កាលពីថ្ងៃទី ៣០ ខែកញ្ញា ឆ្នាំ២០១៥ ក្នុងពិធីប្រកាសផ្លាស់ប្តូរមុខងារ និង បំពាក់ឋានន្តរស័ក្តិជូននាយទាហាន ក្នុងតំបន់ប្រតិបត្តិការសឹករងខេត្តមណ្ឌលគីរី ក្រោមអធិបតីភាព លោកឧត្តមសេនីយ៍ឯក ហួត ឈាង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី ១ បានមានប្រសាសន៍ថា កងកម្លាំងប្រដាប់អាវុធមានតួនាទីយ៉ាងសំខាន់ក្នុងការការពាររដ្ឋាភិបាលស្របច្បាប់ ដែលកើតចេញពីការបោះឆ្នោតរបស់ប្រជាពលរដ្ឋ និងការពាររដ្ឋធម្មនុញ្ញព្រះមហាក្សត្រ ។
ក្នុងឱកាសនោះដែរលោកមេបញ្ជាការបានកោតសរសើរដល់មេបញ្ជាការតំបន់ប្រតិបត្តិការសឹករងមណ្ឌលគីរី រយៈពេល ៨ទៅ៩ខែប៉ុណ្ណោះ ដឹកនាំបានល្អ និងកសាងអភិវឌ្ឍន៍អ៎ង្គភាពមានការរីកចំរើនពីមួយថ្ងៃទៅមួយថ្ងៃ មិនថា ក្នុងតំបន់ប្រតិបត្តិការ និងសឹករងតាមបណ្តាស្រុកនោះទេ ទើបថ្ងៃនេះមានការតម្លើង និងបំពាក់ឋានន្តរស័ក្តិជូនដល់នាយ និងពលទាហានជិត ១០០នាក់ ។
លោកមេបញ្ជាការរងបានបន្តថា កងខេមរភូមិន្ទត្រូវចេះយុទ្ធសាស្ត្រគ្រប់ជំនាញរបស់កងទ័ពនិងបន្តអនុវត្តភារកិច្ច របស់ក្រសួងការពារជាតិ ក្នុងការហ្វឹកហ្វឺននាយ និងពលទាហានក្នុងតំបន់ប្រតិបត្តិការសឹករងមណ្ឌលគីរី រយៈពេល ៤៥ថ្ងៃ ត្រូវត្រៀម និងរៀបចំកន្លែងហ្វឺកហាត់កន្លែងស្នាក់នៅ និងឧបករណ៍ហ្វឹកហាត់ ព្រោះមានលំហាត់ដូចជា លូន ក្រោមខ្សែលួសឡើងខ្សែពួរ ៘
កងទ័ពត្រូវពង្រឹងសមត្ថភាព និងការពារសន្តិសុខ សណ្តាប់ធ្នាប់នៅតាមខ្សែបន្ទាត់ព្រំដែនកុំឱ្យមានក្រុមអគតិមួយ ចំនួនដើរញុះញង់បង្កឱ្យមានជម្លោះ ព្រោះបញ្ហាព្រំដែនត្រូវបានបញ្ចប់ បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រី បានឱ្យអ្នកជំនាញផ្ទៀងផ្ទាត់និងបកស្រាយច្បាស់លាស់អស់ហើយ ។/
