ខេត្តប៉ៃលិន៖ ឈើប្រណិតប្រភេទបេង, ធ្នុង និង នាងនួន ចំនួន១១៦ ដុំ/សន្លឹក ត្រួវបានកម្លាំងនគរបាលចំរុះខេត្ត ដឹកនាំដោយលោក ហ៊ឹង គឹមថុល ព្រះរាជអាជ្ញារងខេត្តប៉ៃលិន លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន បានធ្វើការរិបអួស និងបង្ក្រាប ព្រមទាំងឃាត់ខ្លួនជនសង្ស័យម្នាក់កាលពីវេលាម៉ោង ១៥:២០ នាទីរសៀលថ្ងៃទី០២ ខែតុលា ឆ្នាំ២០១៥ ស្ថិតក្នុងភូមិផ្សារព្រំ(ដីថ្មី) ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពព័ត៌មានពីសមត្ថកិច្ចនគរបាលខេត្ត បានឲ្យដឹងថា៖ មុនឈានដល់ការចុះបង្ក្រាបនេះ គឺដោយមានសេចក្តីរាយការណ៏ពីបណ្តាញសំងាត់ថាមានកន្លែងស្តុកឈើខុសច្បាប់មួយកន្លែងនៅចំណុចផ្ទះរបស់លោកស្រី ពៅ វណ្ណារី ស្ថិតក្នុងភូមិផ្សារព្រំ(ដីថ្មី) ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពបន្តថា៖ ដោយមានដឹកនាំផ្ទាល់ ពីព្រះរាជអាជ្ញារង ព្រមទាំង លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន កម្លាំងនគរបាលចំរុះ បានធ្វើការចុះបង្ក្រាបទីតាំងស្តុកឈើខុសច្បាប់ខាងលើ ក្នុងនោះសមត្ថកិច្ចរិបអួសបានឈើប្រភេទ(បេង, ធ្នុង និង នាងនួន) ចំនួន ១១៦ ដុំ/សន្លឹក និងឃាត់ខ្លួនជនសង្ស័យបានចំនួន ០១នាក់ព្រមទាំងរថយន្តសំរាប់ដឹកឈើមួយគ្រឿងផងដែរ ។
ចំពោះឈ្មោះជនសង្ស័យ មិនត្រួវបានស្គាល់អត្តសញ្ញាណ ហាក់បីជាមានអាថ៌កំបាំងត្រួវលាក់លៀម ដោយប្រភពព័ត៌មានមួយបានបង្ហើបឲ្យដឹងថា៖ ទីតាំងខាងលើជាកន្លែងលួចលាក់ឈើប្រណិត ដែលមានខ្សែរអ្នកធំនៅពីក្រោយ ។ បច្ចុប្បន្នវត្ថុតាងឈើ និងរថយន្ត ត្រួវបានសមត្ថកិច្ចជំនាញកំពុងក៏សាងសំណុំរឿងទៅតាមនិតិវិធីច្បាប់ ៕
