រតនគិរី៖ អ្នកតំណាងរាស្ត្រមណ្ឌលរតនគិរី បានស្នើឲ្យអាជ្ញាធរមានសមត្ថកិច្ចគ្រប់លំដាប់ថ្នាក់ក្នុងស្រុកកូនមុំ ខេត្តរតនគិរី ប្រើប្រាស់កម្លាំងសរុប មធ្យោបាយសរុប អន្តរាគមន៍ជួយប្រជាពលរដ្ឋដែលកំពុងរងផលប៉ះពាល់ ពីជំនន់ទន្លេស្រែពក។
ការស្នើរបស់លោក គិត ទ្រី តំណាងរាស្រ្តយ៉ាងដូច្នេះធ្វើឡើងក្នុងឱកាស ដែលលោកអញ្ជើញចុះពិនិត្យស្ថានភាព ទឹកជំនន់ នៅឃុំសិរីមង្គល ស្រុកកូនមុំ ខេត្តរតនគិរី នៅព្រឹកថ្ងៃទី២៥ ខែកញ្ញា ឆ្នាំ២០២៥។
លោកតំណាងរាស្រ្តរូបនេះ បានអំពាវនាវបងប្អូនប្រជាពលរដ្ឋត្រូវមានស្មារតីប្រុងប្រយ័ត្នខ្ពស់ចំពោះទឹកជំនន់ ដែលកំពុងជន់ឡើងខ្លាំងនេះ និងសូមស្វែងរកទីទួលមានសុវត្ថិភាព ពិសេសប្រុងប្រយ័ត្នចំពោះកុមារតូចៗ និងរក្សាអនាម័យឱ្យបានត្រឹមត្រូវ។
ជាងនេះទៅទៀតអាជ្ញាធរ មានសមត្ថកិច្ចគ្រប់លំដាប់ថ្នាក់ ត្រូវយកចិត្តទុកដាក់តាមដាន ក្តាប់ព័ត៌មានអំពីសភាពការណ៍គ្រោះធម្មជាតិ ស្ថានភាពរបស់ប្រជាពលរដ្ឋ ត្រៀមមធ្យោបាយអន្តរាគមន៍បានទាន់
ពេលវេលាប្រសិនបើភ្លៀងនៅតែបន្តធ្លាក់។
យោងតាមរបាយការណ៍របស់រដ្ឋបាលស្រុកកូនមុំបានបង្ហាញថាស្រុកកូនមុំមានឃុំចំនួន៥ ដែលកំពុងរងផលប៉ះពាល់ពីជំនន់នេះ រួមមាន៖ឃុំសិរីមង្គល រងផលប៉ះពាល់ចំនួន៣ភូមិ, ឃុំស្រែអង្រ្គងចំនួន២ភូមិ, ឃុំតាអង២ភូមិ, ឃុំត្រពាំងច្រេស១ភូមិ និងឃុំត្រពាំងក្រហម៣ភូមិ។
សូមបញ្ជាក់ថា បើយោងតាមរបាយការណ៍របស់មន្ទីរធនធានទឹក និងឧតុនិយមខេត្ត ស្ថានភាពទឹកទន្លេសេសាន និងទន្លេស្រែពក គិតត្រឹមព្រឹកម៉ោង១០៖០០នាទី ថ្ងៃទី២៥ ខែកញ្ញា ឆ្នាំ២០២៥ គឺភ្លៀងនៅបន្តធ្លាក់ខ្លាំងបន្ថែមទៀត ធ្វើឲ្យទឹកទន្លេស្រែពកហក់ឡើងខ្ពស់៖
*ទី១៖ កម្ពស់ទឹកទន្លេស្រែពក នៅស្រុកលំផាត់មានកម្ពស់ ១៣.៥២ម៉ែត្រ លើសកម្រិតកម្ពស់ប្រកាសអាសន្ន ១.០២ម៉ែត្រ។ (កម្រិតកម្ពស់ប្រកាសអាសន្ន ១២.៥០ម៉ែត្រ)។ ទឹកបានជន់លិចចូលតំបន់ទំនាបៗ និងផ្ទះប្រជាពលរដ្ឋ វត្ត សាលារៀន ដីស្រែចំការ និងហេដ្ឋារចនាសម្ព័ន្ធផ្លូវថ្នល់មួយចំនួន នៅតាមបណ្ដាភូមិឃុំ នៃស្រុកលំផាត់ និងស្រុកកូនមុំ ដែលស្ថិតនៅតាមបណ្ដោយដងទន្លេស្រែពក កាន់តែមានទំហំធំ។
*ទី២៖ កម្ពស់ទឹកទន្លេ សេសានមាន ៤ស្រុកនៅតាមបណ្ដោយដងទន្លេ ស្រុកផ្នែកខាងលើដែលជាប់ព្រំដែនវៀតណាមគឺ (ស្រុកអូរយ៉ាដាវ និងស្រុកអណ្ដូងមាស)។ នៅផ្នែកខាងក្រោមគឺ ស្រុកតាវែង និងស្រុកវើនសៃ ទឹកបានស្រកចុះហើយ។ ក្រុមការងារមន្ទីរធនធានទឹកខេត្ត បន្តតាមដានយ៉ាងយកចិត្តទុកដាក់ ដោយសហការជាមួយអាជ្ញាធរមូលដ្ឋាន ដើម្បីជម្លៀសនូវសម្ភារ មធ្យោបាយ សត្វពាហនៈ មកទីទួលសុវត្ថិភាពជាមុនបណ្តើរៗហើយ៕
