(ព្រះវិហារ)៖ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានណែនាំដល់មន្ត្រីសុខាភិបាលទាំងអស់ទូទាំងខេត្ត ត្រូវយកចិត្តទុកដាក់ផ្តល់សេវាជូនដល់បងប្អូនប្រជាពលរដ្ឋដែលប្រើប្រាស់បណ្ណមូលនិធិសមធម៌ និងបណ្ណ ប.ស.ស សូមកុំឱ្យមានការបែងចែក អ្នកបង់លុយយកចិត្តទុកដាក់ និងអ្នកដែលកាន់កាតមិនយកចិត្តទុកដាក់ ដែលបញ្ហានេះលោកសំណូមពរកុំឱ្យកើតមានឱ្យសោះ នៅក្នុងខេត្តព្រះវិហារ ហើក៏លើកទឹកចិត្តដល់ប្រជាពលរដ្ឋដែលប្រើប្រាស់បណ្ណទាំងនេះ សូមមានសេចក្តីក្លាហានរាយការណ៍ជូនថ្នាក់ដឹកនាំ ក្នុងករណីដែលមន្ត្រីសុខាភិបាលមិនយកចិត្តទុកដាក់ចំពោះអ្នកប្រើប្រាស់បណ្ណ។
ការណែនាំរបស់លោកវេជ្ជបណ្ឌិត គួង ឡូ បានធ្វើឡើងក្នុងឱកាសដែលលោកអញ្ជើញចូលរួមក្នុងពិធីបើកសន្និបាតបូកសរុបលទ្ធផលការងារសុខាភិបាលប្រចាំឆ្នាំ២០២៤ និងលើកទិសដៅបន្តឆ្នាំ២០២៥ របស់មន្ទីរសុខាភិបាលខេត្តព្រះវិហារ នាព្រឹកថ្ងៃទី០១ ខែមេសា ឆ្នាំ២០២៥ ដោយមានការចូលរួមពីថ្នាក់ដឹកនាំមន្ទីរ អាជ្ញាធរក្រុង ស្រុក លោក លោកស្រី ប្រធាន អនុប្រធាន មន្ទីរ អង្គភាព ជុំវិញខេត្ត លោក លោកស្រី ប្រធាន អនុប្រធាន មន្ទីរពេទ្យបង្អែក មណ្ឌលសុខភាព ប៉ុស្តិ៍សុខភាព ព្រមទាំងដៃគូរជាច្រើនទៀត។
លោក គួង ឡូ បានលើកឡើងថា សន្និបាតដែលយើងធ្វើនាថ្ងៃនេះ គឺដើម្បីពិនិត្យមើលសកម្មភាពមួយចំនួនដែលយើងជួបប្រទះនៅក្នុងឆ្នាំ២០២៤ ដើម្បីរកដំណោះស្រាយសម្រាប់ឆ្នាំ២០២៥ ធ្វើយ៉ាងណាឱ្យការផ្តល់ និងការបម្រើសេវាសុខភាពជូនប្រជាពលរដ្ឋកាន់តែល្អប្រសើរនៅក្នុងខេត្តព្រះវិហារ។ក្នុងនាមមន្ត្រីសុខាភិបាលក្នុងខេត្តព្រះវិហារ លោកសូមថ្លែងអំណរគុណដល់ដៃគូរអភិវឌ្ឍន៍ទាំងអស់ ដែលបានចូលរួមចំណែកយ៉ាងសកម្ម នៅក្នុងការធ្វើយ៉ាងណាឱ្យសេវាសុខភាពនៅក្នុងខេត្តព្រះវិហារដំណើរការកាន់តែប្រសើរ។
លោកប្រធានមន្ទីរសុខាភិបាលខេត្ត បានបញ្ជាក់ថា «សុខភាព» ជារឿងមួយដែលប្រជាពលរដ្ឋនៅក្នុងពិភពលោកចង់បាន ប៉ុន្តែយើងពិនិត្យទៅលើការជូនពរនៅក្នុងប្រទេសកម្ពុជារបស់យើង គឺការជូនពរទី១ គឺជូនពរឱ្យមាន «សុខភាពល្អ» ចឹងមានន័យថា«សុខភាព»ជារឿងចម្បងសម្រាប់មនុស្សជាតិ។មន្ទីរសុខាភិបាលតំណាងឱ្យអង្គភាពមួយដែលបម្រើសេវាលើសុខភាពនេះ នឹងខិតខំធ្វើយ៉ាងណាឱ្យបងប្អូនប្រជាពលរដ្ឋនៅក្នុងខេត្តព្រះវិហារ មានសុខភាពកាន់តែល្អប្រសើរ។ ប៉ុន្តែការខិតខំរបស់មន្ទីរសុខាភិបាលតែម្នាក់ឯង ប្រាកដណាស់ថាមិនអាចសម្រេចបាននូវគោលដៅ ឫក៏មិនអាចសម្រេចបាននូវចក្ខុវិស័យរបស់ខ្លួននោះទេ លុះត្រាតែមានការចូលរួមយ៉ាងសកម្ម ពីដៃគូរអភិវឌ្ឍន៍ ពីសហគមន៍ ពីក្រុមគ្រួសាររបស់បងប្អូនប្រជាពលរដ្ឋយើង ទើបយើងអាចសម្រេចបាននូវចក្ខុវិស័យរបស់យើង»។
