំពោះ មន្ត្រីគណបក្សខណ្ឌ សង្កាត់ ក្នុងខណ្ឌពោធិ៍សែនជ័យ ដែលបានរួមចំណែក ធ្វើឲ្យគ្រប់នៃការបោះឆ្នោតទទួលជ័យជំនៈរហូតមក។
ក្នុងឱកាសនោះ ទាំងចៅសង្កាត់ និងមេភូមិនីមួយៗ នៅសង្កាត់ចោមចៅទី១ និងចោមចៅទី២ ក៏បានលើកឡើងពីសមិទ្ធផលរបស់បក្សដែលសម្រេចបាន ជាមួយនិងការលើកឡើងពីផែនការសកម្មភាព ដែលបាននិងកំពុងអនុវត្តដូចជាការខិតខំកសាងសមាជិកបក្ស ការរក្សាសន្តិសុខ សណ្តាប់ធ្នាប់ជូនប្រជាពលរដ្ឋ៕
