(ភ្នំពេញ)៖ ជាមួយរូបភាពជាច្រើនសន្លឹកនៅលើទីលានវាយកូនហ្គោល សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានបង្ហាញការពេញចិត្តលើសារក្រើនរំលឹកមួយចំនួនពាក់ព័ន្ធភាពកតញ្ញូរបស់កូនចៅចំពោះឪពុកម្តាយ ដែលសូម្បីសម្តេចក៏រសៀនសូត្រតាមផងដែរ។
សារក្រើនរំលឹកដែលនាំឱ្យសម្តេចតេជោ ពេញចិត្តនោះមានរួមមាន៖ «កុំយកចំណីអាហារមកឱ្យពុកពេលពុកមិនអាចទទួល, យំសោកស្តាយស្រណោះពេលពុកស្តាប់មិនឮ។ល។»។
សម្តេចតេជោ បានបង្ហាញការពេញចិត្តលើសារអប់រំទាំងនេះ សម្រាប់កូនៗ ឬចៅៗ ឬភរិយាឬស្វាមី។
ទន្ទឹមនឹងការពេញចិត្តលើសារខាងលើនេះហើយ សម្តេចតេជោ ក៏បានដាក់សារ៣បន្ថែម ទៅកាន់ភរិយា កូនៗ និងចៅរបស់សម្តេចផងដែរ។
សារទាំង៣នោះរួមមាន៖
១៖ សូមកុំលើកទឹកចិត្តប្តី ឬឪពុក ឬជីតា ទៅវាយកូនគោលពេលខ្ញុំមិនមានកម្លាំងវាយ។
២៖ កូនប្រុសទាំងបីកុំបបួលពុក ទៅវាយកូនគោលពេលពុកដើរមិនរួច។
៣៖ កូនប្រុសទាំងបីកុំយកឧបករណ៍វាយកូនគោលដែលវាយបានឆ្ងាយនិងត្រង់មកឱ្យពុកមើល ពេលពុកមិនអាចបើកភ្នែកមើលបាន។
សម្តេចតេជោ ហ៊ុន សែន សង្ឃឹមថា សាររបស់សម្តេចនឹងទទួលបានការឆ្លើយតបសម្រាប់ពេលមានកម្លាំងដូចពេលនេះ៕