លោក គួង ឡូ ថ្លែងបញ្ជាក់ថា ដូចដែលយើងទាំងអស់គ្នាបានដឹង ហើយជាបទពិសោធន៍មួយដ៏ល្អសម្រាប់យើងនៅក្នុងការប្រយុទ្ធប្រឆាំងជំងឺកូវីដ-១៩ បើមិនមានការចូលរួមយ៉ាងសកម្មពីអាជ្ញាធរគ្រប់លំដាប់ថ្នាក់ ពីដៃគូរអភិវឌ្ឍន៍ ពីបងប្អូនប្រជាពលរដ្ឋ ពីសហគមន៍ ពីក្រុមគ្រួសារ យើងមិនអាចសម្រេចបាននូវភាពជោគជ័យដ៍ធំនៃការប្រយុទ្ធប្រឆាំងជំងឺកូវីដ-១៩ នៅក្នុងប្រទេសកម្ពុជាបាននោះទេ។
ប្រធានមន្ទីរសុខាភិបាលខេត្តព្រះវិហារ ក៏បានណែនាំដល់មន្ត្រីសុខាភិបាលទាំងអស់ សូមធ្វើយ៉ាងណាពង្រឹងការផ្តល់សេវា ទៅតាមអនុសាសន៍របស់លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នូវពាក់្យ២ឃ្លាដែលយើងទាំងអស់គ្នាត្រូវតែចងចាំនិងអនុវត្តន៍គឺ ទី១៖ ពាក្យពង្រឹង និងទី២៖ ពង្រីក។ ដោយលោកធ្វើការបកស្រាយថា ពាក្យថាពង្រឹង គឺមានន័យថាធ្វើយ៉ាងណាឱ្យមានគុណភាព ចំណែកពាក្យថាពង្រីក គឺមានន័យថា ធ្វើយ៉ាងណាឱ្យប្រជាពលរដ្ឋអាចមកទទួលសេវាបាន ដោយយើងត្រូវគិតពីតម្លៃសេវា និងឥរិយាបថរបស់បុគ្គលិកម្នាក់ៗ។
លោក គួង ឡូ ក៏បានប្រាប់ដៃគូអភិវឌ្ឍន៍ និងអាជ្ញាធរមូលដ្ឋាន សូមជួយស្វែងរកបងប្អូនប្រជាពលរដ្ឋដែលមានជម្ងឺរ៉ាំរ៉ៃដែលមិនទាន់បានធ្វើការព្យាបាល គាត់នៅក្នុងសហគមន៍ គាត់មិនមានលទ្ធភាពធ្វើការព្យាបាល គាត់មិនយល់ពីការព្យាបាល សូមជួយធ្វើយ៉ាងណារកគាត់ឱ្យឃើញ ហើយផ្តល់ព័ត៌មាននេះមកមណ្ឌលសុខភាព មកមន្ទីរសុខាភិបាល យើងនឹងធ្វើកិច្ចការនេះជូនគាត់ បើគាត់មិនមានមធ្យោបាយមកកាន់មន្ទីរពេទ្យ ឬមកកាន់មណ្ឌលសុខភាព យើងនឹងប្រើប្រាស់រថយន្តសង្គ្រោះរបស់មន្ទីរពេទ្យ ឬមណ្ឌលសុខភាព ទៅទទួលគាត់ដល់ផ្ទះ ដោយយើងមិនទុកឱ្យនណាម្នាក់ឈឺ និងស្លាប់ នៅក្នុងសហគមន៍ ដោយមិនទទួលបានការព្យាបាលនោះទេ។
បន្ថែមពីនេះលោកវេជ្ជបណ្ឌិត គួង ឡូ ក៏បានថ្លែងប្រាប់ពីបញ្ហាជម្ងឺមិនឆ្លង គឺជាជម្ងឺមួយដែលកំពុងដើរតួយ៉ាងសំខាន់នៅក្នុងការសម្លាប់ប្រជាពលរដ្ឋនៅលើពិភពលោក ក្នុងនោះក៏មានប្រទេសកម្ពុជាដែរ។ តាមការសិក្សាស្រាវជ្រាវបានបង្ហាញច្បាស់ថា នៅប្រទេសជឿនលឿន៧០% នៃអ្នកស្លាប់ គឺបណ្តាលមកពីជម្ងឺមិនឆ្លង ដោយឡែកនៅប្រទេសកម្ពុជាគឺមាន៦៥% នៃអ្នកស្លាប់ដោយជម្ងឺមិនឆ្លង មានដូចជា៖ ជម្ងឺទឹកនោមផ្អែម ជម្ងឺលើសសំពាធឈាម ជម្ងឺគាំងបេះដូង៕
