ខេត្តត្បូងឃ្មុំ ៖ ប្រភពបានទម្លាយចេញពីមន្ត្រីគយប្រចាំការច្រកទ្វារ ត្រពាំងផ្លុងឲ្យដឹងថា លោក ប៉ុន ប៊ុណ្ណា ប្រធានការិយាល័យគយច្រកទ្វារអន្តរជាតិត្រពាំងផ្លុង ហើយបច្ចុប្បន្ននេះកំពុងប្រព្រឹត្តអំពើពុករលួយ។ជាពិសេសលោកប្រធាន ច្រករូបនេះ ពុំបានខិតខំពង្រឹងនិងធ្វើការប្រមូលពន្ធតាមជំនាញបច្ចេកទេស នោះទេ បែរជាទៅឃុបឃិត ធ្វើតាមរយៈការរួមដៃជាមួយមេឈ្មួញរកស៊ីធំៗ ជាច្រើនរូបបំបាត់កិបកេងនូវចំណូលថវិកាបង់ពន្ធចូលរដ្ឋ ដោយមិនខ្វល់ពីការកែទម្រង់របស់ក្រសួងសេដ្ឋកិច្ច និងហិរញ្ញវត្ថុ និងរាជរដ្ឋាភិបាល អ្វីបន្តិចទាល់តែសោះ។
ប្រភពពីមន្ត្រីគយដដែលបន្តថា ពួកគាត់ចោទប្រកាន់លោក ប៉ុន ប៊ុណ្ណា គឺមានភស្តុតាងគ្រប់គ្រាន់ ដោយសារពីមុនមកច្រកទ្វារអន្តរជាតិមួយនេះ ប្រមូលពន្ធបានចំនួន ១១ ពាន់លានរៀល ទៅ ១៤ ពាន់លានរៀល ក្នុងមួយខែ។ ប៉ុន្តែក្រោយពេលលោក ប៉ុន ប៊ុណ្ណា ចូលកាន់តំណែងកាលពីថ្ងៃទី២៨ ខែមិថុនា ឆ្នាំ២០១៤ គឺចំណូលពន្ធតាមច្រកទ្វានេះ បានធ្លាក់យ៉ាងគំហុករហូត មានចំនួនត្រឹមតែជាង ៦ ពាន់លានរៀល ទៅ៨ពាន់លានរៀលតែប៉ុណ្ណោះ។ ទាំងនេះ គឺដោយសារបច្ចុប្បន្នលោក ប៉ុនប៊ុណ្ណា កំពុងងុបងុលសប្បាយកើបលុយ និងការឃុបឃិតកេងប្រវ័ញ ជាមួយឈ្មួញ ដោយមិនធ្វើការប្រមូលពន្ធតាមលក្ខណៈបច្ចេកទេសឲ្យបានត្រឹមត្រូវ។
មន្ត្រីគយដដែលបានបង្ហាញឯកសារថាមានឈ្មោះម្ចាស់ក្រុមហ៊ុនដូចជា ក្រុមហ៊ុនដឹកទំនិញយាយញាប់, ក្រុមហ៊ុនដឹកទំនិញ ស៊ុន ហួរ, ក្រុមហ៊ុនដឹកទំនិញ ហាក់ ម៉ៅ, ក្រុមហ៊ុនដឹកទំនិញ ឆេង ទី និងក្រុមហ៊ុនដឹកទំនីញ ទីខ្មូត បាននាំចូលទំនិញ តាមច្រកទ្វារអន្តរជាតិត្រពាំងផ្លុង គឺឃុបឃិតគ្នាវាយតម្លៃពន្ធទាប និងបង់ពន្ធមិនគ្រប់ចំនួន ហើយនៅមានឈ្មួញជាច្រើនទៀតបានឃុបឃិតជាមួយលោកមេគយ ប៉ុន ប៊ុណ្ណា កេងបន្លំពន្ធទៅលើមុខទំនិញដែលពួកគេបាននាំចូលពីប្រទេសវៀតណាម តាមច្រកត្រពាំងផ្លុង ក៏ដូចជាការនាំទំនិញចេញពីកម្ពុជាផងដែរ។
ប្រភពពីមន្ត្រីគយ បានលើកឡើងបន្ថែមថា តារាងតម្លៃ (ក្រដាសបញ្ជី) អត្រាពន្ធ៧ភាគរយ ឡានតូចត្រូវបង់ពន្ធ៩លានរៀល បង់ថ្លៃបាយ៥លានរៀល។ អត្រាពន្ធ១៥ភាគរយ ឡានតូចបង់ពន្ធ១០លានរៀល ថ្លៃបាយ៥លានរៀល ទំនិញចាប់ហ៊ួយបូក អត្រាពន្ធ៣៥ភាគរយ ឡានតូចបង់ពន្ធ២២លានរៀល ថ្លៃបាយ ៥លានរៀល ឡានតូចដូចគ្នាដែរ បង់ពន្ធ ៨,៥លានរៀល ថ្លៃបាយ១១លានរៀល សសេរទំនិញផ្សេងៗអត្រា៧ភាគរយ កង់ឡាន ឡានតូចបង់ពន្ធ២២លានរៀល ថ្លៃបាយ៥លានរៀល ត្រូវសសេរជាកង់ឡាន ហើយប្រេងម៉ាស៊ីន (២០) បូកផ្សេងៗ ឡានធំ បង់ពន្ធ៩លានរៀល ថ្លៃបាយ ១៥លានរៀល។
