(ខេត្តកំពត)៖ នៅពីព្រឹកថ្ងៃទី០៩ខែមករាឆ្នាំ២០១៩នេះ រដ្ឋបាលខេត្តកំពតបានបើកកិច្ចប្រជុំសាមញ្ញក្រុមប្រឹក្សាខេត្តលើកទី៥៦ អាណត្តិ ទី២របស់ខ្លួន ក្រោមអធិបតីភាព លោក អ៉ឹង ម៉េងហួរ ប្រធានក្រុមប្រឹក្សាខេត្ត និងលោកជឹង ផល្លា អភិបាលខេត្តស្ដីទីតំណាង លោក ជាវ តាយ អភិបាល នៃគណៈអភិបាលខេត្តកំពត។
កិច្ចប្រជុំ បានផ្ដោតលើរបៀបវារៈសំខាន់រួមមាន៖
១-ពិនិត្យអនុម័ត លើរបៀបវារៈនៃកិច្ចប្រជុំក្រុមប្រឹក្សាលើកទី៥៦ អាណត្តិ ទី២ របស់ក្រុមប្រឹក្សាខេត្ត។
២-ពិនិត្យ អនុម័ត លើកំណត់ហេតុកិច្ចប្រជុំក្រុមប្រឹក្សាលើកទី៥៥ អាណត្តិទី២របស់ក្រុមប្រឹក្សាខេត្ត។
៣-ពិនិត្យ អនុម័ត លើរបាយការណ៍ប្រចាំខែធ្នូ ឆ្នាំ២០១៨ ស្ដីពី ការអនុវត្តការងារ របស់រដ្ឋបាលខេត្ត។
៤-ពិនិត្យ ពិភាក្សា លើរបាយណ៍ប្រចាំឆ្នាំ ២០១៨ ស្ដីពីការអនុវត្តការងាររបស់រដ្ឋបាលខេត្ត។
៥-ពិនិត្យ អនុម័ត លើរបាយការណ៍ស្ដីពីវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តឆ្នាំ២០១៨។
៦-ពិនិត្យ អនុម័ត លើសេចក្ដីសម្រេច ស្ដីពីការផ្លាស់ប្ដូរ និងបំពេញបន្ថែម នូវសមាសភាពគណៈកម្មាធិការលទ្ធកម្ម។
៧-ពិនិត្យ អនុម័ត លើសេចក្ដីសម្រេច ស្ដីពីការផ្លាស់ប្ដូរ និងបំពេញបន្ថែម នូវសមាសភាពគណៈកម្មាធិការសម្របសម្រួលបច្ចេកទេសនិងបញ្ហាផ្សេងៗ។
លោក ជឹង ផល្លា អភិបាលរង តំណាង លោកជាវ តាយ អភិបាលខេត្តកំពត ក៏បានថ្លែងការកោតសរសើរចំពោះក្រុមប្រឹក្សាខេត្តដែលតែងតែរួមសហការ និងលើកជាយោបល់ជាមួយគណៈអភិបាលខេត្ត ដើម្បីជំរុញកិច្ចអភិវឌ្ឍន៍ខេត្តកំពតកាន់តែមានភាពរីកចម្រើន ដូចជាបញ្ហាដោះស្រាយនិងបញ្ហាការចាត់វិធានការលើការងារផ្សេងៗ គឺខេត្តតែងតែអនុវត្តធ្វើឡើងផ្អែកទៅតាមតួនាទីនិងដែនសមត្ថកិច្ចរបស់រដ្ឋបាល ថ្នាក់ក្រុង ស្រុក ឃុំ សង្កាត់ ដែលបញ្ហាទាំងអស់នោះកើតឡើងក្នុងមូលដ្ឋាននៃការគ្រប់គ្រងរដ្ឋបាលនិមួយៗ។
លោក អ៊ឹង ម៉េងហួរ ប្រធានក្រុមប្រឹក្សាខេត្ត ក៏បានថ្លែងការកោតសរសើរចំពោះគណៈអភិបាលខេត្ត ក៏ដូចជាមន្ទីរ អង្គភាពជុំវិញខេត្ត ដែលកន្លងមកបានខិតខំជំរុញកិច្ចអភិវឌ្ឍន៍មានការរីកចម្រើនក្នុងខេត្តគួរឲ្យកត់សម្គាល់។ជាមួយនេះ លោកក៏នៅតែសំណូមពរឲ្យមានការយកចិត្តទុកដាក់និងជំរុញបន្ថែមទៀត ពិសេសសេវាតម្រូវការ និងសេវាសំណូមពររបស់ប្រជាពលរដ្ឋឲ្យបានកាន់តែប្រសើរឡើងថែមទៀត៕ សេង ណារិទ្ធ
