(ខេត្តកំពត)៖ ជនជាតិអាលឺម៉ង់ម្នាក់បានស្លាប់ក្នុងបន្ទប់ផ្ទះសំណាក់មួយស្ថិតនៅភូមិសុវណ្ណសាគរ សង្កាត់កំពង់កណ្តាល ក្រុងកំពតដោយសមត្ថកិច្ចជំនាញបញ្ជាក់ថាបណ្តាលមកពីការធ្វើអត្តឃាត។ ភាពភ្ញាក់ផ្អើលនេះបានកើតឡើងកាលពីវេលាថ្ងៃត្រង់ថ្ងៃទី៣០ ខែធ្នូ ឆ្នាំ២០១៨។
មន្ត្រីនគរបាលក្រុងកំពតបានប្រាប់ឱ្យដឹងថាបុរសដែលសម្លាប់ខ្លួនទាំងមិនបានដឹងមូលហេតុច្បាស់លាស់នេះឈ្មោះ SAUERLAND JOHANNES អាយុ ៦៨ឆ្នាំសញ្ជាតិអាលឺម៉ង់ កាន់លិខិតឆ្លងដែនលេខ:C4WG3RT2C។
ប្រភពពីសមត្ថកិច្ចដដែលបានរៀបរាប់ថា កាលពីម៉ោង១២ថ្ងៃត្រង់ថ្ងៃទី៣០ខែធ្នូសមត្ថកិច្ចបានទទួលសេចក្តីរាយការណ៍ពីម្ចាស់ផ្ទះសំណាក់(ស្លីបភីង)ដែលមានទីតាំងស្ថិតក្នុងភូមិសុវណ្ណសាគរសង្កាត់កំពង់កណ្តាល ក្រុងកំពត ថាមានជនបរទេសជាភ្ញៀវរបស់ខ្លួនបានស្លាប់ក្នុងបន្ទប់។ ភ្លាមៗសមត្ថកិច្ចជំនាញសហការជាមួយក្រុមគ្រូពេទ្យនៃមន្ទីរពេទ្យបង្អែកខេត្តកំពតចុះដល់គោលដៅនិងពិនិត្យឃើញថាបុរសជនជាតិអាលឺម៉ង់រូបនោះបានលេបថ្នាំងងុយដេកអស់យ៉ាងច្រើន។
មន្ត្រីនគរបាលបានបញ្ជាក់ថាការធ្វើអត្តឃាតនេះសមត្ថកិច្ចរកមិនឃើញពីមូលហេតុទេហើយសូម្បីម្ចាស់ផ្ទះសំណាក់ក៏មិនបានដឹងនោះដែរ៕
សេង ណារិទ្ធ