ចំពោះទំនិញមានអត្រាពន្ធខ្ពស់បង្កប់ជាមួយ ទំនិញមានអត្រាពន្ធទាប ត្រូវគិតបង់ពន្ធ និងថ្លៃបាយតាមទំនិញអត្រាខ្ពស់។ ទំនិញ (ចាប់ហ៊ួយ បូកអត្រាពន្ធ ៣៥ភាគរយ) ចំនួន៣កុងតឺន័រ ត្រូវសសេរពន្ធ២២លានរៀល ឡានតូច១កុងតឺន័រ និង២កុងតឺន័រទៀត សសេរជាទំនិញផ្សេង បង់ពន្ធ ៨,៥លានរៀលឡានតូច។ ក្រៅពីទំនិញខាងលើ ដែលឈ្មួញបានបង់ពន្ធ និងថ្លៃបាយឲ្យលោកមេគយ ប៉ុន ប៊ុណ្ណា ក៏នៅមានទំនិញផ្សេងៗទៀត ដែលមេគយច្រកទ្វាររូបនេះ បង្ខំឲ្យអ្នករកស៊ីតូចតាច បង់លុយឲ្យខ្លួនតាមតែទំនើងចិត្ត។ ក្នុងនោះដូចជាឡានដឹក ថ្នាំជក់មួយគ្រឿងបង់ង៣០ដុល្លារ, រថយន្តដឹកឈើកៅស៊ូ បង់៩០ដុល្លារ, រថយន្តដឹកចំណីសត្វបង់ ៣០ដុល្លារ ពិសេសរថយន្តដឹកដំឡូងមី មួយគ្រឿងត្រូវលោក ប៉ុន ប៊ុណ្ណា ជម្រិតទារលុយ ពី៣ម៉ឺន ទៅ៥ម៉ឺនរៀល ហើយក្នុងមួយថ្ងៃ មានរថយន្តដឹកកសិផលនាំចេញតាមច្រកទ្វារប្រពាំងផ្លុង មិនតិចជាង៣០០ទៅ៤០០គ្រឿងនោះទេ។
ដោយឡែក លុយដាក់ចូលកេះខ្មៅ (លុយសន្សំសម្រាប់ផ្តល់ជូនមន្ត្រីគយ) ត្រូវលោក ប៉ុន បុណ្ណា ដកយកក្នុងមួយថ្ងៃ ពី៦០០ដុល្លារ ទៅ៨០០ដុល្លារ ដោយនិយាយប្រាប់មន្ត្រីគយថ្នាក់ក្រោមថា យកទៅជូនឲ្យមេៗថ្នាក់លើ ហើយលុយដែលសន្សំនេះ ពុំដែលសល់បានចែកដល់មន្ត្រីគយនៅប្រចាំការនោះទេ។ បើអ្នកណាហ៊ានសួរ លោក ប៉ុន ប៊ុណ្ណា តែងគម្រាមរករឿងដោះដូរ ឬដកឲ្យទៅអង្គុយអានកាសែត ស្ងៀមតែម្តង។
ជាមួយនឹងបញ្ហានេះ មន្ត្រីគយដែលរងការគៀបសង្កត់ បានសំណូមពរយ៉ាងទទូចដល់រាជរដ្ឋាភិបាល, លោករដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ជាពិសេសអគ្គនាយកគយ និងអង្គភាពប្រឆាំងអំពើពុករលួយ មេត្តាមានវិធានការចាត់តាំងមន្ត្រីជំនាញចុះទៅអង្កេតស្រាវជ្រាវពី ការដឹកនាំ និងសកម្មភាពការងារកិបកេង ឥតសំចៃ ដែលកំពុងធ្វើឲ្យប៉ះពាល់ និងបាត់បង់ចំណូលពន្ធរដ្ឋ ពិសេសលោក ប៉ុន ប៊ុណ្ណា កំពុងបង្កភ្យុះភ្លៀងធ្វើឲ្យមានការលំបាក និងបែកបាក់សាមគ្គីដល់មន្ត្រីថ្នាក់ក្រោម នៅក្នុងច្រកទ្វារត្រពាំងផ្លុងនេះផងដែរ។ទង្វើនេះ គប្បីលោកអគ្គនាយកគយ និងរដ្ឋករ ក៏ដូចជា លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ចុះស៊ើបអង្កេត និងស្រាវជ្រាវបញ្ហាពុកផុយនេះផង។
ជុំវិញការលើកឡើងខាងលើសារពត៌មានយើង នៅមិនទាន់មានការបកស្រាយបែបណាពីលោក ប៊ុន ប៊ុណ្ណា ប្រធានច្រកទ្វារត្រពាំងផ្លុង បានឡើយ៕
