ខេត្តត្បូងឃ្មុំ ៖សង្វៀនបញ្ជល់មាន់អមដោយវង់អាប៉ោងបានលេងចាក់ភ្នាល់លុយ បានយ៉ាងរលូន ដោយមិនឃើញសមត្ថកិច្ចណាបង្ក្រាបឡើយ មិនតែប៉ុណ្ណោះ អ្នកមើលការខុសត្រូវ ដែលគេហៅថាអ្នកសំរបសំរួលមាន រឹកពារក្រអើតក្រទម ចេញមុខមកអួតច្រង៉េងច្រង៉ាង មិនខ្លាចអ្វីឡើយ។ សង្វៀនបញ្ជល់មាន់ខាងលើនេះ ស្ថិតនៅចំណុចដើមពោធិ ភូមិអន្លង់ពោង ឃុំទន្លេបិទ ស្រុកត្បូងឃ្នុំ ខេត្តត្បូងឃ្មុំ ដែលមានអ្នកមើលការខុសត្រូវ ឈ្មោះ ណាន ភេទប្រុស អាយុប្រហែល៤០ឆ្នាំ មានទីលំនៅភូមិទន្លេបិទ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ។
ជាក់ស្តែងនៅរសៀលថ្ងៃទី១ខែមករាឆ្នាំ២០១៩នេះ អ្នកយកសារពត៍មានយើងបានចុះយក ពត៍មាននៅចំណុចខាងលើ ឃើញការបញ្ជល់មាន់និងលេងអាប៉ោងដាក់លុយ ហើយបានរាយការណ៍តាមរយះទូរសព្ទ័ ទៅលោក សួស សា៑ងលី អធិការនគរបាល ស្រុកត្បូងឃ្មុំហើយ លោកអធិការទទួលនិងឆ្លើយតបវិញថា ( ចាំលោកអោយកូនចៅទៅមើល) តែបាត់មិនឃើញ មានសមត្ថកិច្ចណាម្នាក់មកសោះ។ ឃើញដូច្នោះ យើងក៏បានទទូរសព្ទ័ទៅលោកអធិការ សួស សា៑ងលីម្តងទៀត ពេលទូរសព្ទ័ចូលហើយមិនមានអ្នកទទួលឡើយឬមួយលោកអធិការមានចេតនាមិនចង់បង្ក្រាបបទល្មើស ដែលស្ថិតក្នុងគោលនយោបាយ ភូមិ ឃុំមានសុវត្តិភាពរបស់រាជរដ្ឋាភិបាល។ ការធ្វើព្រងើយកន្តើយបែបនេះត្រូវបានប្រជាពលរដ្ឋយល់ឃើញថាលោកអធិការត្រូវដុល្លារបស់ជនល្មើសបិទភ្នែកបិទត្រជៀកញុកមាត់អស់ហើយ។
ប្រជាពលរដ្ឋនិងអ្នកសារពត៍មានអស់ទំនុកចិត្តលើលោកអធិការហើយប្រជាពលរដ្ឋបានសំណូមពរដល់លោកឧត្តមសេនីយ៍ទោបែន រត្ន័ ស្នងការនគរបាលខេត្តត្បូងឃ្មុំនិងលោកជៀម សុភណ្ឌ័ អភិបាលខេត្តត្បូងឃ្មុំជួយអន្តរាគមន៍និងចំណាត់ការរឿងនេះផង ៕
